അടുക്കളത്തളം: മാമ്പഴക്കാളൻ

അടുക്കളച്ചൊല്ലുകള്‍.....

“അന്ന വിചാരം മുന്നവിചാരം, പിന്നെ വിചാരം കാര്യവിചാരം”
“ഉപ്പോളം വരുമോ ഉപ്പിലിട്ടത്”
“അരി വിതച്ചാൽ നെല്ലു വിളയാ”
“മുളയിലറിയാം വിള”
“ആര്യൻ വിതച്ചാൽ നവര വിളയുമോ?”
“നവര നട്ടാൽ തുവരയുണ്ടാകുമോ?”
“ഒരു വിത്ത് വിതച്ചാൽ പല വിത്ത് വിളയാ”
“കണ്ണൻ വാഴച്ചുവട്ടിൽ കദളിവാഴയുണ്ടാകുമോ?”
“അമരയും അപരാധവും കുറച്ചുമതി”
“ഉണ്ണാനില്ലാഞ്ഞാൽ വിത്ത്; ഉടുക്കാനില്ലാഞ്ഞാൽ പട്ട്”
“വിത്തുഗുണം പത്തുഗുണം”
“ചൊല്ല് പഴയതായാലും വിത്ത് പഴയതാവരുത്”
“വിശപ്പിനു രുചിയില്ല”
“തവിയറിയുമോ കറിയുടെ രസം?”
“കാന്താരിമുളകെന്തിനാ അധികം?”
“കർക്കിടകച്ചേന കട്ടിട്ടെങ്കിലും തിന്നണം”
“മെല്ലെത്തിന്നാൽ മുള്ളും തിന്നാം”
“പയ്യെത്തിന്നാൽ പനയും തിന്നാം”
“വിത്തെടുത്തുണ്ണരുത്”
“ഉണ്ടെങ്കിലോണം പോലെ ഇല്ലെങ്കിലേകാദശി”
“വെളുക്കുന്നതിനു മുൻപേ അരിവെയ്ക്കണം; അരിവെയ്ക്കുന്നതിനു മുൻപേ കറിവെയ്ക്കരുത്”
“വേണമെങ്കിൽ ചക്ക വേരിലും കായ്ക്കും!”
“എണ്ണിയ പയറ് അളക്കേണ്ട”
“മരത്തിന് കായ കനമല്ല”
“ഉരിനെല്ലൂരാൻ പോയിട്ട് പത്തുപറ നെല്ല് പന്നി തിന്നു”
“മക്കളെ കണ്ടും മാമ്പൂ കണ്ടും കൊതിക്കരുത്”
“ഉച്ചാറലുച്ചയ്ക്ക് വെള്ളാരി നട്ടാൽ വിഷു ഉച്ചയ്ക്ക് പറിക്കാം”
“കർക്കിടകത്തിൽ പത്തില കറിവെച്ചു കൂട്ടണം”
“കാണം വിറ്റും ഓണം ഉണ്ണണം”
“പത്തായം പട്ടിണി കിടക്കരുത്”
“നിലം നികത്തി വീടു വയ്ക്കരുത്”
“തൊഴുതുണ്ണുന്ന ചോറിനേക്കാ‍ൾ ഉഴുതുണ്ണുന്ന ചോറ്”
“വാഴ നനഞ്ഞാൽ ചീരയും നനയും”
“കയ്യാടിയാലേ വയറാടൂ”
“അവിയലിൽ ചേരാത്ത കഷ്ണമില്ല!”
“അണ്ടിയോടടുക്കുമ്പോഴറിയാം, മാങ്ങയുടെ പുളി!”
“അത്താഴമുണ്ടാൽ അരക്കാതം നടക്കണം, മുത്താഴമുണ്ടാൽ മുള്ളിലും കിടക്കണം”
“അധികം വിളഞ്ഞാൽ വിത്തിനും കൊള്ളാ”
“അധികമായാൽ അമൃതും വിഷം”
“അപ്പം തിന്നാൽ മതി; കുഴിയെണ്ണേണ്ട”
“അമ്മിയോടു ചോദിച്ചിട്ടാണോ അരയ്ക്കുന്നത്?”
“അരനാഴിയേ ഉള്ളെങ്കിലും അടുപ്പുകല്ലു മൂന്നു വേണം”
“അരിയെത്ര? പയറഞ്ഞാഴി”
“അഴകുള്ള ചക്കയിൽ ചുളയില്ല!”
“ആറ്റിൽ കളഞ്ഞാലും അളന്നു കളയണം”
“ഉണ്ട ചോറിൽ കല്ലിടരുത്”
“ഉണ്ടവന് പാ കിട്ടാഞ്ഞ്, ഉണ്ണാത്തവന് ഇല കിട്ടാഞ്ഞ്”
“ഉപ്പു തിന്നവൻ വെള്ളം കുടിക്കും”
“ഉള്ള കഞ്ഞിയിൽ പാറ്റ ഇടുക”
“എണ്ണിച്ചുട്ട അപ്പം പോലെ”
“എല്ലു മുറിയെ പണിതാൽ പല്ലു മുറിയേ തിന്നാം”
“കല്ലാടും മുറ്റത്ത് നെല്ലാടുകില്ല”
“കറിക്ക് ചേരാത്ത കഷ്ണം നുറുക്കരുത്”
“ചക്കയ്ക്ക് ചുക്ക്; മാങ്ങയ്ക്ക് തേങ്ങ”
“ഞാറുറച്ചാൽ ചോറുറച്ചു”
“തിന്ന ചോറിന് നന്ദി വേണം”
“മത്ത കുത്തിയാൽ കുമ്പളം മുളയ്ക്കുമോ?”
“പത്തായം പെറും, ചക്കി കുത്തും, അമ്മ വയ്ക്കും, ഞാനുണ്ണും”
“പന്തിയ്ക്കു മുമ്പും പടയ്ക്കു പിമ്പും ”
“പറ നിറയെ പതിരാണെങ്കിലും പാറ്റി നോക്കിയാൽ മണി കാണാം”
“ആലോലനീലമിഴിയാം പ്രിയയാൾ വിളമ്പും ഓലോലനൊന്നു മതി; എന്തിന്നു നൂറു കൂട്ടം?”

മാമ്പഴം കൊണ്ടൊരു കാളൻ. മാമ്പഴപ്പുളിശ്ശേരി എന്നു പറയുന്നതും ഇതുതന്നെ. പിഴിഞ്ഞെടുക്കാവുന്ന, ചെറുതരം നാട്ടുമാമ്പഴമാണ് പൂളിയെടുക്കുന്ന മാമ്പഴത്തേക്കാൾ ഇതിനു യോജിച്ചത്.

ആവശ്യമുള്ള സാധനങ്ങൾ:

മാമ്പഴം - ഒരു കിലോ
നല്ല പുളിയുള്ള മോര്/തൈര് - മുക്കാൽ ലിറ്ററോളം കരുതി വയ്ക്കുക. മോരിന്റെ പുളിപ്പനുസരിച്ച് ആവശ്യത്തിന് എടുക്കുക.
തേങ്ങ - ഒന്ന്.
പച്ചമുളക് - എരിവനുസരിച്ച് ആവശ്യമുള്ളത്ര.
ജീരകം - 2-3 സ്പൂൺ.
മഞ്ഞൾപ്പൊടി, ഉപ്പ്.
ഉലുവാപ്പൊടി - ഒരു സ്പൂൺ.
വറുത്തിടാനുള്ള വെളിച്ചെണ്ണ, കടുക്, മുളക്, കറിവേപ്പില, ഉലുവ.

ഉണ്ടാക്കുന്ന വിധം:

തേങ്ങയും പച്ചമുളകും ജീരകവും കൂടി വെള്ളം കഴിയാവുന്നത്ര കുറച്ചുചേർത്ത് വെണ്ണപോലെ അരച്ചെടുക്കുക.

തേങ്ങയിൽ ചേർത്ത പച്ചമുളകു കൂടാതെ വേറെ അഞ്ചാറു പച്ചമുളക് അമ്മിയിൽ വച്ച് ചതച്ചെടുക്കണം. അമ്മി ഇല്ലെങ്കിൽ മുളക് രണ്ടായി കീറിയെടുത്താൽ മതി. മിക്സിയിൽ ഇടാതിരിയ്ക്കുകയാണ് നല്ലത്.

മാമ്പഴം തൊലിയുരിച്ചെടുക്കുക.

ഒരു പാത്രത്തിൽ കുറച്ചു വെള്ളമെടുത്ത് മാമ്പഴത്തൊലി അതിലിട്ട് സത്തുമുഴുവൻ വെള്ളത്തിലേയ്ക്ക് പിഴിഞ്ഞെടുക്കുക. ഈ വെള്ളത്തിൽ മാമ്പഴം വേവിയ്ക്കാൻ വയ്ക്കുക. (വേറെ വെള്ളമൊഴിയ്ക്കേണ്ട). കട്ടിയുള്ള പാത്രമെടുക്കാൻ ശ്രദ്ധിയ്ക്കണം. അല്ലെങ്കിൽ അടിയിൽ‌ കരിഞ്ഞുപിടിച്ചെന്നു വരും. ആവശ്യത്തിന് ഉപ്പും മഞ്ഞൾ‍പ്പൊടിയും ചേർക്കുക. വേണമെങ്കിൽ സ്വല്പം മുളകുപൊടിയും ചേർക്കാം. കുറച്ചു കഴിയുമ്പോൾ വെള്ളം വറ്റി കുറുകിവരും. അപ്പോൾ തീ അണച്ചശേഷം മോരും അരച്ചുവച്ചിരിക്കുന്ന തേങ്ങയും ചേർക്കുക. കുറച്ചു കറിവേപ്പിലയും ചതച്ചുവച്ചിരിക്കുന്ന മുളകും ഇടുക. നന്നായി ഇളക്കിയശേഷം പുളിപ്പ് പാകത്തിനാണോ എന്ന് നോക്കുക. അതിനനുസരിച്ച് മോരിന്റെ അളവ് ക്രമീകരിക്കുക. എരിവ് പോരെങ്കിൽ പച്ചമുളകിന്റെ എണ്ണം കൂട്ടുക. എല്ലാം പാകത്തിന് ക്രമീകരിച്ചശേഷം വീണ്ടും തീകത്തിച്ച് ചെറുതീയിൽ കുറച്ചുനേരം അനക്കാതെ വയ്ക്കുക. ഇളക്കരുത്. മോര് നന്നായി പതഞ്ഞുവരുന്ന ഘട്ടത്തില്‍ വാങ്ങുക. തിളയ്ക്കരുത്.

വെളിച്ചെണ്ണയില്‍ കടുകും ഉലുവയും മുളകും(മുളക് പൊട്ടിയ്ക്കാതെ മുഴുവനായി ഇടുക) കറിവേപ്പിലയും വറുത്തിടുക. കടുകും കറിവേപ്പിലയുമൊക്കെ സാധാരണ ഇടുന്നതിനേക്കാള്‍ കൂടുതല്‍ ഇടുക.
കുറച്ചൊന്ന് ആറിയശേഷം ഉലുവാപ്പൊടി ചേര്‍ത്ത് നന്നായി ഇളക്കുക.

മാമ്പഴക്കാളൻ റെഡിയായി!! ചൂടോടെ ഉപയോഗിക്കുന്നതിനേക്കാൾ കൂടുതൽ സ്വാദ് നന്നായി തണുത്താലാണ്. ഒരു ദിവസം പഴകിയാൽ സ്വാദ് പിന്നെയും കൂടും.

കുറിപ്പ് :
അല്പം മധുരം കുറഞ്ഞതോ പുളിപ്പുള്ളതോ ആയ മാമ്പഴംകൊണ്ടും കാളൻ വയ്ക്കാം. മധുരത്തിനുവേണ്ടി അവസാനം അല്പം ശർക്കര ചേർത്താൽ മതി.

നല്ല കഴമ്പുള്ള വലിയ‌ഇനം മാമ്പഴം മാത്രമേ കിട്ടാനുള്ളുവെങ്കിൽ തൊലി ചെത്തിക്കളഞ്ഞ് പൂളി കഷ്ണങ്ങളാക്കിയശേഷം കാളൻ ഉണ്ടാക്കുക.

ഈ ബ്ലോഗിനേക്കുറിച്ച്...

ഒരു പാചകവിദഗ്ദ്ധയാണെന്ന അവകാശവാദമൊന്നും ഇല്ല കേട്ടോ.. എനിയ്ക്കറിയാവുന്ന ചിലത് നിങ്ങളുമായി പങ്കുവയ്ക്കുന്നു എന്നുമാത്രം.
പണ്ടത്തെ തനതു വിഭവങ്ങളെ അതേപടി, അതേ പേരുകളോടെ‍ തന്നെയാണ് ഇവിടെ പരിചയപ്പെടുത്തുന്നത്. പേരുകള്‍ക്കോ, ഉണ്ടാക്കുന്ന രീതികള്‍ക്കോ പ്രാദേശികമായ വ്യത്യാസങ്ങളുണ്ടാകുമല്ലോ. അതേക്കുറിച്ചുള്ള അന്വേഷണം കൂടിയാണ് ഓരോ കുറിപ്പും. നിങ്ങൾക്കറിയാവുന്നത് പറയുമല്ലോ..?
ഇതിൽ പറയുന്ന കുറിപ്പുകളിൽ ഏതെങ്കിലും നിങ്ങൾക്ക് ഇഷ്ടപ്പെട്ടുവെങ്കിൽ, ഉപകാരപ്രദമായെങ്കിൽ, അതിന് ഞാൻ കടപ്പെട്ടിരിക്കുന്നത് അടുക്കളയെന്ന ലോകം നന്നായറിഞ്ഞു വളർന്ന സാഹചര്യങ്ങളോടും എന്റെ അമ്മയോടുമാണ്.

17 പേർ അഭിപ്രായമറിയിച്ചു:

ബിന്ദു കെ പി said...: മാമ്പഴം കൊണ്ടൊരു കാളൻ. മാമ്പഴപ്പുളിശ്ശേരി എന്നു പറയുന്നതും ഇതുതന്നെ. പിഴിഞ്ഞെടുക്കാവുന്ന, ചെറുതരം നാട്ടുമാമ്പഴമാണ് പൂളിയെടുക്കുന്ന മാമ്പഴത്തേക്കാൾ ഇതിനു യോജിച്ചത്.; April 27, 2009 at 8:28 AM
ശ്രീ said...: ഹായ്... മാമ്പഴപ്പുളിശ്ശേരി... ഇതു മാത്രം മതിയല്ലോ ചോറുണ്ണാന്‍... :); April 27, 2009 at 8:44 AM
കുഞ്ഞന്‍ said...: മേമ്പൊടിയായി ലേശം കുരുമുളക് പൊടി ചേര്‍ത്താലും സ്വാദ് കൂടും ല്ലേ ബിന്ദു ജീ..

ഇവിടെ ഗള്‍ഫ് നാട്ടില്‍ മോര് ചൂടാക്കാന്‍ നോക്കിയാല്‍ ടിം..ടിം പിരിയും, ആയതിനാല്‍ ഓഫ് ചെയ്തു വച്ചിട്ട് മോര് ഒഴിക്കുക ആ സമയം ഇളക്കുകയും വേണം അല്ലെങ്കില്‍ മാമ്പഴ പുളിശ്ശേരിക്കു പകരം മാമ്പഴ കൊലശ്ശേരിയായിരിക്കും ഉണ്ടാവുന്നത്..!; April 27, 2009 at 9:39 AM
siva // ശിവ said...: സാധാരണ കാളന്‍ ഉണ്ടാക്കി പഠിച്ചുവരുന്നതേയുള്ളൂ.... ഈ കുറിപ്പിനും നന്ദി....രണ്ട് ദിവസത്തിനകം ഇതും ഉണ്ടാക്കണം...; April 27, 2009 at 10:44 AM
Krishnankutty said...: വളരെ നന്നിയുണ്ട് ചെചീ ... ഇതൊകെ ഒന്നു പരീഷിച്ചു നോക്കാന്‍ ഞാന്‍ തീരുമാനിച്ചു

നല്ല ബ്ലോഗ് ആണ് ... കുക്കിംഗ്‌ ഗുരു വിനു പ്രണാമം :); April 27, 2009 at 11:09 PM
ആഷ | Asha said...: Umma :)

I Lov this blog.; April 28, 2009 at 9:52 AM
Typist | എഴുത്തുകാരി said...: ബിന്ദു,ഈ സമയത്ത് ഇതു് ഇട്ടതു് നന്നായി.
ഇന്നിവിടെ ഇതു തന്നെയാണ്.(ഇപ്പോ മിക്കവാറുമൊക്കെ ഇതൊക്കെ തന്നെയാണ്. ഇന്നും കുറച്ചു കൊച്ചു നാട്ടുമാമ്പഴം കൊണ്ടുവച്ചിട്ടുണ്ട് അപ്പുറത്തെ വീടുകളില്‍നിന്നൊക്കെ). മാമ്പഴപുളിശ്ശേരി അല്ലെങ്കില്‍ മാമ്പഴക്കൂട്ടാന്‍ എന്നാ ഞങ്ങളു പറയുന്നെ.; April 28, 2009 at 6:17 PM
തലശ്ശേരിക്കാരന്‍ said...: അസ്സലയിടുണ്ട് കേട്ടോ. അഭിനന്ദനങ്ങള്‍ .................... ഷമീര്‍; April 28, 2009 at 7:58 PM
Jayasree Lakshmy Kumar said...: വിളമ്പിയത് ഉണ്ടൂട്ടോ. അസ്സലായിട്ടുണ്ട് :); April 29, 2009 at 4:05 AM
ഇന്‍ഡ്യാഹെറിറ്റേജ്‌:Indiaheritage said...: ഹൊ ആ മാമ്പഴപ്പുളിശ്ശേരി കൊതിപ്പിച്ചു കേട്ടോ
മാങ്ങ വന്നു തുടങ്ങിയാല്‍ സീസണ്‍ തീരുന്നതുവരെ എനിക്കുള്ള പ്രധാന വിഭവം ഇതു തന്നെ.; April 30, 2009 at 8:40 PM
വീ സ്വാന്‍ said...: കൊള്ളാം. കാളനാണങ്കില്‍ മാമ്പഴംതന്നെ . ഞങ്ങളുടെ നാട്ടില്‍ പാണ്ടിപുളിച്ചി എന്നൊരിനമുണ്ട് കാളന്‍ നാക്കേല്‍ തൊട്ടാല്‍ മതി നവരസങ്ങളും പിന്നെ ജഗതിയുടെ മൂന്ന് രസങ്ങളും ബ്രേക്കില്ലതെ മുഖത്ത് മിന്നിമറയും.
ഈന്തപ്പഴം കൊണ്ടുള്ള വിഭവങ്ങളിലൊന്നും കൈവച്ചില്ലെ.; April 30, 2009 at 10:24 PM
ഉസ്മാന്‍ പള്ളിക്കരയില്‍ said...: Thank you for this post.; May 3, 2009 at 5:26 AM
ജസീര്‍ പുനത്തില്‍ said...: nannyittund!!; May 3, 2009 at 5:28 PM
ഹരിശ്രീ said...: മാമ്പഴപ്പുളിശ്ശേരി എന്റെ ഒരു ഇഷ്ടവിഭവം ആണ്...

:); May 4, 2009 at 9:25 AM
പിരിക്കുട്ടി said...: haai
kothiyaakunnu kandittu ....
maambazha pulissery kootiya kaalam marannu .....
njaan undaaki nokkum theerchayaayum; May 8, 2009 at 4:05 PM
Muralee Mukundan , ബിലാത്തിപട്ടണം said...: എഴുത്തോലവഴി എത്തിനോക്കിയ ഒരു കൊതിയനാണ് ഞൻ കേട്ടൊ...
കൊള്ളാം,വിഭവസമ്ര്ദം..
നന്ദി...; May 17, 2009 at 4:59 PM
KTK Nadery ™ said...: ഇന്ന് ആണ് ഈ വഴിക്ക് വന്നത്
"ഒരുനാള്‍ ഈ ബ്ലോഗെല്ലാം കൂടി ഞാന്‍ ചവച്ചരക്കും "; April 30, 2011 at 10:46 PM

ഞാന്‍.....

അടുക്കളച്ചൊല്ലുകള്‍.....

വിഭാഗങ്ങള്‍:

ഊണിനു സമയമായോ......?

മലയാളം ബ്ലോഗുകള്‍ ലിസ്റ്റ് ചെയ്യപ്പെടുന്ന ഇടങ്ങള്‍:

മാമ്പഴക്കാളൻ

17 പേർ അഭിപ്രായമറിയിച്ചു:

ഈ ബ്ലോഗിനേക്കുറിച്ച്...

എന്റെ മറ്റു ബ്ലോഗുകള്‍:

ഇപ്പോള്‍ വിരുന്നിനെത്തിവര്‍:

ഇതുവരെ സ്വാദു നോക്കിയവർ

Followers

പ്രധാന ബ്ലോഗിംഗ് സഹായികള്‍: