ചേമ്പിൻ താൾ - കൊള്ളിക്കിഴങ്ങ് മൊളോഷ്യം

പണ്ടത്തെ ചില തട്ടിക്കൂട്ടു വിഭവങ്ങളിൽ പെടുന്നതാണ് ഇതൊക്കെ. അന്നൊക്കെ എത്ര ഇല്ലായ്മ ആണെങ്കിലും, ഒരു മുറവുമായി പറമ്പിലൊന്ന് ചുറ്റിവരുമ്പോഴേക്കും അന്നത്തെ കൂട്ടാനുള്ള വകകൾ എന്തെങ്കിലുമൊക്കെ ഒപ്പിച്ചിട്ടുണ്ടാവും അമ്മയും അമ്മമ്മയുമൊക്കെ. അത്തരത്തിലുള്ള, വളരെ ലളിതമായ ഒരു വിഭവമാണിത്. ഏറെ സ്വാദിഷ്ടവും.

ആവശ്യമുള്ള സാധനങ്ങൾ:

•  ചേമ്പിൻ‌തണ്ട് -  കാൽ കിലോ (കൃത്യമായ അളവൊന്നും വേണമെന്നില്ല. ഒരു കൈക്കണക്ക്. അത്രേയുള്ളൂ)
• കൊള്ളിക്കിഴങ്ങ് - ഏതാണ്ട് കാൽ കിലോ
• മഞ്ഞൾപ്പൊടി
• കാന്താരിമുളക് - ആവശ്യത്തിന്
• ചുവന്നുള്ളി - ഒരു പിടി
• ഉപ്പ്, വെളിച്ചെണ്ണ, കറിവേപ്പില

ഉണ്ടാക്കുന്ന വിധം:
കിഴങ്ങ് തൊലി കളഞ്ഞ് ചെറിയ കഷ്ണങ്ങളാക്കുക.
താൾ പുറം‌തൊലി ചീകിക്കളഞ്ഞ് വട്ടത്തിലരിയുക.
ചുവന്നുള്ളി ചെറുതായി അരിയുക.

കൊള്ളിക്കഷ്ണങ്ങൾ വെള്ളമൊഴിച്ച് മഞ്ഞൾപ്പൊടിയും കാന്താരിമുളകും ഉപ്പും ചേർത്ത് വേവിക്കുക.  ചെറുതീയിൽ വച്ചാൽ മതി. ഇടയ്ക്കിടെ ഇളക്കിക്കൊടുത്തില്ലെങ്കിൽ  വെന്തുതുടങ്ങുമ്പോൾ കൊള്ളി കരിഞ്ഞുപിടിക്കും. (കുക്കറിൽ വേവിച്ചെടുത്താലും മതി). വേവായാൽ താൾ അരിഞ്ഞത് ചേർക്കുക. വെള്ളം പോരെങ്കിൽ കുറച്ച് ചേർക്കാം. വളരെ വേഗം താൾ വെന്തു യോജിക്കും. ഉപ്പും എരിവുമൊക്കെ പാകത്തിനാണോന്നു നോക്കിയശേഷം കറിവേപ്പിലയിട്ട് വാങ്ങിവയ്ക്കാം.

ഇതിലേക്ക് ചുവന്നുള്ളി വെളിച്ചെണ്ണയിൽ മൂപ്പിച്ചതും കൂടി ചേർത്താൽ മൊളോഷ്യം റെഡി!

ചക്ക മുളകുപൊതിഞ്ഞിട്ടത്

ചക്ക കൊണ്ടുള്ള വളരെ രുചികരമായ മൊളോഷ്യമാണിത്. കാന്താരിമുളക് വാഴയിലയിൽ പൊതിഞ്ഞെടുത്ത് ചക്കയുടെ കൂടെ വേവിച്ചെടുത്താണ്, തികച്ചും ലളിതമായ ഈ മൊളോഷ്യം ഉണ്ടാക്കുന്നത്.  എങ്ങിനെയെന്ന് പറയാം:

ആവശ്യമുള്ള സാധനങ്ങൾ:

• കുരുവും ചവിണിയും കളഞ്ഞ് നുറുക്കിയെടുത്ത ചക്കച്ചുള - ആവശ്യത്തിന്
• കുറച്ച് കാന്താരിമുളക്
• ഒരു കഷ്ണം വാഴയില
• മഞ്ഞൾപ്പൊടി, ഉപ്പ്, കറിവേപ്പില, വെളിച്ചെണ്ണ

ഉണ്ടാക്കുന്ന വിധം:

ചക്ക പാകത്തിന് ഉപ്പും, സ്വല്പം മഞ്ഞൾപ്പൊടിയും ചേർത്ത് നികക്കെ വെള്ളമൊഴിക്കുക.

വാഴയില ചെറുതായി വാട്ടിയശേഷം, അതിൽ കാന്താരിമുളകു വച്ച് ചെറിയൊരു പൊതിയായി പൊതിഞ്ഞെടുത്ത് വാഴനാരുകൊണ്ട് കെട്ടുക. തയ്യാറാക്കിയ ചക്കയിലേക്ക് ഈ മുളകുപൊതിയും ചേർത്ത് അടുപ്പത്തു വയ്ക്കുക. ഇടയ്ക്ക് ഇളക്കിക്കൊടുക്കണം.

ചക്ക നന്നായി വെന്തുകഴിഞ്ഞാൽ ഇലപ്പൊതി പുറത്തെടുക്കാം.

പൊതിയിലെ കാന്താരി മുളക് നന്നായി ഉടച്ച് കൂട്ടാനിൽ ചേർക്കുക. ഇനി ഇല കളയാം.

എല്ലാം കൂടി യോജിച്ച് നന്നായി തിളച്ചാൽ വാങ്ങിവയ്ക്കാം.  ചക്ക ചെറുതായൊന്ന് ഉടച്ചുകൊടുക്കണം.

വാങ്ങിവച്ചശേഷം കറിവേപ്പിലയും വെളിച്ചെണ്ണയും ചേർത്ത് കുറച്ചുനേരം അടച്ചുവയ്ക്കുക. അത്രതന്നെ!

 വാഴയിലയുടേയും, അതിലിരുന്ന് വെന്ത മുളകിന്റേയും, രുചിയും മണവും ചക്കയിൽ ചേരുമ്പോഴുള്ള രുചി പറഞ്ഞറിയിക്കാനാവാത്തതാണ്!

മാങ്ങാച്ചമ്മന്തിയും  ഉപ്പുമാങ്ങയുമൊക്കെയാണ് ഇതിനു പറ്റിയ കൂട്ട്.

കുറിപ്പ്: ഇതേ രീതിയിൽ കപ്പക്ക(പപ്പായ) കൊണ്ട് കൂട്ടാനുണ്ടാക്കുന്ന വിധം ഇവിടെ പറഞ്ഞിട്ടുണ്ട്.

കഞ്ഞിവെള്ളം കൊണ്ട് കൂട്ടാൻ

പണ്ടുകാലത്ത് എളുപ്പത്തിൽ തട്ടിക്കൂട്ടുന്ന ഒരു കൂട്ടാനാണിത്. അന്നൊക്കെ പരിപ്പ് മുതലായ ധാന്യവർഗ്ഗങ്ങൾ എപ്പോഴും അടുക്കളയിൽ സ്റ്റോക്കുണ്ടാകണമെന്നില്ല. അപ്പോൾ പരിപ്പു ചേർക്കാതെ ഇങ്ങനെ ചില സൂത്രപ്പണികൾ ഒപ്പിക്കും. അതാണു പതിവ്.

ആവശ്യമുള്ള സാധനങ്ങൾ:

• കുത്തരിയുടെ കഞ്ഞിവെള്ളം 
• കുറച്ച് തേങ്ങ ചിരകിയത്
• ചുവന്ന മുളക് - അവശ്യത്തിന്
• അരി - ഒരു ടീസ്പൂൺ
• ജീരകം
• കുറച്ച് ചുവന്നുള്ളി അരിഞ്ഞത്
• ഏതെങ്കിലും ചീരയില/മത്തയില/കുമ്പളത്തില അരിഞ്ഞത് - കുറച്ച്
• വറുത്തിടാനുള്ള കടുക്, മുളക്, കറിവേപ്പില, വെളിച്ചെണ്ണ.
• പാകത്തിന് ഉപ്പ്

ഉണ്ടാക്കുന്ന വിധം:

തേങ്ങ, ജീരകം, മുളക്, അരി എന്നിവ നന്നായി അരച്ചെടുക്കുക.
ചീനച്ചട്ടിയിൽ വെളിച്ചെണ്ണയൊഴിച്ച് കടുകും മുളകും കറിവേപ്പിലയും വറുത്ത ശേഷം അതിലേക്ക് ഉള്ളി അരിഞ്ഞതിട്ട് മൂപ്പിക്കുക. ഇതിൽ കഞ്ഞിവെള്ളം ഒഴിച്ചിളക്കുക.

അരച്ചുവച്ചിരിക്കുന്ന തേങ്ങാമിശ്രിതവും ചേർത്ത് തിളച്ചാലുടൻ അരിഞ്ഞുവച്ചിരിക്കുന്ന ചീരയില (ഞാനിവിടെ കുമ്പളത്തിലയാണ് എടുത്തിരിക്കുന്നത്) ചേർക്കുക.

നന്നായി തിളച്ച് കുറുകിവരുമ്പോൾ വാങ്ങാം.

കഴിഞ്ഞു! ഇത്രേയുള്ളു കാര്യം. വളരെ എളുപ്പമല്ലേ? ഇത് ഇങ്ങനെതന്നെ ഉണ്ടാക്കണമെന്നില്ല. നിങ്ങളുടെ മനോധർമ്മമനുസരിച്ച് ചേരുവയിൽ മാറ്റങ്ങൾ വരുത്താം. ഉദാഹരണത്തിന്, സ്വല്പം പുളി/മോര് ചേർത്ത്, അല്ലെങ്കിൽ മറ്റെന്തെങ്കിലും കഷ്ണം ചേർത്ത്...അങ്ങനെയങ്ങനെ.....

അസ്ത്രക്കെട്ട് (ചേമ്പിലക്കെട്ട്)

ചേമ്പില  കീറിയെടുത്ത് ചുരുട്ടി ചെറിയ കെട്ടുകളാക്കുന്നതിനേയണ് അസ്ത്രക്കെട്ട് എന്നു പറയുന്നത്.  കുറച്ചു ബുദ്ധിമുട്ടുള്ള പണിയാണ് കേട്ടോ ഇത്. ബുദ്ധിമുട്ടെന്നു പറഞ്ഞാൽ....മല മറിക്കുന്ന പണിയൊന്നുമല്ല. പെട്ടെന്നു ചെയ്തു തീർക്കാൻ പറ്റില്ലെന്നു മാത്രം.
എന്തായാലും, എങ്ങിനെയാണിത്  ചെയ്യുന്നതെന്നു പറയാം:

ആവശ്യത്തിന് ചേമ്പില സംഘടിപ്പിക്കുക. തളിരില നോക്കി എടുക്കണം.

ഇനി, ചേമ്പില ദീർഘചതുരാകൃതിയിലുള്ള കഷ്ണങ്ങളാ‍യി കീറിയെടുക്കുക. (ഇതിന് വേണമെങ്കിൽ കത്രികപ്രയോഗം നടത്താം) .
ഓരോ കഷ്ണവും തെറുത്തെടുത്തശേഷം നടുക്ക് കെട്ടുണ്ടാക്കുക. ഇതാണ് അസ്ത്രക്കെട്ട്. (ചെയ്തു പരിചയമുള്ളവർക്ക് നല്ല ഭംഗിയായി ചെയ്യാൻ പറ്റും. ഞാൻ ചെയ്തത് അത്ര ഭംഗിയായിട്ടില്ല)

ഇങ്ങനെ ആവശ്യത്തിന് അസ്ത്രക്കെട്ടുകൾ തയ്യാറാക്കുക.
ഇനി ഇതുകൊണ്ട് തോരനോ, മൊളോഷ്യമോ, പുളിങ്കറിയോ ഒക്കെ ഉണ്ടാക്കാം.

അസ്ത്രക്കെട്ടുകൊണ്ട് ഞാൻ ഒരു തോരൻ ഉണ്ടാക്കി.

ഉണ്ടാക്കിയ വിധം:

സാധാരണ തോരൻ ഉണ്ടാക്കുന്നതുപോലെ തന്നെ.

ആദ്യം തന്നെ കുറച്ചു തേങ്ങയും കാന്താരിമുളകും ജീരകവും ഉള്ളിയും കൂടി ചതച്ചുവച്ചു.

എന്നിട്ട് വെളിച്ചെണ്ണയിൽ കടുകും മുളകും കറിവേപ്പിലയും വറുത്തശേഷം കുറച്ചു ഉഴുന്നുപരിപ്പിട്ട് മൂപ്പിച്ചു. അതിലേക്ക് അസ്ത്രക്കെട്ടുകൾ ഇട്ട്, കുറച്ചു പുളിവെള്ളം തളിച്ചശേഷം തേങ്ങാമിശ്രിതവും ചേർത്തിളക്കി ചെറുതീയിൽ അടച്ചുവച്ചു. (ചേമ്പിലയ്ക്ക് ചൊറിച്ചിലെങ്ങാനും ഉണ്ടെങ്കിൽ അത് പോവാനാണ് പുളിവെള്ളം തളിക്കുന്നത്). ചൂടുതട്ടുമ്പോഴേക്കും അസ്ത്രക്കെട്ടുകളെല്ലാം ശൂ..ന്നങ്ങ് ചൊട്ടി, നേർപകുതിയാവും. (ഉപ്പ് ഈ സമയത്ത് ചേർത്താൽ മതി. ആദ്യത്തെ അളവുപ്രകാരം ഇട്ടാൽ ചിലപ്പോൾ അധികമായിപ്പോവും). വെള്ളം നന്നായി വറ്റിയശേഷം അല്പനേരം കൂടി ചെറുതീയിലിട്ട് ഇളക്കിയിട്ട് തോരൻ വാങ്ങാം. നിങ്ങളുടെ താല്പര്യമനുസരിച്ച് ചേരുവകളിൽ മാറ്റങ്ങൾ വരുത്താവുന്നതാണ്.

അസ്ത്രക്കെട്ട് കൊണ്ടുണ്ടാക്കുന്ന ഈ തോരൻ വളരെ രുചികരമാണ്.

ഇത് അസ്ത്രക്കെട്ട് കൊണ്ടുണ്ടാക്കിയ മൊളോഷ്യം. പരിപ്പ് വേവിച്ചതിൽ അസ്ത്രക്കെട്ടുകളിട്ട് വേവിച്ച്, തേങ്ങയും കാന്താരിമുളകും കൂടി അരച്ചത് ചേർത്ത് യോജിപ്പിച്ചശേഷം വാങ്ങിവച്ച് കറിവേപ്പിലയും വെളിച്ചെണ്ണയും ചേർത്തു. അത്രതന്നെ.

വാഴപ്പിണ്ടി മൊളോഷ്യം

അടുക്കളത്തളത്തില്‍ ഇന്നത്തെ താരം വാഴപ്പിണ്ടിയാണ്(ഉണ്ണിപ്പിണ്ടിയെന്നും പറയും). വാഴപ്പിണ്ടി കണ്ടിട്ടില്ലേ....? കാണാത്തവര്‍ കണ്ടോളൂ....കേള്‍ക്കാത്തവര്‍ കേട്ടോളൂ...
കുല വെട്ടിയെടുത്താല്‍‌പിന്നെ വാഴയെ തഴയല്ലേ...അതിനുള്ളിലാണ് നാരുകളാല്‍ സമ്പന്നമായ നമ്മുടെ പിണ്ടി ഇരിക്കുന്നത്.

വാഴത്തടിയുടെ പോളകള്‍ ഒന്നൊന്നായി പൊളിച്ചുകളഞ്ഞ് ഉള്ളില്‍നിന്ന് പിണ്ടി എടുക്കുന്നത് കുറച്ചു ബുദ്ധിമുട്ടുള്ള പണിയാണ് കേട്ടോ....വസ്ത്രങ്ങളില്‍ വാഴക്കറ പറ്റാതെ ശ്രദ്ധിക്കുകയും വേണം. നമുക്കൊന്നു നോക്കാം:
വാഴയുടെ തലഭാഗം വെട്ടിക്കളഞ്ഞശേഷം തടിയില്‍ ഒരു മൂര്‍ച്ചയുള്ള അരിവാള്‍കൊണ്ടോ മറ്റോ നെടുകനെ കീറി പോളകള്‍ ഒന്നൊന്നായി പൊളിക്കുക.



ഉള്ളിലേക്കു ചെല്ലുന്തോറും വെള്ളനിറത്തിലാവും പോളകള്‍. അങ്ങിനെ അവസാനം പോളകളൊന്നും പൊളിഞ്ഞുപോരാത്ത അവസ്ഥയില്‍ ഏതാണ്ടൊരു ട്യൂബ്‌ലൈറ്റിന്റെ വണ്ണത്തില്‍ കാണപ്പെടുന്ന സാധനമാണ് പിണ്ടി. ദാ, കണ്ടോളൂ...


പിണ്ടി ആവശ്യത്തിന് മുറിച്ചെടുക്കുക.



അടുത്ത പണി പിണ്ടി അരിഞ്ഞെടുക്കുക എന്നതാണ്. ഉള്ളിയും മറ്റും അരിയുന്നത്ര എളുപ്പത്തില്‍ ഇതു നടക്കില്ല. കാരണം പിണ്ടിയില്‍ നാര് വളരെയധികമുണ്ട്. ഇതു കളഞ്ഞെടുത്തിട്ടുവേണം അരിയാന്‍.
ആദ്യമായി പിണ്ടി വട്ടത്തില്‍ കനം കുറച്ച് അരിയുക. അരിയുമ്പോള്‍ കഷ്ണത്തിനും പിണ്ടിയ്ക്കുമിടയില്‍ നാര് വലിഞ്ഞുവരുന്നതുകാണാം. ചിത്രം നോക്കൂ:



ഈ നാരിനെ ചൂണ്ടുവിരലില്‍ ചുറ്റിയെടുക്കുക. ഇങ്ങനെ എല്ലാ കഷ്ണങ്ങളിലും ചെയ്യുക. വിരലിലെ നാരുകൊണ്ടുള്ള ചുറ്റിക്കെട്ട് അവസാനം ഊരിക്കളയാം.



ഇനി ഈ കഷ്ണങ്ങള്‍ അടുക്കിപ്പിടിച്ച് കൊത്തിയരിഞ്ഞെടുക്കാം.



ഹാവൂ...അങ്ങിനെ പിണ്ടി അരിഞ്ഞത് റെഡിയായി. ഇത് വെള്ളത്തിലിട്ട് നന്നായി കഴുകി കറ കളഞ്ഞെടുക്കുന്നത് നന്ന്. ഇതുവരെയുള്ള കാര്യങ്ങളാണ് ബുദ്ധിമുട്ട്. ഇനി എല്ലാം എളുപ്പമാണ്. ഇതു കൊണ്ട് മൊളോഷ്യമോ, പുളിങ്കറിയോ തോരനോ ഒക്കെ നിങ്ങളുടെ താല്പര്യം പോലെ ഉണ്ടാക്കാം. ഇന്ന് ഞാനൊരു മൊളോഷ്യമാണ് ഉണ്ടാക്കുന്നത്. വെരി സിംപിള്‍!

അവശ്യമുള്ള സാധനങ്ങള്‍:

• പിണ്ടി അരിഞ്ഞത് - ഏതാണ്ടൊരു മുഴം നീളമുള്ള പിണ്ടിയുടേത്
  
• പരിപ്പ് - ഏകദേശം 100 ഗ്രാം
• തേങ്ങ ചിരകിയത് - അര മുറിയുടേത്
• കാന്താരിമുളക്/പച്ചമുളക് - ആവശ്യത്തിന്
• മഞ്ഞള്‍പ്പൊടി, മുളകുപൊടി, ഉപ്പ്
• കറിവേപ്പില, വെളിച്ചെണ്ണ

ഉണ്ടാക്കുന്ന വിധം:

പിണ്ടിയും പരിപ്പും കൂടി മഞ്ഞള്‍പ്പൊടിയും സ്വല്പം മുളകുപൊടിയും ചേര്‍ത്ത് വേവിച്ചെടുക്കുക. ഇതിലേക്ക് തേങ്ങയും കാന്താരിമുളകും കൂടി അരച്ചതു ചേര്‍ത്ത് നന്നായി യോജിപ്പിക്കുക. പാകത്തിന് വെള്ളവും ഉപ്പും ചേര്‍ക്കുക. നന്നായി തിളച്ചാല്‍ വാങ്ങിവച്ച് വെളിച്ചെണ്ണയും കറിവേപ്പിലയും ചേര്‍ത്തിളക്കി കുറച്ചുനേരം അടച്ചുവയ്ക്കുക. ഇത്രേയുള്ളു.

കുറിപ്പ്: വേണമെങ്കില്‍ ഇതില്‍ ചേമ്പ്, കൊള്ളിക്കിഴങ്ങ് ഇത്യാദി സാധനങ്ങള്‍ ചേര്‍ത്ത് ഒന്നുകൂടി ‘കൊഴുപ്പി’ക്കാവുന്നതാണ്(അപ്പോള്‍ പരിപ്പിന്റെ അളവു കുറയ്ക്കണം).

ഉള്ളി-മുളക്-പുളി ചാലിച്ചത്, കണ്ണിമാങ്ങാ സീസണാണെങ്കില്‍ കണ്ണിമാങ്ങ കുത്തിച്ചതച്ചത്, പിന്നെ ചുട്ട പപ്പടം ഇതൊക്കെയാണ് ഇതിനു പറ്റിയ കോമ്പിനേഷന്‍.

ഉള്ളിയും മുളകും ചാലിയ്ക്കാനറിയില്ലേ....? അറിയാനെന്തിരിക്കുന്നു?
കുറച്ചു ചുവന്നുള്ളി തൊലികളഞ്ഞതും കാന്താരിമുളകും ഉപ്പും സ്വല്പം പുളിയും കൂടി നന്നായി ഞെരടി യോജിപ്പിച്ച് സ്വല്പം വെള്ളവും വെളിച്ചെണ്ണയും കൂട്ടി ചാലിച്ചെടുക്കുക. അത്രതന്നെ! അതില്‍ ഒരു ചുട്ടപപ്പടം പൊടിച്ചതും കൂടി ചേര്‍ത്താല്‍ കെങ്കേമം! (ഒരു കലം ചോറ് അകത്താക്കാന്‍ ഇതു മാത്രമായാലും മതിയെന്നതു വേറെ കാര്യം).

വറുത്ത പയർ മൊളോഷ്യം

ഇത് പണ്ടത്തെ ഒരു കര്‍ക്കടകകാല വിഭവമാണ്. പഞ്ഞക്കര്‍ക്കടത്തില്‍ പച്ചക്കറികളൊന്നും കാര്യമായി ലഭിക്കാത്തപ്പോള്‍ തട്ടിക്കൂടുന്ന വിഭവം. കര്‍ക്കടകത്തിലാണ് പയര്‍ നടുക. വിത്തിനായി പാ‍തിയമ്പുറത്ത് കെട്ടിത്തൂക്കിയിട്ടുള്ള ഉണക്കപയര്‍ നടാനെടുക്കുന്ന സമയത്ത് ഒന്നുകൂടി പരിശോധിച്ച് ഏറ്റവും നല്ലത് മാത്രമെടുത്ത് ബാക്കിയുള്ളത് മാറ്റിവയ്ക്കും. ഇങ്ങനെ “ക്വാളിറ്റി ടെസ്റ്റി”ല്‍ റിജക്റ്റ് ചെയ്യപ്പെടുന്ന പയര്‍ അടുക്കളയില്‍ കൂട്ടാനായി മാറും. അത് അന്തക്കാലം. എങ്കിലും ഇപ്പോഴും ഞങ്ങള്‍ ഇടയ്ക്കൊക്കെ ഈ കൂട്ടാന്‍ ഉണ്ടാക്കാറുണ്ട്.
എങ്ങനെയാണെന്ന് പറയാം:

ആവശ്യമുള്ള സാധനങ്ങള്‍:

• പയര്‍ - ഏതാണ്ടൊരു കാല്‍ കിലോ
• അമ്മി - ഒന്ന്
  
• മുറം - ഒന്ന്
  
• തേങ്ങ ചിരകിയത് - ഒരു മുറി
• കാന്താരിമുളക് - ആവശ്യത്തിന്
• മഞ്ഞള്‍പ്പൊടി, മുളകുപൊടി, ഉപ്പ്, വെളിച്ചെണ്ണ, കറിവേപ്പില - അവശ്യത്തിന്

ഉണ്ടാക്കുന്ന വിധം:

പയര്‍ ഒരു ചീനച്ചട്ടിയിട്ട് കപ്പലണ്ടി വറുക്കുന്നതുപോലെ വറുത്തെടുക്കുകയാണ് ആദ്യം വേണ്ടത്. തീ കുറച്ചുവച്ച് ചെയ്യണം. കുറച്ചു കഴിഞ്ഞാല്‍ നല്ല മൂത്തമണം വരാന്‍ തുടങ്ങും. ഒട്ടും കരിയാതെ, ചുവക്കെ വറുക്കണം. കൊറിച്ചുനോക്കിയാല്‍ കടുമുടാന്നിരിക്കണം. ദാ, നോക്കൂ:


പയറിന്റെ തൊലി കളഞ്ഞ് പരിപ്പെടുക്കയാണ് ഇനി വേണ്ടത്. ഇതിനായി പയര്‍ അമ്മിയില്‍ വച്ച് അമ്മിക്കല്ലുകൊണ്ട് മെല്ലെ ഉരുട്ടണം. അപ്പോള്‍ തൊലി കുറേശ്ശെയായി ഇളകിപ്പോരും. പയറ് തെരങ്ങുക എന്നാണ് ഈ പരിപാടിക്ക് വീട്ടില്‍ പറയുന്നത്.


ഇനി ഇത് മുറത്തിലിട്ട് തൊലി ചേറ്റിക്കളയണം. (ഹോ, എന്തൊരു ബുദ്ധിമുട്ട് അല്ലേ..?)


ഇപ്രകാരം പയറ് ‘തെരങ്ങിയെടുത്ത’ പരിപ്പാണ് താഴെ കാണുന്നത്.


ഇനി കാര്യങ്ങള്‍ എളുപ്പമാണ്. തേങ്ങ കാന്താരിമുളകു ചേര്‍ത്ത് നന്നായി അരച്ചുവയ്ക്കുക. പയറുപരിപ്പ് പാകത്തിന് മഞ്ഞള്‍പ്പൊടിയും മുളകുപൊടിയും വെള്ളവും ചേര്‍ത്ത് കുക്കറില്‍ വേവിച്ചെടുക്കുക. വേവിച്ച പരിപ്പ് നന്നായി ഉടച്ചശേഷം ഉപ്പും തേങ്ങ അരച്ചതും ചേര്‍ത്ത് ഇളക്കുക. വെള്ളം പോരെങ്കില്‍ ആവശ്യത്തിന് ചേര്‍ത്ത് നന്നായി തിളപ്പിച്ചശേഷം വാങ്ങുക. എന്നിട്ട് വെളിച്ചെണ്ണയും കറിവേപ്പിലയും ഇട്ട് ഒന്നുകൂടി ഇളക്കി അടച്ചുവയ്ക്കുക.

ഇതേ കൂട്ടാന്‍ തന്നെ പയറുപരിപ്പിനോടൊപ്പം ചേമ്പ്, കൊള്ളിക്കിഴങ്ങ് മുതലായ കിഴങ്ങുവര്‍ഗ്ഗങ്ങള്‍ ചേര്‍ത്തും ഉണ്ടാക്കാവുന്നതാണ്.
കഞ്ഞിക്കും ചോറിനും അനുയോജ്യം. ചെത്തുമാങ്ങയാണ് പറ്റിയ കൂട്ട്.

കപ്പയ്ക്ക (പപ്പായ) മുളകു പൊതിഞ്ഞിട്ടത്

പപ്പായ ഞങ്ങളുടെ നാട്ടിൽ കപ്പയ്ക്ക എന്നറിയപ്പെടുന്നു. കപ്പളങ്ങ,കപ്പങ്ങ,പപ്പയ്ക്ക,കൊപ്പക്കായ എന്നീ പേരുകളും കേട്ടിട്ടുണ്ട്. മലപ്പുറം ജില്ലക്കാരായ എന്റെ ഭർതൃവീട്ടുകാർ ഓമക്കായ എന്നാണ് പറയുന്നത്. കുർമൂസ് എന്നൊരു പേര് സി.വി.ബാലകൃഷ്ണന്റെ ഒരു നോവലിൽ കണ്ടിട്ടുണ്ട്. പണ്ടുമുതൽക്കേ വീട്ടിൽ ഇതിന് ഒരുകാലത്തും ക്ഷാമമുണ്ടായിട്ടില്ല. പ്രത്യേക പരിചരണമൊന്നും വേണ്ടാത്തതുകൊണ്ടാവും ഒന്ന് നശിച്ചാൽ മറ്റൊന്ന് എന്ന മട്ടിൽ പറമ്പിൽ എവിടെയെങ്കിലുമൊക്കെ കപ്പച്ചെടികൾ സമൃദ്ധമായി വളർന്നു നിൽക്കാറുണ്ട്. കപ്പയ്ക്കാവിഭവങ്ങളോട് പണ്ട് അങ്ങേയറ്റത്തെ പ്രതിഷേധം രേഖപ്പെടുത്തിയിരുന്ന എന്റെ അനിയനിപ്പോൾ നാട്ടിലെത്തിയാൽ അമ്മയോട് അങ്ങോട്ട് ആവശ്യപ്പെട്ട് കപ്പയ്ക്കക്കൂട്ടാൻ ഉണ്ടാക്കിക്കും!! അന്നും ഇന്നും കപ്പയ്ക്കാ വിഭവങ്ങൾ എനിയ്ക്കു പ്രിയങ്കരം തന്നെ.
കപ്പയ്ക്കയും ചേമ്പും കൊണ്ട് ലളിതമായ ഒരു മൊളോഷ്യം ഇതാ:

ആവശ്യമുള്ള സാധനങ്ങൾ:

ഇടത്തരം വലുപ്പമുള്ള കപ്പയ്ക്ക - ഒന്ന്
ചേമ്പ് - ചെറുതാണെങ്കിൽ 5-6. (വലുപ്പമനുസരിച്ച് എണ്ണം കൂട്ടുകയോ കുറയ്ക്കുകയോ ചെയ്യുക.‌)
കാന്താരിമുളക് - ആവശ്യത്തിന്.
ഒരു ചെറിയ കഷ്ണം വാഴയില
മഞ്ഞൾപ്പൊടി,ഉപ്പ്,കറിവേപ്പില, വെളിച്ചെണ്ണ.





ഉണ്ടാക്കുന്ന വിധം:

ചേമ്പ് തൊലി കളഞ്ഞ് കുറച്ചു വലുപ്പമുള്ള കഷ്ണങ്ങളാക്കുക.



കപ്പയ്ക്കയും തൊലി കളഞ്ഞ് കഷ്ണങ്ങളാക്കിവച്ച ശേഷം, വാഴയില ഒന്നു ചെറുതായി വാട്ടിയെടുത്ത് അതിൽ കാന്താരിമുളക് (കിട്ടാനില്ലെങ്കിൽ പച്ചമുളക് ഉപയോഗിക്കാം.ഞാനും പച്ചമുളകാണ് എടുത്തിരിക്കുന്നത്) വച്ച് ഒരു ചെറിയ പൊതിയായി പൊതിഞ്ഞെടുത്ത് വാഴനാരുകൊണ്ട് കെട്ടുക.






കഷ്ണങ്ങളുടെ കൂടെ ഈ പൊതിയും,അവശ്യത്തിന് മഞ്ഞൾപ്പൊടിയും,ഉപ്പും ഇട്ട് വെള്ളവും ചേർത്ത് വേവിക്കുക.(കുക്കറിലാണ് വേവിക്കുന്നതെങ്കിൽ വേവ് അധികമാവാതെ ശ്രദ്ധിക്കണം.അല്ലെങ്കിൽ ചേമ്പ് വെന്തു കലങ്ങിപ്പോവും).

വെന്തുകഴിഞ്ഞാൽ ഇലപ്പൊതി തുറന്ന് മുളക് നന്നായി ഉടച്ച് കൂട്ടാനിൽ ചേർക്കുക. (ഇനി ഇല കളയാം കേട്ടോ).
ചേമ്പ് ഉടയാതെ കപ്പയ്ക്കാകഷ്ണങ്ങൾ ഒന്ന് ഉടച്ചുയോജിപ്പിക്കുക. തീ അണച്ചശേഷം വെളിച്ചെണ്ണ ഒഴിച്ച് കറിവേപ്പില ഇട്ട് കുറച്ചുനേരം അടച്ചുവയ്ക്കുക.

കപ്പയ്ക്ക മുളകു പൊതിഞ്ഞിട്ടത് ഇതാ:




കുറിപ്പ് : പഴയ രീതി അതേപടി എഴുതിയെന്നേ ഉള്ളൂ. വാഴയില കിട്ടാനില്ലാത്ത പക്ഷം മുളക് നേരിട്ട് കഷ്ണങ്ങളുടെ കൂടെ ഇട്ടും ഉണ്ടാക്കാം. പക്ഷേ, ഇലപ്പൊതിയിൽ ഇരുന്ന് വെന്ത മുളകിന്റെ രുചിയും വാഴയിലയുടെ മണവും കൂട്ടാനിൽ ചേരുമ്പോഴുള്ള രുചിഭേദം, അതു തന്നെയാണ് ഈ വിഭവത്തിന്റെ എടുത്തു പറയേണ്ട പ്രത്യേകത.

മൊളോഷ്യം

മൊളോഷ്യം/മുളകോഷ്യം എന്ന വാക്കുണ്ടായത് ‘മുളകുദൂഷ്യം’ എന്ന വാക്കിൽ നിന്നാണത്രേ. മുളക് ചീത്തയാണെന്നു അർത്ഥം! അതുകൊണ്ടുതന്നെ, എരിവ് തീരെ ഇല്ലാത്തതോ കുറവോ ആയതും, പുളി ഇല്ലാത്തതുമായ ഒരു പാവം കൂട്ടാനാണ് മൊളോഷ്യം.
പുരാതന കാലത്ത് എരിവ് ഇതിൽ തീരെ ഉപയോഗിച്ചിരുന്നില്ലെങ്കിലും പിന്നീട് ഒന്നു ‘ചൊടി’യാക്കാനായി കാന്തരിമുളകും മറ്റും ചേർത്തുതുടങ്ങി. വിധിയാംവണ്ണമുള്ള, ഏറ്റവും ലളിതമായ മോളോഷ്യം കുമ്പളങ്ങയും പരിപ്പും ചേർത്തുണ്ടാക്കുന്നതാണ്. പണ്ടത്തെ മൊളൊഷ്യങ്ങളിൽ തേങ്ങയും ചേർക്കുക പതിവില്ല. ഉണ്ടാക്കാൻ അത്ര എളുപ്പമാണെന്നർത്ഥം!.പക്ഷേ പിന്നീട് തേങ്ങ ചേർത്ത “തേങ്ങയരച്ചുമൊളോഷ്യം”,കടുകും മുളകും വറുത്തിട്ട “വറുത്തുമൊളോഷ്യം” എന്നിങ്ങനെ പല പരിഷ്കരിച്ച രൂപങ്ങളും നിലവിൽ വന്നു. ഇങ്ങനെ, കായ, ചേന, പിണ്ടി, പയർ, മുരിങ്ങാക്കായ തുടങ്ങി ചക്കയും ചക്കക്കുരും വരെയുള്ള പച്ചക്കറികൾ കൊണ്ട്, തേങ്ങയരച്ചും അരയ്ക്കാതെയുമുള്ള പലതരം മൊളോഷ്യങ്ങളുടെ നീണ്ട നിര തന്നെ ഈ അടുക്കളത്തളത്തിൽ എനിക്ക് വിളമ്പാനുണ്ട്...
ആദ്യം ഏറ്റവും ലളിതമായ രീതി തന്നെ പറയാം:

അവശ്യമുള്ള സാധങ്ങൾ :



കുമ്പളങ്ങയും മത്തങ്ങയും : ഓരോന്നും കാൽ കിലോയുടെ കഷ്ണം വീതം (അളവുകൾക്കൊന്നും വലിയ പ്രാധാന്യമില്ല.ഇതൊക്കെ ഒരു കൈക്കണക്ക് വച്ച് ഉണ്ടാക്കുന്നതാണ്. (മത്തങ്ങ നിർബ്ബന്ധമില്ല).
പരിപ്പ് : 100 ഗ്രാം.
മഞ്ഞൾപ്പൊടി
കാന്താരിമുളക്/പച്ചമുളക്, ഉപ്പ്: അവശ്യത്തിന്.
വെളിച്ചെണ്ണ, കറിവേപ്പില.

ഉണ്ടാക്കുന്ന വിധം:

കുമ്പളങ്ങയും മത്തങ്ങയും കഷ്ണങ്ങളാക്കി പരിപ്പും മഞ്ഞൾപ്പൊടിയും ചേർത്ത് കുക്കറിൽ വേവിക്കുക. അതിനുശേഷം ഉപ്പും ചേർത്ത് എല്ലാം കൂടി നന്നായി ഉടച്ചുയോജിപ്പിച്ച് ആവശ്യമെങ്കിൽ കുറച്ചുകൂടി വെള്ളവും ചേത്ത് ഒന്നു തിളപ്പിച്ചു വാങ്ങുക. ഈ ഘട്ടത്തിൽ ആവശ്യത്തിന് കാന്താരിമുളക്(ഇല്ലെങ്കിൽ പച്ചമുളക്) കീറിയതും ഇടുക. വെളിച്ചെണ്ണ ഒഴിച്ച് കറിവേപ്പിലയും ഇട്ട് ഇളക്കി ഉടനെ കുറച്ചുനേരം അടച്ചുവയ്ക്കുക.




കുറിപ്പ്:
1. ഇതു തന്നെ കുമ്പളങ്ങ മാത്രമായോ മത്തങ്ങ മാത്രമായോ ചേർത്ത് ഉണ്ടാക്കാവുന്നതാണ്.
2. നല്ല ഇളം കുമ്പളങ്ങയാണെങ്കിൽ കുരുവും അതിനോടു ചേർന്ന ഭാഗങ്ങളും കളയേണ്ടതില്ല.
3. ഇതേ കൂട്ടാനിൽ സ്വല്പം തേങ്ങയും കാന്താരിമുളകും കൂടി അരച്ചതു ചേത്താൽ വ്യത്യസ്തമായ രുചിയായി.
4. പരിപ്പിനുപകരം ചെറുപയർ ചേർത്താൽ മറ്റൊരു മൊളോഷ്യമായി.
5. ചോറിന് മാത്രമല്ല, കഞ്ഞിക്കും പറ്റിയതാണ് ഈ മൊളോഷ്യം. ദഹിക്കാൻ വളരെ എളുപ്പമായതിനാൽ പനി മുതലായ അസുഖമുള്ളപ്പോഴും കഴിയ്ക്കാം.
6. കടുമാങ്ങ, മാങ്ങാച്ചമ്മന്തി, ചുട്ടപപ്പടം ഇതൊക്കെയാണ് ഈ മൊളോഷ്യത്തിനു പറ്റിയ കൂട്ട്.