അടുക്കളത്തളം

അടുക്കളച്ചൊല്ലുകൾ.....

“അന്ന വിചാരം മുന്നവിചാരം, പിന്നെ വിചാരം കാര്യവിചാരം”
“ഉപ്പോളം വരുമോ ഉപ്പിലിട്ടത്”
“വിശപ്പിനു രുചിയില്ല”
“തവിയറിയുമോ കറിയുടെ രസം?”
“കാന്താരിമുളകെന്തിനാ അധികം?”
“കർക്കിടകച്ചേന കട്ടിട്ടെങ്കിലും തിന്നണം”
“മെല്ലെത്തിന്നാൽ മുള്ളും തിന്നാം”
“പയ്യെത്തിന്നാൽ പനയും തിന്നാം”
“വിത്തെടുത്തുണ്ണരുത്”
“ഉണ്ടെങ്കിലോണം പോലെ ഇല്ലെങ്കിലേകാദശി”
“അവിയലിൽ ചേരാത്ത കഷ്ണമില്ല!”
“അണ്ടിയോടടുക്കുമ്പോഴറിയാം, മാങ്ങയുടെ പുളി!”
“അത്താഴമുണ്ടാൽ അരക്കാതം നടക്കണം, മുത്താഴമുണ്ടാൽ മുള്ളിലും കിടക്കണം”
“അധികം വിളഞ്ഞാൽ വിത്തിനും കൊള്ളാ”
“അധികമായാൽ അമൃതും വിഷം”
“അപ്പം തിന്നാൽ മതി; കുഴിയെണ്ണേണ്ട”
“അമ്മിയോടു ചോദിച്ചിട്ടാണോ അരയ്ക്കുന്നത്?”
“അരനാഴിയേ ഉള്ളെങ്കിലും അടുപ്പുകല്ലു മൂന്നു വേണം”
“അരിയെത്ര? പയറഞ്ഞാഴി”
“അഴകുള്ള ചക്കയിൽ ചുളയില്ല!”
“ആറ്റിൽ കളഞ്ഞാലും അളന്നു കളയണം”
“ഉണ്ട ചോറിൽ കല്ലിടരുത്”
“ഉണ്ടവന് പാ കിട്ടാഞ്ഞ്, ഉണ്ണാത്തവന് ഇല കിട്ടാഞ്ഞ്”
“ഉപ്പു തിന്നവൻ വെള്ളം കുടിക്കും”
“ഉള്ള കഞ്ഞിയിൽ പാറ്റ ഇടുക”
“എണ്ണിച്ചുട്ട അപ്പം പോലെ”
“എല്ലു മുറിയെ പണിതാൽ പല്ലു മുറിയേ തിന്നാം”
“കല്ലാടും മുറ്റത്ത് നെല്ലാടുകില്ല”
“കറിക്ക് ചേരാത്ത കഷ്ണം നുറുക്കരുത്”
“ചക്കയ്ക്ക് ചുക്ക്; മാങ്ങയ്ക്ക് തേങ്ങ”
“ഞാറുറച്ചാൽ ചോറുറച്ചു”
“തിന്ന ചോറിന് നന്ദി വേണം”
“മത്ത കുത്തിയാൽ കുമ്പളം മുളയ്ക്കുമോ?”
“പത്തായം പെറും, ചക്കി കുത്തും, അമ്മ വയ്ക്കും, ഞാനുണ്ണും”
“പന്തിയ്ക്കു മുമ്പും പടയ്ക്കു പിമ്പും ”
“പറ നിറയെ പതിരാണെങ്കിലും പാറ്റി നോക്കിയാൽ മണി കാണാം”
“ആലോലനീലമിഴിയാം പ്രിയയാൾ വിളമ്പും ഓലോലനൊന്നു മതി; എന്തിന്നു നൂറു കൂട്ടം?”

ഓറഞ്ചിന്റെ സീസണല്ലേ ഇപ്പോൾ? ഓറഞ്ചുകൊണ്ട് ഒരു സ്ക്വാഷുണ്ടാക്കിയാലോ? വളരെ രുചികരമാണിത്. ശ്രമിച്ചു നോക്കൂ....

ആവശ്യമുള്ള സാധനങ്ങൾ:

നല്ല പഴുത്ത ഓറഞ്ച് - 5
പഞ്ചസാര - മുക്കാൽ കിലോ
വെള്ളം - മുക്കാൽ ലിറ്റർ
സിട്രിക്ക് ആസിഡ് ക്രിസ്റ്റൽ‌സ് - ഒന്നര ടീസ്പൂൺ (സൂപ്പർമാർക്കറ്റുകളിൽ കിട്ടും)
ചെറുനാരങ്ങാനീര് - ഒന്നര ചെറുനാരങ്ങയുടേത്

ഉണ്ടാക്കുന്ന വിധം:

പഞ്ചസാരയും വെള്ളവും സിട്രിക്ക് ആസിഡും കൂടി അടുപ്പത്തു വച്ച് തിളപ്പിച്ചശേഷം തണുക്കാൻ വയ്ക്കുക.

ഓറഞ്ചിന്റെ അല്ലികൾ കുരുവും പാടയും നീക്കി വൃത്തിയാക്കിയെടുക്കുക. കുറച്ചു മിനക്കെട്ട പണിയാണിത്. ഓറഞ്ച് ഫ്രിഡ്ജിൽ വച്ചു നന്നായി തണുപ്പിച്ചതിനുശേഷമാണെങ്കിൽ ഈ പണി കുറച്ചുകൂടി എളുപ്പമാവും. രണ്ട് ഓറഞ്ചിന്റെ തൊലി മാറ്റി വയ്ക്കുക.

മാറ്റിവച്ച ഓറഞ്ചുതൊലിയുടെ അകത്തെ വെളുത്ത ഭാഗം ചുരണ്ടിക്കളഞ്ഞെടുക്കുക. ദാ, ഇതുപോലെ:

ഈ ഓറഞ്ചുതൊലി നികക്കെ വെള്ളമൊഴിച്ച് നന്നായി തിളപ്പിച്ചശേഷം വെള്ളം ഊറ്റിക്കളഞ്ഞുവയ്ക്കുക.

അല്ലികളും തൊലിയും കൂടി മിക്സിയിലിട്ട് നന്നായി അടിച്ചെടുക്കുക.

നേരത്തേ തയ്യാറാക്കിവച്ചിരിക്കുന്ന പഞ്ചസാരപ്പാനിയിലേക്ക് ഈ ജ്യൂസും ചെറുനാരങ്ങാനീരും ചേർത്ത് നന്നായി യോജിപ്പിച്ചശേഷം അരിച്ചെടുക്കുക. സ്ക്വാഷ് തയ്യാറായിക്കഴിഞ്ഞു. ഇനി കുപ്പിയിലേക്ക് പകർത്തിവയ്ക്കാം. ഈ അളവിലുണ്ടാക്കുന്ന സ്ക്വാഷ് ഏകദേശം ഒന്നര ലിറ്റർ ഉണ്ടാവും. കേടാവാതിരിക്കാൻ ഒന്നുകിൽ ഫ്രിഡ്ജിൽ സൂക്ഷിക്കുക, അല്ലെങ്കിൽ പ്രിസർവേറ്റീവ് ചേർക്കുക (ഞാൻ ചേർക്കാറില്ല). സോഡിയം ബെൻസോയേറ്റ്, പൊട്ടാസ്യം മെറ്റാബൈ സൾഫേറ്റ് എന്നിവയാണ് സാധാരണ ചേർക്കുന്ന പ്രിസർവേറ്റീവ്സ് (സൂപ്പർ മാർക്കറ്റുകളിൽ കിട്ടും). ഏകദേശം രണ്ടുനുള്ളു ചേർത്താൽ മതിയാവും. അര ടീസ്പൂൺ ഫുഡ് കളർ (ഓറഞ്ച്-റെഡ്) ചേർത്താൽ നിറം കുറച്ചുകൂടി ആകർഷകമാക്കാം. ഞാൻ ചേർത്തിട്ടില്ല കേട്ടോ.

സ്ക്വാഷ് പാകത്തിന് വെള്ളം ചേർത്ത് നേർപ്പിച്ചു കഴിക്കാം. പഞ്ചസാര ചേർക്കേണ്ട ആവശ്യമില്ല. വെള്ളവും സ്ക്വാഷും യഥാക്രമം 3:1 എന്ന അനുപാതത്തിൽ ചേർക്കുക. അതായത് ഒരു ഗ്ലാസ് പാനീയം തയ്യാറാക്കുവാൻ കാൽ ഗ്ലാസ് സ്ക്വാഷ് മതിയാവുമെന്നർത്ഥം.

ചിയേഴ്സ്!!!!

ഈ ബ്ലോഗിനേക്കുറിച്ച്...

ഒരു പാചകവിദഗ്ദ്ധയാണെന്ന അവകാശവാദമൊന്നും ഇല്ല കേട്ടോ.. എനിയ്ക്കറിയാവുന്ന ചിലത് നിങ്ങളുമായി പങ്കുവയ്ക്കുന്നു എന്നുമാത്രം.
പണ്ടത്തെ തനതു വിഭവങ്ങളെ അതേപടി, അതേ പേരുകളോടെ‍ തന്നെയാണ് ഇവിടെ പരിചയപ്പെടുത്തുന്നത്. പേരുകള്‍ക്കോ, ഉണ്ടാക്കുന്ന രീതികള്‍ക്കോ പ്രാദേശികമായ വ്യത്യാസങ്ങളുണ്ടാകുമല്ലോ. അതേക്കുറിച്ചുള്ള അന്വേഷണം കൂടിയാണ് ഓരോ കുറിപ്പും. നിങ്ങൾക്കറിയാവുന്നത് പറയുമല്ലോ..?
ഇതിൽ പറയുന്ന കുറിപ്പുകളിൽ ഏതെങ്കിലും നിങ്ങൾക്ക് ഇഷ്ടപ്പെട്ടുവെങ്കിൽ, ഉപകാരപ്രദമായെങ്കിൽ, അതിന് ഞാൻ കടപ്പെട്ടിരിക്കുന്നത് അടുക്കളയെന്ന ലോകം നന്നായറിഞ്ഞു വളർന്ന സാഹചര്യങ്ങളോടും എന്റെ അമ്മയോടുമാണ്.

കേരളത്തെ രക്ഷിക്കാനുള്ള ഈ എളിയ സംരംഭത്തിൽ പങ്കാളികളാവൂ.....

ഞാൻ.....

അടുക്കളച്ചൊല്ലുകൾ.....

വിഭാഗങ്ങൾ:

വിഭവങ്ങൾ നിങ്ങളുടെ ഇൻബോക്സിലേയ്ക്ക് പാഴ്സൽ ചെയ്യണോ?

ഊണിനു സമയമായോ......?

മലയാളം ബ്ലോഗുകൾ ലിസ്റ്റ് ചെയ്യപ്പെടുന്ന ഇടങ്ങൾ:

ഓറഞ്ച് സ്ക്വാഷ്

ഈ ബ്ലോഗിനേക്കുറിച്ച്...

എന്റെ മറ്റു രണ്ടു ബ്ലോഗുകൾ:

ഇതുവരെ ഇവിടെ വിളമ്പിയത്:

ഇപ്പോൾ വിരുന്നിനെത്തിവർ:

ഇതുവരെ സ്വാദു നോക്കിയവർ:

പ്രധാന ബ്ലോഗിംഗ് സഹായികൾ: