അടുക്കളത്തളം: മാങ്ങാക്കറി

അടുക്കളച്ചൊല്ലുകള്‍.....

“അന്ന വിചാരം മുന്നവിചാരം, പിന്നെ വിചാരം കാര്യവിചാരം”
“ഉപ്പോളം വരുമോ ഉപ്പിലിട്ടത്”
“അരി വിതച്ചാൽ നെല്ലു വിളയാ”
“മുളയിലറിയാം വിള”
“ആര്യൻ വിതച്ചാൽ നവര വിളയുമോ?”
“നവര നട്ടാൽ തുവരയുണ്ടാകുമോ?”
“ഒരു വിത്ത് വിതച്ചാൽ പല വിത്ത് വിളയാ”
“കണ്ണൻ വാഴച്ചുവട്ടിൽ കദളിവാഴയുണ്ടാകുമോ?”
“അമരയും അപരാധവും കുറച്ചുമതി”
“ഉണ്ണാനില്ലാഞ്ഞാൽ വിത്ത്; ഉടുക്കാനില്ലാഞ്ഞാൽ പട്ട്”
“വിത്തുഗുണം പത്തുഗുണം”
“ചൊല്ല് പഴയതായാലും വിത്ത് പഴയതാവരുത്”
“വിശപ്പിനു രുചിയില്ല”
“തവിയറിയുമോ കറിയുടെ രസം?”
“കാന്താരിമുളകെന്തിനാ അധികം?”
“കർക്കിടകച്ചേന കട്ടിട്ടെങ്കിലും തിന്നണം”
“മെല്ലെത്തിന്നാൽ മുള്ളും തിന്നാം”
“പയ്യെത്തിന്നാൽ പനയും തിന്നാം”
“വിത്തെടുത്തുണ്ണരുത്”
“ഉണ്ടെങ്കിലോണം പോലെ ഇല്ലെങ്കിലേകാദശി”
“വെളുക്കുന്നതിനു മുൻപേ അരിവെയ്ക്കണം; അരിവെയ്ക്കുന്നതിനു മുൻപേ കറിവെയ്ക്കരുത്”
“വേണമെങ്കിൽ ചക്ക വേരിലും കായ്ക്കും!”
“എണ്ണിയ പയറ് അളക്കേണ്ട”
“മരത്തിന് കായ കനമല്ല”
“ഉരിനെല്ലൂരാൻ പോയിട്ട് പത്തുപറ നെല്ല് പന്നി തിന്നു”
“മക്കളെ കണ്ടും മാമ്പൂ കണ്ടും കൊതിക്കരുത്”
“ഉച്ചാറലുച്ചയ്ക്ക് വെള്ളാരി നട്ടാൽ വിഷു ഉച്ചയ്ക്ക് പറിക്കാം”
“കർക്കിടകത്തിൽ പത്തില കറിവെച്ചു കൂട്ടണം”
“കാണം വിറ്റും ഓണം ഉണ്ണണം”
“പത്തായം പട്ടിണി കിടക്കരുത്”
“നിലം നികത്തി വീടു വയ്ക്കരുത്”
“തൊഴുതുണ്ണുന്ന ചോറിനേക്കാ‍ൾ ഉഴുതുണ്ണുന്ന ചോറ്”
“വാഴ നനഞ്ഞാൽ ചീരയും നനയും”
“കയ്യാടിയാലേ വയറാടൂ”
“അവിയലിൽ ചേരാത്ത കഷ്ണമില്ല!”
“അണ്ടിയോടടുക്കുമ്പോഴറിയാം, മാങ്ങയുടെ പുളി!”
“അത്താഴമുണ്ടാൽ അരക്കാതം നടക്കണം, മുത്താഴമുണ്ടാൽ മുള്ളിലും കിടക്കണം”
“അധികം വിളഞ്ഞാൽ വിത്തിനും കൊള്ളാ”
“അധികമായാൽ അമൃതും വിഷം”
“അപ്പം തിന്നാൽ മതി; കുഴിയെണ്ണേണ്ട”
“അമ്മിയോടു ചോദിച്ചിട്ടാണോ അരയ്ക്കുന്നത്?”
“അരനാഴിയേ ഉള്ളെങ്കിലും അടുപ്പുകല്ലു മൂന്നു വേണം”
“അരിയെത്ര? പയറഞ്ഞാഴി”
“അഴകുള്ള ചക്കയിൽ ചുളയില്ല!”
“ആറ്റിൽ കളഞ്ഞാലും അളന്നു കളയണം”
“ഉണ്ട ചോറിൽ കല്ലിടരുത്”
“ഉണ്ടവന് പാ കിട്ടാഞ്ഞ്, ഉണ്ണാത്തവന് ഇല കിട്ടാഞ്ഞ്”
“ഉപ്പു തിന്നവൻ വെള്ളം കുടിക്കും”
“ഉള്ള കഞ്ഞിയിൽ പാറ്റ ഇടുക”
“എണ്ണിച്ചുട്ട അപ്പം പോലെ”
“എല്ലു മുറിയെ പണിതാൽ പല്ലു മുറിയേ തിന്നാം”
“കല്ലാടും മുറ്റത്ത് നെല്ലാടുകില്ല”
“കറിക്ക് ചേരാത്ത കഷ്ണം നുറുക്കരുത്”
“ചക്കയ്ക്ക് ചുക്ക്; മാങ്ങയ്ക്ക് തേങ്ങ”
“ഞാറുറച്ചാൽ ചോറുറച്ചു”
“തിന്ന ചോറിന് നന്ദി വേണം”
“മത്ത കുത്തിയാൽ കുമ്പളം മുളയ്ക്കുമോ?”
“പത്തായം പെറും, ചക്കി കുത്തും, അമ്മ വയ്ക്കും, ഞാനുണ്ണും”
“പന്തിയ്ക്കു മുമ്പും പടയ്ക്കു പിമ്പും ”
“പറ നിറയെ പതിരാണെങ്കിലും പാറ്റി നോക്കിയാൽ മണി കാണാം”
“ആലോലനീലമിഴിയാം പ്രിയയാൾ വിളമ്പും ഓലോലനൊന്നു മതി; എന്തിന്നു നൂറു കൂട്ടം?”

Wednesday, January 19, 2011

മാങ്ങാക്കറി

പച്ചമാങ്ങ കുരുകുരാന്ന് നുറുക്കി ഉണ്ടാക്കുന്ന അച്ചാറാണ് ഇത്. സദ്യകൾക്ക് ഒഴിച്ചുകൂടാനാവാത്ത വിഭവം.... മാങ്ങാക്കറി എന്നാണ് ഞങ്ങൾ പറയുന്നത്. മാങ്ങാഅച്ചാറുകളിൽ വച്ച് ഏറ്റവും ലളിതം;ഉണ്ടാക്കാൻ വളരെ എളുപ്പം. മാങ്ങ നുറുക്കിയെടുക്കേണ്ട താമസമേയുള്ളൂ.

ആവശ്യമുള്ള സാധനങ്ങൾ:

പച്ചമാങ്ങ - രണ്ടെണ്ണം (മൂവാണ്ടൻ മാങ്ങയാണ് ഏറ്റവും യോജിച്ചത്)
മുളകുപൊടി - പാകത്തിന് (ഞാൻ ഏകദേശം 4 റ്റീ സ്പൂൺ എടുത്തു). കാശ്മീരി മുളകുപൊടിയാണെങ്കിൽ നല്ല ചുവപ്പുനിറം കിട്ടും.
കായം പൊടി - 3/4 - 1 ടീ സ്പൂൺ
ഉലുവാപ്പൊടി - 3/4 - 1 ടീസ്പൂൺ
ഉപ്പ് - പാകത്തിന്
വറുത്തിടാനാവശ്യമായ നല്ലെണ്ണ, കടുക്, മുളക്, കറിവേപ്പില

ഉണ്ടാക്കുന്ന വിധം:

മാങ്ങ കഴുകി തൊലിയോടെ ചെറിയ കഷ്ണങ്ങളായി അരിയുക.

മാങ്ങാക്കഷ്ണങ്ങളിൽ പാകത്തിന് ഉപ്പ് ചേർത്തിളക്കി 2-3 മണിക്കൂർ വച്ചശേഷം മുളകുപൊടിയും കായവും ഉലുവാപ്പൊടിയും ചേർത്തിളക്കി യോജിപ്പിക്കുക. ഉലുവയുടേയും കായത്തിന്റേയും സ്വാദ് മുന്നിട്ടുനിൽക്കണം. അതാണ് അതിന്റെയൊരു ഇത്.
സാധാരണയായി മാങ്ങാക്കറിയുണ്ടാക്കുമ്പോൾ ഇത്രയുമേ പതിവുള്ളു. സ്വല്പം ആർഭാടം വേണമെങ്കിൽ നല്ലെണ്ണയിൽ വറുത്ത കടുകും മുളകും കറിവേപ്പിലയും ചേർത്തിളക്കുക. സ്വാദും കൂടും. ഞാൻ ചെയ്യാറുണ്ട്.

പെട്ടെന്നു കേടായിപ്പോകുമെന്നൊരു ദോഷം മാങ്ങാക്കറിക്കുണ്ട്. അതുകൊണ്ട് ആവശ്യത്തിനു മാത്രം(ഒന്നോ രണ്ടോ മാങ്ങകൊണ്ട്)ഉണ്ടാക്കുന്നതാണു നല്ലത്. കൂടുതലുണ്ടാക്കുകയാണെങ്കിൽ ഫ്രിഡ്ജിൽ സൂക്ഷിക്കുക.

18 പേർ അഭിപ്രായമറിയിച്ചു:

Jazmikkutty said...: ഹായ് എന്താ ഒരു രുചി!! നല്ല ഫോട്ടോയും....ഈ റെസിപ്പീക്ക് നന്ദി ബിന്ദു...; January 19, 2011 at 9:35 AM
Indu said...: ബിന്ദൂ മാങ്ങാ വെറുതെ ഉപ്പും മഞ്ഞളും പുരട്ടി വെച്ചാല്‍ മതിയോ, അടുപ്പില്‍ വെച്ച് ഒന്നും ചെയണ്ടേ ? ഈ മാങ്ങാ അച്ചാറിനു എരിവു കൂടിപോയാല്‍ എന്ത് ചെയണം ? ഞാനുണ്ടാക്കിയതിനു എരിവു കൂടിപ്പോയി ..കുറച്ചു പഞ്ചസാര ഇട്ടു നോക്കിയിട്ടും രക്ഷയില്ല ..; January 19, 2011 at 11:37 AM
ബിന്ദു കെ പി said...: മാളുവേ, ഈ അച്ചാർ അടുപ്പിലൊന്നും വയ്ക്കേണ്ട കാര്യമില്ല. ചൂടായാൽ മാങ്ങ വെന്തുപോകും. മഞ്ഞൾപ്പൊടി വേണ്ടാട്ടോ. പിന്നെ ഈ റെസിപ്പി നോക്കി ഉണ്ടാക്കിയിട്ടാണോ എരിവ് കൂടിപ്പോയത്? മുളകുപൊടി ആദ്യം തന്നെ കുറേ കോരിച്ചൊരിയരുത്. ഓരോ സ്പൂൺ ആയി ചേർത്ത് അവരവരുടെ പാകത്തിനാക്കണം. ഞാനിവിടെ പറഞ്ഞിരിക്കുന്ന അളവ് എല്ലാവർക്കും യോജിക്കണമെന്നില്ല.

സത്യം പറഞ്ഞാൽ എന്തെങ്കിലുമൊരു വിഭവം ഉണ്ടാക്കാനോ അതിന്റെ പാചകക്കുറിപ്പ് എഴുതാനോ അല്ല പാട്. ശരിക്കും ഞാൻ കുഴങ്ങിപ്പോകുന്നത് അളവുകൾ എഴുതേണ്ടിവരുമ്പോഴാണ്. എന്റേത് എല്ലാം ഒരു കൈക്കണക്കാണ്. ഇതിപ്പോ ബ്ലോഗിലിടാൻ തുടങ്ങിയപ്പോഴാണ് അളവുകളൊക്കെ ശ്രദ്ധിക്കാൻ തുടങ്ങിയത്. അതിനായി ചെറിയൊരു ത്രാസും വാങ്ങിച്ചു :) സാധനങ്ങൾ തൂക്കിനോക്കൽ, ഫോട്ടോയെടുപ്പ് എല്ലാം കൂടി പാചകം ഇപ്പോ സ്ലൊമോഷനിലായെന്നു പറഞ്ഞാൽ മതിയല്ലോ :) :); January 19, 2011 at 12:14 PM
jyo.mds said...: കണ്ടിട്ട് വായില്‍ വെള്ളം വന്നു.; January 19, 2011 at 12:30 PM
Indu said...: ഇത് ഇന്നിട്ട ബ്ലോഗ്‌ അല്ലെ .ഞാന്‍ കഴിഞ്ഞാഴ്ച ഉണ്ടാക്കിയ കാര്യമാ പറഞ്ഞത് ...ഏതൊക്കെയോ ബ്ലോഗും അമ്മ പണ്ടിടുന്ന ഓര്‍മയും എല്ലാം കൂടി വെച്ച് ഒരു പ്രയോഗം നടത്തിയത ... ആദ്യം കടുക് വറുത്തു മാങ്ങാ ഇട്ടൊന്നു വാട്ടിയിട്ടു ബാക്കി സാമഗ്രീസെല്ലാം ചേര്‍ത്തൊന്നു ഇളക്കി ...കളര്‍ കിട്ടനരുന്നു മുളകുപൊടി തട്ടിയത് .. ഇപ്പൊ എന്റെ മാങ്ങചാര്‍ കൂട്ടുന്നവരെല്ലാം കരയും എരിവു കാരണം ആണെന്നാണ് എന്റെ വിശ്വാസം :) ഇനി ഈ ബ്ലോഗ്‌ പ്രിന്റ്‌ എടുത്തിട്ട് വേണം ഐശ്വര്യമായി അടുത്ത attempt .; January 19, 2011 at 12:37 PM
ചാര്‍ളി (ഓ..ചുമ്മാ ) said...: ശ്ശോ....
ഒരു രക്ഷേം ഇല്ല ..കിടുകിടുക്കന്‍ പടങ്ങള്‍..
ബ്ഗ്ഗൊഗു തുറന്നു വച്ചീ പടങ്ങള്‍ നോക്കി ചോറുണ്ണാം.

നന്ദി..; January 19, 2011 at 2:23 PM
ആളവന്‍താന്‍ said...: മാങ്ങാക്കറി എന്ന് തന്നാ ഞങ്ങളും ഇതിനെ പറയുന്നേ... ആഅവസാനത്തെ പടവും കലക്കി കേട്ടോ.
ചേച്ചീ ഞാന്‍ ഒരു പോസ്റ്റ്‌ ഇട്ടിട്ടുണ്ട്. ദി സേക്രഡ്‌ ഫെയ്സ് പാക്ക്‌!! സമയം പോലെ നോക്കൂ...; January 19, 2011 at 2:48 PM
ravanan said...: Oru jyathi taste thanne chechiiii.
sambhavam ugran.; January 19, 2011 at 3:49 PM
Typist | എഴുത്തുകാരി said...: എന്താ ഒരു നിറം!

എനിക്കും ഓർമ്മ വന്നതു് സദ്യ തന്നെയാ. സദ്യക്കു് പായസം കഴിച്ചിട്ട്‌ അവസാനം ഒരിത്തിരി ചോറ് മോരൊഴിച്ച് ഇതുപോലെ മാങ്ങാകറിയും കൂട്ടി കഴിക്കും.

ബിന്ദൂ, ഒരു സംശയം ചോദിക്കട്ടെ, പച്ച ഉലുവാപ്പൊടി മതിയോ, ഉലുവ വറുത്തുപൊടിച്ചിടണോ?; January 19, 2011 at 5:44 PM
ബിന്ദു കെ പി said...: @എഴുത്തുകാരി: അയ്യോ ചേച്ചീ, പച്ച ഉലുവാപ്പൊടി അല്ലാട്ടോ. ഉലുവ വറുത്തുപൊടിച്ചതുതന്നെ വേണം. ഒരുവിധം എല്ലാ അച്ചാറുകൾക്കും,പിന്നെ കാളന് ഒക്കെ ഉലുവാപ്പൊടി ആവശ്യമുള്ളതുകൊണ്ട് ഞാനിവിടെ ഉലുവ വറുത്തുപൊടിച്ച് സ്റ്റോക്കു ചെയ്തിരിക്കുകയാ. തീരെ കുറച്ചായി മിക്സിയിൽ പൊടിഞ്ഞുകിട്ടാനും ബുദ്ധിമുട്ടാണ്.; January 19, 2011 at 6:06 PM
Typist | എഴുത്തുകാരി said...: ഞാനും വിചാരിച്ചൂ...; January 19, 2011 at 6:52 PM
കുഞ്ഞൂസ് (Kunjuss) said...: ബിന്ദൂ, ഞാന്‍ ഇന്ന് ഈ മാങ്ങാക്കറി ഉണ്ടാക്കിയതേയുള്ളു... എന്നിട്ട് ബ്ലോഗ് തുറന്നപ്പോള്‍ , ദാ ബിന്ദുവും അതു തന്നെ ഉണ്ടാക്കിയിരിക്കുന്നു. ഞാന്‍ ഇടക്കൊക്കെ ഉലുവപ്പൊടി ഇടാതെയും ചെയ്യാറുണ്ട് ട്ടോ... രുചി വ്യത്യാസം ഒന്നും തോന്നില്ല.; January 20, 2011 at 7:01 AM
ഹരീഷ് തൊടുപുഴ said...: ബിന്ദു ചേച്ചി..

ആ ഫോട്ടോ കാണുമ്പോൾ ഒരേഒരു കാര്യമേ മനസ്സിൽ വരുന്നുള്ളു..
അമ്മായിയമ്മ ഇതുപോലെ അച്ചാറൂണ്ടാക്കും..
അവളൂടെ വീട്ടിൽ ചെല്ലുമ്പോൾ; ഞാനൊരു കുപ്പി നിറയെ കൊണ്ടു വരും..
എന്നിട്ട്..
ടച്ചിങ്ങ്സായി മാത്രം..!
കഴിക്കും..
എന്തൊരു ടേസ്റ്റ് ആണെന്നറിയോ..!!; January 20, 2011 at 8:02 PM
siya said...: ഞാനും ഒരു മാങ്ങ കറി യുടെ ആള്‍ ആണ് .അമ്മാമ്മ ഉണ്ടാക്കുന്ന മാങ്ങ കറി ഭരണിയില്‍ എടുത്തു വക്കുന്നത ഇപ്പോള്‍ ഓര്‍മ്മ വന്നത് .മാങ്ങാ കറി യുടെ ഫോട്ടോ ഇല്ലേ?ഞാന്‍ ഉണ്ടാക്കുന്ന മാങ്ങാ കറിയില്‍ ഉലുവ ഇല്ല .ഇനി അത് ഒന്ന്‌ പരീക്ഷിക്കാം അല്ലേ ?; January 21, 2011 at 8:35 AM
mr.unassuming said...: Ithu classic curry thanne!nooo doubt!
(manha nirathil ulla oru maangaakkari undallo!'Maanga vaattiyath' ennanu vilikkaaru.Typical nasraani cusine aakaan aanu saadhyatha! Enthu swaadaanenno! Nalla puliyan maanga vechaan prayogam.Kadukum, mulakum,veppilayum varuthidum.athum adi poliyaan ketto); January 29, 2011 at 5:14 PM
Sreekumar B said...: FACEBOOK ഇല ഈ സൈറ്റ് ലിങ്ക് പോസ്റ്റ്‌ ചെയ്തിട്ടുണ്ട്.; July 10, 2011 at 8:03 PM
Unknown said...: This comment has been removed by the author.; October 29, 2013 at 11:25 PM
nsarmila said...: Want to share an info privately. Pl mail me back bindu. My name is sarmila, and I am from Calicut mathrubhumi.thank you
My mail id is
nsarmila.ila@gmail.com; May 16, 2019 at 8:01 AM

ഈ ബ്ലോഗിനേക്കുറിച്ച്...

ഒരു പാചകവിദഗ്ദ്ധയാണെന്ന അവകാശവാദമൊന്നും ഇല്ല കേട്ടോ.. എനിയ്ക്കറിയാവുന്ന ചിലത് നിങ്ങളുമായി പങ്കുവയ്ക്കുന്നു എന്നുമാത്രം.
പണ്ടത്തെ തനതു വിഭവങ്ങളെ അതേപടി, അതേ പേരുകളോടെ‍ തന്നെയാണ് ഇവിടെ പരിചയപ്പെടുത്തുന്നത്. പേരുകള്‍ക്കോ, ഉണ്ടാക്കുന്ന രീതികള്‍ക്കോ പ്രാദേശികമായ വ്യത്യാസങ്ങളുണ്ടാകുമല്ലോ. അതേക്കുറിച്ചുള്ള അന്വേഷണം കൂടിയാണ് ഓരോ കുറിപ്പും. നിങ്ങൾക്കറിയാവുന്നത് പറയുമല്ലോ..?
ഇതിൽ പറയുന്ന കുറിപ്പുകളിൽ ഏതെങ്കിലും നിങ്ങൾക്ക് ഇഷ്ടപ്പെട്ടുവെങ്കിൽ, ഉപകാരപ്രദമായെങ്കിൽ, അതിന് ഞാൻ കടപ്പെട്ടിരിക്കുന്നത് അടുക്കളയെന്ന ലോകം നന്നായറിഞ്ഞു വളർന്ന സാഹചര്യങ്ങളോടും എന്റെ അമ്മയോടുമാണ്.

ഞാന്‍.....

അടുക്കളച്ചൊല്ലുകള്‍.....

വിഭാഗങ്ങള്‍:

ഊണിനു സമയമായോ......?

മലയാളം ബ്ലോഗുകള്‍ ലിസ്റ്റ് ചെയ്യപ്പെടുന്ന ഇടങ്ങള്‍:

മാങ്ങാക്കറി

18 പേർ അഭിപ്രായമറിയിച്ചു:

ഈ ബ്ലോഗിനേക്കുറിച്ച്...

എന്റെ മറ്റു ബ്ലോഗുകള്‍:

ഇപ്പോള്‍ വിരുന്നിനെത്തിവര്‍:

ഇതുവരെ സ്വാദു നോക്കിയവർ

Followers

പ്രധാന ബ്ലോഗിംഗ് സഹായികള്‍: