അടുക്കളത്തളം: ശർക്കരപ്പായസം

അടുക്കളച്ചൊല്ലുകള്‍.....

“അന്ന വിചാരം മുന്നവിചാരം, പിന്നെ വിചാരം കാര്യവിചാരം”
“ഉപ്പോളം വരുമോ ഉപ്പിലിട്ടത്”
“അരി വിതച്ചാൽ നെല്ലു വിളയാ”
“മുളയിലറിയാം വിള”
“ആര്യൻ വിതച്ചാൽ നവര വിളയുമോ?”
“നവര നട്ടാൽ തുവരയുണ്ടാകുമോ?”
“ഒരു വിത്ത് വിതച്ചാൽ പല വിത്ത് വിളയാ”
“കണ്ണൻ വാഴച്ചുവട്ടിൽ കദളിവാഴയുണ്ടാകുമോ?”
“അമരയും അപരാധവും കുറച്ചുമതി”
“ഉണ്ണാനില്ലാഞ്ഞാൽ വിത്ത്; ഉടുക്കാനില്ലാഞ്ഞാൽ പട്ട്”
“വിത്തുഗുണം പത്തുഗുണം”
“ചൊല്ല് പഴയതായാലും വിത്ത് പഴയതാവരുത്”
“വിശപ്പിനു രുചിയില്ല”
“തവിയറിയുമോ കറിയുടെ രസം?”
“കാന്താരിമുളകെന്തിനാ അധികം?”
“കർക്കിടകച്ചേന കട്ടിട്ടെങ്കിലും തിന്നണം”
“മെല്ലെത്തിന്നാൽ മുള്ളും തിന്നാം”
“പയ്യെത്തിന്നാൽ പനയും തിന്നാം”
“വിത്തെടുത്തുണ്ണരുത്”
“ഉണ്ടെങ്കിലോണം പോലെ ഇല്ലെങ്കിലേകാദശി”
“വെളുക്കുന്നതിനു മുൻപേ അരിവെയ്ക്കണം; അരിവെയ്ക്കുന്നതിനു മുൻപേ കറിവെയ്ക്കരുത്”
“വേണമെങ്കിൽ ചക്ക വേരിലും കായ്ക്കും!”
“എണ്ണിയ പയറ് അളക്കേണ്ട”
“മരത്തിന് കായ കനമല്ല”
“ഉരിനെല്ലൂരാൻ പോയിട്ട് പത്തുപറ നെല്ല് പന്നി തിന്നു”
“മക്കളെ കണ്ടും മാമ്പൂ കണ്ടും കൊതിക്കരുത്”
“ഉച്ചാറലുച്ചയ്ക്ക് വെള്ളാരി നട്ടാൽ വിഷു ഉച്ചയ്ക്ക് പറിക്കാം”
“കർക്കിടകത്തിൽ പത്തില കറിവെച്ചു കൂട്ടണം”
“കാണം വിറ്റും ഓണം ഉണ്ണണം”
“പത്തായം പട്ടിണി കിടക്കരുത്”
“നിലം നികത്തി വീടു വയ്ക്കരുത്”
“തൊഴുതുണ്ണുന്ന ചോറിനേക്കാ‍ൾ ഉഴുതുണ്ണുന്ന ചോറ്”
“വാഴ നനഞ്ഞാൽ ചീരയും നനയും”
“കയ്യാടിയാലേ വയറാടൂ”
“അവിയലിൽ ചേരാത്ത കഷ്ണമില്ല!”
“അണ്ടിയോടടുക്കുമ്പോഴറിയാം, മാങ്ങയുടെ പുളി!”
“അത്താഴമുണ്ടാൽ അരക്കാതം നടക്കണം, മുത്താഴമുണ്ടാൽ മുള്ളിലും കിടക്കണം”
“അധികം വിളഞ്ഞാൽ വിത്തിനും കൊള്ളാ”
“അധികമായാൽ അമൃതും വിഷം”
“അപ്പം തിന്നാൽ മതി; കുഴിയെണ്ണേണ്ട”
“അമ്മിയോടു ചോദിച്ചിട്ടാണോ അരയ്ക്കുന്നത്?”
“അരനാഴിയേ ഉള്ളെങ്കിലും അടുപ്പുകല്ലു മൂന്നു വേണം”
“അരിയെത്ര? പയറഞ്ഞാഴി”
“അഴകുള്ള ചക്കയിൽ ചുളയില്ല!”
“ആറ്റിൽ കളഞ്ഞാലും അളന്നു കളയണം”
“ഉണ്ട ചോറിൽ കല്ലിടരുത്”
“ഉണ്ടവന് പാ കിട്ടാഞ്ഞ്, ഉണ്ണാത്തവന് ഇല കിട്ടാഞ്ഞ്”
“ഉപ്പു തിന്നവൻ വെള്ളം കുടിക്കും”
“ഉള്ള കഞ്ഞിയിൽ പാറ്റ ഇടുക”
“എണ്ണിച്ചുട്ട അപ്പം പോലെ”
“എല്ലു മുറിയെ പണിതാൽ പല്ലു മുറിയേ തിന്നാം”
“കല്ലാടും മുറ്റത്ത് നെല്ലാടുകില്ല”
“കറിക്ക് ചേരാത്ത കഷ്ണം നുറുക്കരുത്”
“ചക്കയ്ക്ക് ചുക്ക്; മാങ്ങയ്ക്ക് തേങ്ങ”
“ഞാറുറച്ചാൽ ചോറുറച്ചു”
“തിന്ന ചോറിന് നന്ദി വേണം”
“മത്ത കുത്തിയാൽ കുമ്പളം മുളയ്ക്കുമോ?”
“പത്തായം പെറും, ചക്കി കുത്തും, അമ്മ വയ്ക്കും, ഞാനുണ്ണും”
“പന്തിയ്ക്കു മുമ്പും പടയ്ക്കു പിമ്പും ”
“പറ നിറയെ പതിരാണെങ്കിലും പാറ്റി നോക്കിയാൽ മണി കാണാം”
“ആലോലനീലമിഴിയാം പ്രിയയാൾ വിളമ്പും ഓലോലനൊന്നു മതി; എന്തിന്നു നൂറു കൂട്ടം?”

ശർക്കരയും ഉണക്കലരിയും ചേർന്ന ഈ പായസം ഉണ്ടാക്കാൻ അത്ര ബുദ്ധിമുട്ടൊന്നുമില്ല. നമുക്കൊന്ന് നോക്കാം:

ആവശ്യമുള്ള സാധനങ്ങൾ:

ശർക്കര :- അരക്കിലോ

ഉണക്കലരി :- 200 ഗ്രാം

തേങ്ങ ചെറുതായി നുറുക്കിയത് :- അര മുറി തേങ്ങയുടേത്.

അണ്ടിപ്പരിപ്പ്, മുന്തിരിങ്ങ : ആവശ്യത്തിന് (ഇതു രണ്ടും നിർബന്ധമില്ല. തേങ്ങ മാത്രമായാലും മതി).

നെയ്യ് :- വറുക്കാൻ ആവശ്യത്തിന്.

ഏലയ്ക്കാപ്പൊടി :- ഒന്നര ടീസ്പൂൺ

ഉണ്ടാക്കുന്ന വിധം:

ശർക്കര കുറച്ചു വെള്ളത്തിൽ ഉരുക്കി അരിച്ചുവയ്ക്കുക. (ഉരുകാനാവശ്യമുള്ളത്ര വെള്ളം എടുത്താൽ മതി. വെള്ളമധികമായാൽ പായസം തയ്യാറായിവരാൻ ഒരുപാട് സമയം എടുക്കും).

കട്ടിയുള്ള ഒരു പാത്രത്തിൽ ഉണക്കലരി വെള്ളമൊഴിച്ച് വേവിക്കുക. വെന്താൽ അതിലേക്ക് ശർക്കര ഉരുക്കിയത് ഒഴിയ്ക്കുക. അടിയിൽ പിടിയ്ക്കാതെ തുടർച്ചയായി ഇളക്കിക്കൊടുക്കുക. ഇളക്കാൻ ചട്ടുകമാണ് നല്ലത്.

കുറച്ചുനേരം കഴിഞ്ഞാൽ ചേരുവ കുറുകാൻ തുടങ്ങും. ഈ സമയത്ത് തീ നന്നായി കുറച്ചില്ലെങ്കിൽ പായസം മേലേയ്ക്ക് തെറിയ്ക്കാൻ സാധ്യതയുണ്ട്. ചട്ടുകത്തിൽ നിന്ന് സാവധാനം മാത്രം താഴേയ്ക്ക് വീഴുന്ന പരുവത്തിൽ ഏലയ്ക്കാപ്പൊടിയും ചേർത്ത് വാങ്ങുക. പാകം കൂടിപ്പോയാൽ പായസം വല്ലാതെ കട്ടിയായിപ്പോവും.

നെയ്യിൽ തേങ്ങ,അണ്ടിപ്പരിപ്പ്,മുന്തിരിങ്ങ എന്നിവ വറുത്തതും, വറുക്കാനുപയോഗിച്ച നെയ്യ് ബാക്കിയുള്ളതും കൂടി ചേർത്ത് ഇളക്കിയാൽ പായസം റെഡി!

ഈ ബ്ലോഗിനേക്കുറിച്ച്...

ഒരു പാചകവിദഗ്ദ്ധയാണെന്ന അവകാശവാദമൊന്നും ഇല്ല കേട്ടോ.. എനിയ്ക്കറിയാവുന്ന ചിലത് നിങ്ങളുമായി പങ്കുവയ്ക്കുന്നു എന്നുമാത്രം.
പണ്ടത്തെ തനതു വിഭവങ്ങളെ അതേപടി, അതേ പേരുകളോടെ‍ തന്നെയാണ് ഇവിടെ പരിചയപ്പെടുത്തുന്നത്. പേരുകള്‍ക്കോ, ഉണ്ടാക്കുന്ന രീതികള്‍ക്കോ പ്രാദേശികമായ വ്യത്യാസങ്ങളുണ്ടാകുമല്ലോ. അതേക്കുറിച്ചുള്ള അന്വേഷണം കൂടിയാണ് ഓരോ കുറിപ്പും. നിങ്ങൾക്കറിയാവുന്നത് പറയുമല്ലോ..?
ഇതിൽ പറയുന്ന കുറിപ്പുകളിൽ ഏതെങ്കിലും നിങ്ങൾക്ക് ഇഷ്ടപ്പെട്ടുവെങ്കിൽ, ഉപകാരപ്രദമായെങ്കിൽ, അതിന് ഞാൻ കടപ്പെട്ടിരിക്കുന്നത് അടുക്കളയെന്ന ലോകം നന്നായറിഞ്ഞു വളർന്ന സാഹചര്യങ്ങളോടും എന്റെ അമ്മയോടുമാണ്.

17 പേർ അഭിപ്രായമറിയിച്ചു:

ബിന്ദു കെ പി said...: ശർക്കരയും ഉണക്കലരിയും ചേർന്ന ഈ പായസം ഉണ്ടാക്കാൻ അത്ര ബുദ്ധിമുട്ടൊന്നുമില്ല.; March 12, 2009 at 8:34 AM
мanιккuттan said...: അയ്യോ...ഇതല്ലേ അമ്പലത്തിലൊക്കെ ഉണ്ടാക്കുന്ന പായസം. ദിവസവും ഇത് കഴിച്ചാ ഞാന്‍ വളര്‍ന്നത് ... :D; March 12, 2009 at 9:23 AM
ശ്രീ said...: ഹായ്... അമ്പലത്തില്‍ നിന്നും കിട്ടാറുള്ള അതേ പായസം...
:); March 12, 2009 at 10:41 AM
ഹന്‍ല്ലലത്ത് Hanllalath said...: ഇത് ഞങ്ങളുടെ നാട്ടില്‍ ശര്‍ക്കരച്ചോറെന്നാ അറിയപ്പെടുന്നത് ..
വെറുതെ പ്രവാസികളെ കൊതിപ്പിക്കാനായി ഓരോരുത്തര്‍ ഇറങ്ങി പ്പുറപ്പെട്ടിരിക്കുന്നു..!
:) :) :) :) :) :); March 12, 2009 at 10:53 AM
ജെസ്സ് said...: ee unakkalari ennu vachchaal sharikkum enthaanu?? choru vaykkunna athE ariyaaNo? (choodaavalle.. enikkariyillaanjittaa..); March 12, 2009 at 11:38 AM
പാറുക്കുട്ടി said...: എന്റെ ബിന്ദുവേ,

ഈ പ്രവാസിയെ ഇങ്ങനെ കൊതിപ്പിക്കാതെ.; March 12, 2009 at 12:37 PM
Bindhu Unny said...: ഉണക്കലരി അന്വേഷിക്കട്ടെ. കിട്ടിയാല്‍ ഈ പായസം ഉണ്ടാക്കണം. :-); March 12, 2009 at 1:50 PM
മേരിക്കുട്ടി(Marykutty) said...: കൊതി വരുന്നു..
എനിക്ക് പനി വരുമ്പോള്‍ കഴിക്കാന്‍ കൊണ്ട് വന്ന നുറുക്കരി ഉണ്ട്..അത് വച്ച് ഉണ്ടാക്കി നോക്കാം..നാളെ weekend അല്ലേ!; March 13, 2009 at 9:38 AM
Typist | എഴുത്തുകാരി said...: അമ്പലം അടുത്തായതുകൊണ്ട് മിക്കവാറുമൊക്കെ പായസം കിട്ടും. എന്നാലും ഇതു കാണുമ്പോള്‍ കൊതിയാവുന്നു.

അതിലിത്തിരി കദളിപ്പഴം ഉണ്ടെങ്കില്‍ ചെറുതായി നുറുക്കിയിട്ടാല്‍ ഭയങ്കര രസായിരിക്കും.; March 17, 2009 at 11:34 AM
ജെസ്സ് said...: sorry. ariyude link pinna kandath; March 17, 2009 at 12:20 PM
poor-me/പാവം-ഞാന്‍ said...: കുടിക്കുവാന്‍ ബുദ്ധി മുട്ടുണ്ടോയെന്നു ലേഖനത്തില്‍ പ്രതിപാതിച്ചു കണ്ടില്ല; March 22, 2009 at 5:21 PM
smitha adharsh said...: കൊതി തോന്നി...ചിത്രം സഹിതം കണ്ടപ്പോള്‍..ഉണ്ടാക്കി നോക്കാം അടുത്ത് തന്നെ...; March 25, 2009 at 5:24 PM
ജെ പി വെട്ടിയാട്ടില്‍ said...: ശര്‍ക്കരപായസം കണ്ട് കൊതിയാവണേ.. ഇനി അബുദാബിയിലേക്കൊന്നും തിരിച്ച് പോകേണ്ട. ഇവിടെ ഞങ്ങളുടെ തേവര്‍ക്കും ഈ അങ്കിളിനും ശര്‍ക്കര പായസം വെച്ച് തന്നോളൂ...
ഉദ്ദിഷ്ടകാര്യ ഫലസിദ്ധിക്ക് ഞങ്ങള്‍ക്ക് അന്നദാനം നടത്തിയാല്‍ മതി.
പിന്നെ ഇപ്പോ എവിടെയാ. പല തവണ വിളിച്ചിരുന്നു. പൂത്തോളിലെ വീട്ടില്‍ വരുമ്പോള്‍ കാണാമെന്നും പറഞ്ഞിരുന്നു. വന്നില്ല..
ഇനി തിരിച്ച് പോയോ എന്നും അറിയില്ല..
പ്ലീസ് കോള്‍ മി........; April 1, 2009 at 11:32 AM
siva // ശിവ said...: നന്ദി ഈ പാചകക്കുറിപ്പിനും....ഇതു കാണുമ്പോള്‍ ഇതൊക്കെ ഉണ്ടാക്കിക്കഴിക്കാന്‍ തോന്നുന്നു....; April 13, 2009 at 8:06 PM
മാണിക്യം said...: ഹായ്!
ബിന്ദൂ ഇതല്ലെ നെയ്പായസം എന്നും പറയുന്നത്.
നല്ല സ്വാദാണ്. ഞാന്‍ വിഷുവിനു ഇതു തന്നെയുണ്ടാക്കും.... ഓര്‍മ്മിപ്പിച്ചതിനു നന്ദി.; April 14, 2009 at 12:48 AM
ജെ പി വെട്ടിയാട്ടില്‍ said...: kadumaangayude intimation vannu.
pakshe page kaanaanillallo???????????; April 15, 2009 at 10:26 PM
ചേച്ചിപ്പെണ്ണ്‍ said...: ഇത് അരവണ പ്പയാസം അല്ലെ ബിന്ദുവേ...ഞാന്‍ ഒരു ദിവസം ഉണ്ടാക്കി നോക്കിയതാ
വന്‍ ഫ്ലോപ്പായിരുന്നു ശര്‍ക്കര മുറുകി പായസം സോളിഡ് സ്റ്റേറ്റ് ഇല്‍ ആയിപ്പോയ് ..
പിന്നെ അത് കുത്തി യിളക്കി അവല്‍ വിളയിച്ചു.....; December 31, 2009 at 2:24 PM

ഞാന്‍.....

അടുക്കളച്ചൊല്ലുകള്‍.....

വിഭാഗങ്ങള്‍:

ഊണിനു സമയമായോ......?

മലയാളം ബ്ലോഗുകള്‍ ലിസ്റ്റ് ചെയ്യപ്പെടുന്ന ഇടങ്ങള്‍:

ശർക്കരപ്പായസം

17 പേർ അഭിപ്രായമറിയിച്ചു:

ഈ ബ്ലോഗിനേക്കുറിച്ച്...

എന്റെ മറ്റു ബ്ലോഗുകള്‍:

ഇപ്പോള്‍ വിരുന്നിനെത്തിവര്‍:

ഇതുവരെ സ്വാദു നോക്കിയവർ

Followers

പ്രധാന ബ്ലോഗിംഗ് സഹായികള്‍: