മുരിങ്ങയില ദോശ

സ്വാദിഷ്ടവും പോഷകസമ്പന്നവുമായ മുരിങ്ങയില എന്റെ ഇഷ്ടവിഭവമാണ്. പച്ചക്കറിക്കടകളിലോ സൂപ്പർമാർക്കറ്റുകളിലോ ലഭ്യമല്ലാത്ത മുരിങ്ങയിലയെപ്പറ്റി നാട്ടിൽനിന്നു പോന്നതിനുശേഷം ഞാൻ ഓർക്കാറേ ഇല്ലായിരുന്നു. എന്നാൽ ഈ അടുത്തകാലത്താണ്, തൊട്ടടുത്തുള്ള റസ്റ്റോറന്റിന്റെ വശത്തുനിൽക്കുന്ന,പൊടിപിടിച്ച ഇലകളുള്ള, മുരടിച്ച മരം മുരിങ്ങയാണെന്ന് യാദൃശ്ചികമായി ഞാൻ തിരിച്ചറിഞ്ഞത്! പിന്നെ ഒട്ടും താമസിച്ചില്ല, ആക്രമണം തുടങ്ങാൻ! മുരിങ്ങയില ഒടിക്കുന്ന എന്നെ കൗതുകത്തോടെ നോക്കിക്കടന്നുപോയ രണ്ടുമൂന്നു അറബികളെ കണ്ടില്ലെന്നു നടിച്ച് പെട്ടെന്നുതന്നെ ഇലകൾ ഒരു കവറിലൊതുക്കി ഒന്നുമറിയാത്തതുപോലെ തിരിച്ചുപോന്നു.



മുരിങ്ങയിലയിട്ട ഒരു ദോശയാവാം ആദ്യം.

ആവശ്യമുള്ള സാധങ്ങൾ:

പൊന്നി അരി: അരക്കിലോ
തേങ്ങ ചിരകിയത് : ഒരു മുറി.
മുരിങ്ങയില : അളവൊന്നും നോക്കണ്ട. കുറച്ച് - രണ്ടുമൂന്നു പിടി - എടുക്കുക. വേണമെങ്കിൽ കൂടുതലും ആവാം.
ഉപ്പ് : അവശ്യത്തിന്.

ഇത്രയും സാധനങ്ങളേ ഞങ്ങളുടെ വീട്ടിൽ എടുക്കാറുള്ളൂ. പിന്നെ ദോശയ്ക്ക് കുറച്ചു ‘ചൊടിയും ചുണയും’ വേണമെങ്കിൽ കായം, പച്ചമുളക്, ഉള്ളി, ഇഞ്ചി മുതലായവയൊക്കെ നിങ്ങളുടെ താല്പര്യമനുസരിച്ച് ചേർക്കാം.

ഉണ്ടാക്കുന്ന വിധം:

മുരിങ്ങയില ഓരോന്നായി തണ്ടിൽ നിന്ന് അടർത്തിയടുത്ത് കഴുകി വൃത്തിയാക്കുക.



അരി രണ്ടുമൂന്നു മണിക്കൂർ വെള്ളത്തിലിട്ട് കുതിർത്തിയ ശേഷം നന്നായി അരച്ചെടുക്കുക. അതിൽ തേങ്ങയും മുരിങ്ങയിലയും ആവശ്യത്തിന് ഉപ്പും വെള്ളവും ചേർത്ത് കട്ടിയായി കലക്കി വയ്ക്കുക.



ഇനി ദോശ ഉണ്ടാക്കാവുന്നതാണ്. അടതട്ടി പോലെ തന്നെ കുറച്ചു കട്ടിയിൽ വേണം പരത്താൻ. ദോശക്കല്ലിന്റെ ചൂട് നന്നായി കുറച്ചതിനുശേഷമേ മാവ് ഒഴിച്ചു പരത്താവൂ. അല്ലെങ്കിൽ പരത്തുമ്പോൾ മാവ് കല്ലിൽ നിന്നു വിട്ടുപോരും.



എണ്ണ പുരട്ടി തിരിച്ചും മറിച്ചുമിട്ട് രണ്ടുവശവും നന്നായി മൊരിച്ചെടുക്കുക.




ഇതാ, കറുമുറാന്നുള്ള മുരിങ്ങയില ദോശ! നല്ല ചൂടോടെയാണെങ്കിൽ വെറുതെയങ്ങ് തിന്നാം. നിർബന്ധമാണെങ്കിൽ ചട്ണിയോ ചമ്മന്തിയോ അച്ചാറോ കൂട്ടി കഴിയ്ക്കുക.