കൊള്ളിക്കിഴങ്ങ് ദോശ

കൊള്ളിക്കിഴങ്ങ് (കപ്പ) എല്ലാവരുടേയും ഇഷ്ടഭക്ഷണമാണല്ലോ. ഇതുകൊണ്ടുണ്ടാക്കുന്ന സ്വാദിഷ്ടമായ ഒരുപാട് വിഭവങ്ങൾ നിങ്ങൾക്ക് പരിചയമുണ്ടാവും. കൊള്ളിക്കിഴങ്ങുകൊണ്ടുള്ള ദോശ ആരെങ്കിലും ഉണ്ടാക്കിയിട്ടുണ്ടോ? ഇല്ലെങ്കിലിതാ...ഒന്നു പരീക്ഷിക്കൂ.....

ആവശ്യമുള്ള സാധനങ്ങൾ:

കൊള്ളിക്കിഴങ്ങ് - കാൽക്കിലോ
അരി - കാൽ കിലോ (പൊന്നി അരിയാണ് നല്ലത്)
ചുവന്ന മുളക് - 3-4 എണ്ണം
ചുവന്നുള്ളി - 10-12 എണ്ണം എടുക്കാം. കുറച്ചധികം എടുത്താലും നന്ന്.
തേങ്ങ ചിരകിയത് - ഒരു പിടി.
പച്ചമുളക് - നിങ്ങളുടെ പാകത്തിന്
ഇഞ്ചി - ഒരു ചെറിയ കഷ്ണം
കായപ്പൊടി - കാൽ സ്പൂൺ
കറിവേപ്പില, ഉപ്പ് - ആവശ്യത്തിന്.
എണ്ണ - ദോശയിൽ പുരട്ടാൻ

ഉണ്ടാക്കുന്ന വിധം:

അടതട്ടി ഉണ്ടാക്കുന്ന പോലെ തന്നെ. കടലപ്പരിപ്പിനു പകരം ഇതിൽ കിഴങ്ങ് അരച്ചു ചേർക്കുന്നു. അത്രേയുള്ളൂ...

അരി രണ്ടു മണിക്കൂർ വെള്ളത്തിലിട്ട് കുതിർത്തുക. കിഴങ്ങ് തൊലി കളഞ്ഞു ചെറുതായി നുറുക്കിയെടുക്കുക. രണ്ടും കൂടി നന്നായി അരച്ചെടുക്കുക. ഇതിലേയ്ക്ക് ഉള്ളിയും ചുവന്നമുളകും കൂടി ചതച്ചെടുത്തതും തേങ്ങയും ചേർക്കുക. അതിനുശേഷം പച്ചമുളക്, ഇഞ്ചി, കറിവേപ്പില ഇവ പൊടിയായി അരിഞ്ഞതും, കായവും, പാകത്തിന് ഉപ്പും ചേർത്ത് നന്നായിളക്കുക. മാവിന് അയവ് പോരെങ്കിൽ പാകത്തിന് വെള്ളം ചേർക്കുക.



ഇനി ദോശയുണ്ടാക്കുക. അല്പം കനത്തിൽ പരത്തി, തിരിച്ചും മറിച്ചുമിട്ട് എണ്ണ പുരട്ടി നന്നായി മൊരിച്ചെടുക്കുക. (പരത്തുന്ന സമയത്ത് ദോശക്കല്ലിന്റെ ചൂട് നന്നായി കുറഞ്ഞിരിക്കണം. അല്ലെങ്കിൽ പരത്താൻ പറ്റാതെ മാവ് ഉരുണ്ടുകൂടും)

ചട്ണിയോ ചമ്മന്തിയോ അച്ചാറോ കൂട്ടി ചൂടോടെ കഴിയ്ക്കുക. ഈ ചമ്മന്തി ഇതിനു പറ്റിയതാണ്.