Thursday, September 12, 2013

കുമ്പളങ്ങ ഓലൻ

“ആലോലനീലമിഴിയാം പ്രിയയാൾ വിളമ്പും 
ഓലോലനൊന്നുമതി, എന്തിന്നു നൂറു കൂട്ടം”

എന്നത്രേ ഓലനെക്കുറിച്ചുള്ള ചൊല്ല്. സദ്യയിലെ ഒഴിച്ചുകൂടാനാവാത്ത വിഭവമാണ് ഓലൻ. അടിസ്ഥാനപരമായി ഒരു സദ്യയ്ക്ക് ‘നാലും വച്ചത്’ നിർബന്ധമാണ്. അതായത് കാളൻ, ഓലൻ, എരിശ്ശേരി, ഇഞ്ചിത്തൈര് (ഇഞ്ചിത്തൈര് നൂറ്റൊന്നു കറികൾക്കു സമാനമാണ്. വരരുചിയുടെ കഥ ഓർക്കുക) എന്നീ നാലു വിഭവങ്ങളാണ് ഒരു സദ്യയിൽ ഒഴിച്ചുകൂടാനാവാത്തത്. ഇവയും, ഉപ്പിലിട്ടതും(അച്ചാർ), പപ്പടവുമുണ്ടെങ്കിൽ ഒരു സദ്യയുടെ അടിസ്ഥാനമായി.  പിന്നെയുള്ളതെല്ലാം വിഭവസമൃദ്ധിയ്ക്കുവേണ്ടിയുള്ള കൂട്ടിച്ചേർക്കലുകളാണ്. അത് എത്രവേണമെങ്കിലും ആകാം. 

സദ്യയിലെ  ഏറ്റവും ലളിതമായ, യാതൊരു ഉപദ്രവവുമുണ്ടാക്കാത്ത, ഒരു പാവം വിഭവമാണ് ഓലൻ. എരിവും പുളിയുമൊക്കെ അധികം കഴിച്ചുതുടങ്ങിയിട്ടില്ലാത്ത പ്രായത്തിലുള്ള കുഞ്ഞിക്കുട്ടികൾക്ക് ചോറിൽ കൂട്ടി കൊടുക്കുവാൻ പറ്റിയ കറിയുമാണിത്. 

   ഓലൻ പലതരത്തിൽ ഉണ്ടാക്കാറുണ്ട്. കുമ്പളങ്ങയാണ് പ്രധാന കഥാപാത്രം. കുമ്പളങ്ങ മാത്രമായിട്ട്..., കുമ്പളങ്ങയും വൻ‌പയർ/പച്ചപ്പയർ ചേർത്ത്...., കുമ്പളങ്ങയും പയറും മത്തങ്ങയും ചേർത്ത്...., ഇങ്ങനെ  പലവിധത്തിൽ ഓലൻ തയ്യാറാക്കാം. 

ഞാനിപ്പോൾ പറയാൻ പോകുന്നത് കുമ്പളങ്ങയും തേങ്ങാപ്പാലും ചേർത്തുണ്ടാക്കുന്ന ഓലനെപ്പറ്റിയാണ്. 

ആവശ്യമുള്ള സാധനങ്ങൾ:
  • ഇളം കുമ്പളങ്ങ - അരക്കിലോ
  • നല്ല കുറുകിയ തേങ്ങാപ്പാൽ - ഒരു കപ്പ്
  • പാകത്തിന് ഉപ്പ്
  • വെളിച്ചെണ്ണ
ഉണ്ടാക്കുന്ന വിധം:

കുമ്പളങ്ങ തൊലിയും കുരുവും കളഞ്ഞ് വൃത്തിയാക്കി, പരന്ന കഷ്ണങ്ങളായി നുറുക്കുക.
ഈ കഷ്ണങ്ങൾ നല്ല മയത്തിൽ വേവിച്ചെടുക്കുക. കുക്കറിലാണ് വേവിക്കുന്നതെങ്കിൽ വെള്ളം തീരെ ചേർക്കണ്ട.  കുമ്പളങ്ങയിൽ നിന്ന് ഊറി വരുന്ന വെള്ളം മാത്രം മതിയാവും വെന്തുകിട്ടാൻ.
വെന്ത കുമ്പളങ്ങയിലേക്ക് തേങ്ങാപ്പാലും പാകത്തിന് ഉപ്പും ചേർത്ത് അടുപ്പത്തു വയ്ക്കുക.
നന്നായി തിളച്ചു കുറുകിയാൽ വാങ്ങാം. വാങ്ങിവച്ച ശേഷം വെളിച്ചെണ്ണ ഒഴിച്ചിളക്കി ഉടനെ കുറച്ചുനേരം അടച്ചു വയ്ക്കുക.
ഓലനിതാ തയ്യാറായിക്കഴിഞ്ഞു! വളരെയെളുപ്പം. അല്ലേ?
സദ്യയ്ക്ക്, തൂശനിലയുടെ മുകൾഭാഗത്ത്, വലത്തേയറ്റത്തുള്ള എരിശ്ശേരിയുടെ ഇടതുഭാഗത്താണ് ഓലന്റെ സ്ഥാനം.

3 പേർ അഭിപ്രായമറിയിച്ചു:

ബിന്ദു കെ പി said...

വളരെ നാളുകൾക്കുശേഷം വീണ്ടും അടുക്കളത്തളത്തിൽ............

കാഴ്ചകളിലൂടെ said...

go ahead..... we are following

rag said...

chechi evideyayirunnu?

Related Posts Plugin for WordPress, Blogger...

Copyright © Bindu Krishnaprasad. All rights reserved.

പകർപ്പവകാശം ബ്ലോഗുടമയായ ബിന്ദു കൃഷ്ണപ്രസാദിനു മാത്രം.



Back to TOP