അടുക്കളത്തളം: റവ ഇഡ്ഡലി

അടുക്കളച്ചൊല്ലുകള്‍.....

“അന്ന വിചാരം മുന്നവിചാരം, പിന്നെ വിചാരം കാര്യവിചാരം”
“ഉപ്പോളം വരുമോ ഉപ്പിലിട്ടത്”
“അരി വിതച്ചാൽ നെല്ലു വിളയാ”
“മുളയിലറിയാം വിള”
“ആര്യൻ വിതച്ചാൽ നവര വിളയുമോ?”
“നവര നട്ടാൽ തുവരയുണ്ടാകുമോ?”
“ഒരു വിത്ത് വിതച്ചാൽ പല വിത്ത് വിളയാ”
“കണ്ണൻ വാഴച്ചുവട്ടിൽ കദളിവാഴയുണ്ടാകുമോ?”
“അമരയും അപരാധവും കുറച്ചുമതി”
“ഉണ്ണാനില്ലാഞ്ഞാൽ വിത്ത്; ഉടുക്കാനില്ലാഞ്ഞാൽ പട്ട്”
“വിത്തുഗുണം പത്തുഗുണം”
“ചൊല്ല് പഴയതായാലും വിത്ത് പഴയതാവരുത്”
“വിശപ്പിനു രുചിയില്ല”
“തവിയറിയുമോ കറിയുടെ രസം?”
“കാന്താരിമുളകെന്തിനാ അധികം?”
“കർക്കിടകച്ചേന കട്ടിട്ടെങ്കിലും തിന്നണം”
“മെല്ലെത്തിന്നാൽ മുള്ളും തിന്നാം”
“പയ്യെത്തിന്നാൽ പനയും തിന്നാം”
“വിത്തെടുത്തുണ്ണരുത്”
“ഉണ്ടെങ്കിലോണം പോലെ ഇല്ലെങ്കിലേകാദശി”
“വെളുക്കുന്നതിനു മുൻപേ അരിവെയ്ക്കണം; അരിവെയ്ക്കുന്നതിനു മുൻപേ കറിവെയ്ക്കരുത്”
“വേണമെങ്കിൽ ചക്ക വേരിലും കായ്ക്കും!”
“എണ്ണിയ പയറ് അളക്കേണ്ട”
“മരത്തിന് കായ കനമല്ല”
“ഉരിനെല്ലൂരാൻ പോയിട്ട് പത്തുപറ നെല്ല് പന്നി തിന്നു”
“മക്കളെ കണ്ടും മാമ്പൂ കണ്ടും കൊതിക്കരുത്”
“ഉച്ചാറലുച്ചയ്ക്ക് വെള്ളാരി നട്ടാൽ വിഷു ഉച്ചയ്ക്ക് പറിക്കാം”
“കർക്കിടകത്തിൽ പത്തില കറിവെച്ചു കൂട്ടണം”
“കാണം വിറ്റും ഓണം ഉണ്ണണം”
“പത്തായം പട്ടിണി കിടക്കരുത്”
“നിലം നികത്തി വീടു വയ്ക്കരുത്”
“തൊഴുതുണ്ണുന്ന ചോറിനേക്കാ‍ൾ ഉഴുതുണ്ണുന്ന ചോറ്”
“വാഴ നനഞ്ഞാൽ ചീരയും നനയും”
“കയ്യാടിയാലേ വയറാടൂ”
“അവിയലിൽ ചേരാത്ത കഷ്ണമില്ല!”
“അണ്ടിയോടടുക്കുമ്പോഴറിയാം, മാങ്ങയുടെ പുളി!”
“അത്താഴമുണ്ടാൽ അരക്കാതം നടക്കണം, മുത്താഴമുണ്ടാൽ മുള്ളിലും കിടക്കണം”
“അധികം വിളഞ്ഞാൽ വിത്തിനും കൊള്ളാ”
“അധികമായാൽ അമൃതും വിഷം”
“അപ്പം തിന്നാൽ മതി; കുഴിയെണ്ണേണ്ട”
“അമ്മിയോടു ചോദിച്ചിട്ടാണോ അരയ്ക്കുന്നത്?”
“അരനാഴിയേ ഉള്ളെങ്കിലും അടുപ്പുകല്ലു മൂന്നു വേണം”
“അരിയെത്ര? പയറഞ്ഞാഴി”
“അഴകുള്ള ചക്കയിൽ ചുളയില്ല!”
“ആറ്റിൽ കളഞ്ഞാലും അളന്നു കളയണം”
“ഉണ്ട ചോറിൽ കല്ലിടരുത്”
“ഉണ്ടവന് പാ കിട്ടാഞ്ഞ്, ഉണ്ണാത്തവന് ഇല കിട്ടാഞ്ഞ്”
“ഉപ്പു തിന്നവൻ വെള്ളം കുടിക്കും”
“ഉള്ള കഞ്ഞിയിൽ പാറ്റ ഇടുക”
“എണ്ണിച്ചുട്ട അപ്പം പോലെ”
“എല്ലു മുറിയെ പണിതാൽ പല്ലു മുറിയേ തിന്നാം”
“കല്ലാടും മുറ്റത്ത് നെല്ലാടുകില്ല”
“കറിക്ക് ചേരാത്ത കഷ്ണം നുറുക്കരുത്”
“ചക്കയ്ക്ക് ചുക്ക്; മാങ്ങയ്ക്ക് തേങ്ങ”
“ഞാറുറച്ചാൽ ചോറുറച്ചു”
“തിന്ന ചോറിന് നന്ദി വേണം”
“മത്ത കുത്തിയാൽ കുമ്പളം മുളയ്ക്കുമോ?”
“പത്തായം പെറും, ചക്കി കുത്തും, അമ്മ വയ്ക്കും, ഞാനുണ്ണും”
“പന്തിയ്ക്കു മുമ്പും പടയ്ക്കു പിമ്പും ”
“പറ നിറയെ പതിരാണെങ്കിലും പാറ്റി നോക്കിയാൽ മണി കാണാം”
“ആലോലനീലമിഴിയാം പ്രിയയാൾ വിളമ്പും ഓലോലനൊന്നു മതി; എന്തിന്നു നൂറു കൂട്ടം?”

റവ കൊണ്ട് ഇഡ്ഡലി ഉണ്ടാക്കാൻ വളരെ എളുപ്പമാണ്. അരയ്ക്കാനും പൊടിക്കാനുമൊന്നും മെനക്കെടേണ്ട. പെട്ടെന്നു കഴിയും പണി.
എങ്ങിനെയെന്നു പറയാം:

ആവശ്യമുള്ള സാധനങ്ങൾ

റവ - 1 ഗ്ലാസ്
അധികം പുളിയില്ലാത്ത തൈര് - ഏകദേശം അര ഗ്ലാസ്
ഈനോ - ഒരു സ്പൂൺ
ചെറുനാരങ്ങാ നീര് - അര സ്പൂൺ
ഇഞ്ചി പൊടിയായി അരിഞ്ഞത് - അര സ്പൂൺ
പച്ചമുളക് - 2
കുറച്ച് കറിവേപ്പില, മല്ലിയില
വെള്ളം, ഉപ്പ് - ആവശ്യത്തിന്

വറുത്തിടാൻ:
കടുക്, കടലപ്പരിപ്പ്, ഉഴുന്നുപരിപ്പ്, കശുവണ്ടിപ്പരിപ്പ് അരിഞ്ഞത്, നെയ്യ്

ഉണ്ടാക്കുന്ന വിധം:

ഒരു ചീനച്ചട്ടിയിൽ നെയ്യൊഴിച്ച് (നെയ്യ് ഇഷ്ടമല്ലെങ്കിൽ എണ്ണ ഒഴിച്ചാലും മതി) ആദ്യം കടുക് പൊട്ടിക്കുക. അതിനുശേഷം ഉഴുന്നുപരിപ്പും കടലപ്പരിപ്പും കഴുവണ്ടിയും ചേർത്ത് വറുക്കുക.

ഇതിലേക്ക് പച്ചമുളകും ഇഞ്ചിയും അരിഞ്ഞത് ചേർത്ത് വഴറ്റിയശേഷം റവ ചേർത്ത് വറുക്കുക. തീ കുറച്ചു വച്ചാൽ മതി. ഇതോടൊപ്പം കുറച്ചു കറിവേപ്പിലയും മല്ലിയിലയും അരിഞ്ഞതു കൂടി ചേർത്ത് ഇളക്കുക.

റവ മൂത്താൽ ഇറക്കിവയ്ക്കുക. നന്നായി ആറിയശേഷം തൈരും ഉപ്പും ചെറുനാരങ്ങാനീരും ചേർക്കുക. പുളിപ്പ് ആവശ്യമുള്ളത്ര തൈര് ചേർത്താൽ മതി.

അതിനുശേഷം ആവശ്യത്തിന് വെള്ളവും ചേർത്ത് ഇഡ്ഡലിമാവിന്റെ പരുവത്തിൽ കലക്കുക.

ഇനി അവസാനമായി ഈനോ ചേർക്കണം. അതിനുമുമ്പ് ഇഡ്ഡലിപ്പാത്രം വെള്ളമൊഴിച്ച് അടുപ്പത്തു വയ്ക്കുക. അതവിടെ ഇരുന്ന് ചൂടാവട്ടെ. ഇഡ്ഡലിത്തട്ടുകൾ റെഡിയാക്കി അടുത്തുവച്ചശേഷം ഈനോ ചേർത്ത് ഒന്നിളക്കുക. കൂടുതൽ ഇളക്കണ്ട. (ഈനോ ചേർക്കുമ്പോൾ തന്നെ മാവിൽ സോപ്പുപത പോലെ ഉണ്ടാവും. അങ്ങനെ ഉണ്ടായില്ലെങ്കിൽ ഈനോ പഴയതോ കേടായതോ ആയിരിക്കും). ഇനി ഒട്ടും ആലോചിച്ചു നിൽക്കാതെ മാവ് ഇഡ്ഡലിത്തട്ടിന്റെ കുഴികളിലേക്ക് ഒഴിക്കുക, ഉടനെതന്നെ വേവിക്കാൻ വയ്ക്കുക. (ഈനോയുടെ പത അടങ്ങുന്നതിനുമുമ്പുതന്നെ മാവ് വേവിക്കാൻ വയ്ക്കണം. അതുമിതും അന്വേഷിച്ച് സമയം കളയാതിരിക്കാനാണ് എല്ലാം നേരത്തേ തയ്യാറാക്കിവയ്ക്കാൻ പറയുന്നത്).

റവ ഇഡ്ഡലി പെട്ടെന്നുതന്നെ വെന്തു കിട്ടും:

ചൂടോടെ കഴിക്കുക. തണുത്താൽ കൊള്ളില്ല.

ഇതിന് കൂട്ടിക്കഴിക്കുവാൻ എനിക്കിഷ്ടമുള്ള ഒരു ചട്ണി പറയാം:
കുറച്ചു തേങ്ങയുടെ കൂടെ മല്ലിയിലയും പച്ചമുളകും സ്വല്പം ഇഞ്ചിയും ഒരു ചുള വെളുത്തുള്ളിയും ചേർത്ത് വെണ്ണപോലെ അരച്ചശേഷം അത് ഒട്ടും പുളിയില്ലാത്ത കട്ടത്തൈരിൽ ചേർത്ത് യോജിപ്പിക്കുക. പാകത്തിന് ഉപ്പും ചേർത്തിളക്കുക.

ഞാൻ പറഞ്ഞൂന്നേയുള്ളു. നിങ്ങൾ നിങ്ങൾക്കിഷ്ടമുള്ള ചട്ണിയോ ചമ്മന്തിയോ കൂട്ടി കഴിക്കൂ....

ഈ ബ്ലോഗിനേക്കുറിച്ച്...

ഒരു പാചകവിദഗ്ദ്ധയാണെന്ന അവകാശവാദമൊന്നും ഇല്ല കേട്ടോ.. എനിയ്ക്കറിയാവുന്ന ചിലത് നിങ്ങളുമായി പങ്കുവയ്ക്കുന്നു എന്നുമാത്രം.
പണ്ടത്തെ തനതു വിഭവങ്ങളെ അതേപടി, അതേ പേരുകളോടെ‍ തന്നെയാണ് ഇവിടെ പരിചയപ്പെടുത്തുന്നത്. പേരുകള്‍ക്കോ, ഉണ്ടാക്കുന്ന രീതികള്‍ക്കോ പ്രാദേശികമായ വ്യത്യാസങ്ങളുണ്ടാകുമല്ലോ. അതേക്കുറിച്ചുള്ള അന്വേഷണം കൂടിയാണ് ഓരോ കുറിപ്പും. നിങ്ങൾക്കറിയാവുന്നത് പറയുമല്ലോ..?
ഇതിൽ പറയുന്ന കുറിപ്പുകളിൽ ഏതെങ്കിലും നിങ്ങൾക്ക് ഇഷ്ടപ്പെട്ടുവെങ്കിൽ, ഉപകാരപ്രദമായെങ്കിൽ, അതിന് ഞാൻ കടപ്പെട്ടിരിക്കുന്നത് അടുക്കളയെന്ന ലോകം നന്നായറിഞ്ഞു വളർന്ന സാഹചര്യങ്ങളോടും എന്റെ അമ്മയോടുമാണ്.

4 പേർ അഭിപ്രായമറിയിച്ചു:

റോസാപ്പൂക്കള്‍ said...: നല്ല കുറിപ്പ്. നന്ദി; October 11, 2013 at 5:12 PM
പഞ്ചാക്ഷരി said...: റവ കൊണ്ട് ഉപ്പുമാവ് & സ്വീറ്റ് ഇടലി മാത്രേ വീട്ടില് ഉണ്ടാക്കു , ഇനി ഇതൊന്നു ട്രൈ ചെയ്തു നോക്കണം . താങ്ക്സ് ചേച്ചി
പിന്നെ ഒരു സംശയം ചേച്ചി , ഈനോ എന്താ സാധനം ??; October 15, 2013 at 11:23 AM
ബിന്ദു കെ പി said...: @ വിബിത: ഈനോന്ന് പറേണത് അസിഡിറ്റിയ്ക്ക് വെള്ളത്തിൽ കലക്കി കുടിക്കുന്ന ഒരു പൊടിയാണ്. മെഡിക്കൽ ഷോപ്പുകളിൽ കിട്ടും.
http://en.wikipedia.org/wiki/Eno_%28drug%29; October 17, 2013 at 10:08 AM
കാങ്ങാടന്‍ said...: റവ ഇഡലി ഇതിലും നന്നായി ഉണ്ടാക്കാന്‍ വേറൊരു മാര്‍ഗം ഉണ്ട്. preparation ഇത് തന്നെ. പക്ഷെ രവക്ക് പകരം ഇഡലി റവ വാങ്ങിക്കാന്‍ കിട്ടും, അതാവുമ്പോ വറക്കുവോന്നും വേണ്ട. taste ഉം ഇതിനേക്കാള്‍ എത്രയോ മെച്ചമുണ്ടാവും.; July 14, 2015 at 3:22 PM

ഞാന്‍.....

അടുക്കളച്ചൊല്ലുകള്‍.....

വിഭാഗങ്ങള്‍:

ഊണിനു സമയമായോ......?

മലയാളം ബ്ലോഗുകള്‍ ലിസ്റ്റ് ചെയ്യപ്പെടുന്ന ഇടങ്ങള്‍:

റവ ഇഡ്ഡലി

4 പേർ അഭിപ്രായമറിയിച്ചു:

ഈ ബ്ലോഗിനേക്കുറിച്ച്...

എന്റെ മറ്റു ബ്ലോഗുകള്‍:

ഇപ്പോള്‍ വിരുന്നിനെത്തിവര്‍:

ഇതുവരെ സ്വാദു നോക്കിയവർ

Followers

പ്രധാന ബ്ലോഗിംഗ് സഹായികള്‍: