അടുക്കളത്തളം: ചേമ്പിൻ താൾ - കൊള്ളിക്കിഴങ്ങ് മൊളോഷ്യം

അടുക്കളച്ചൊല്ലുകള്‍.....

“അന്ന വിചാരം മുന്നവിചാരം, പിന്നെ വിചാരം കാര്യവിചാരം”
“ഉപ്പോളം വരുമോ ഉപ്പിലിട്ടത്”
“അരി വിതച്ചാൽ നെല്ലു വിളയാ”
“മുളയിലറിയാം വിള”
“ആര്യൻ വിതച്ചാൽ നവര വിളയുമോ?”
“നവര നട്ടാൽ തുവരയുണ്ടാകുമോ?”
“ഒരു വിത്ത് വിതച്ചാൽ പല വിത്ത് വിളയാ”
“കണ്ണൻ വാഴച്ചുവട്ടിൽ കദളിവാഴയുണ്ടാകുമോ?”
“അമരയും അപരാധവും കുറച്ചുമതി”
“ഉണ്ണാനില്ലാഞ്ഞാൽ വിത്ത്; ഉടുക്കാനില്ലാഞ്ഞാൽ പട്ട്”
“വിത്തുഗുണം പത്തുഗുണം”
“ചൊല്ല് പഴയതായാലും വിത്ത് പഴയതാവരുത്”
“വിശപ്പിനു രുചിയില്ല”
“തവിയറിയുമോ കറിയുടെ രസം?”
“കാന്താരിമുളകെന്തിനാ അധികം?”
“കർക്കിടകച്ചേന കട്ടിട്ടെങ്കിലും തിന്നണം”
“മെല്ലെത്തിന്നാൽ മുള്ളും തിന്നാം”
“പയ്യെത്തിന്നാൽ പനയും തിന്നാം”
“വിത്തെടുത്തുണ്ണരുത്”
“ഉണ്ടെങ്കിലോണം പോലെ ഇല്ലെങ്കിലേകാദശി”
“വെളുക്കുന്നതിനു മുൻപേ അരിവെയ്ക്കണം; അരിവെയ്ക്കുന്നതിനു മുൻപേ കറിവെയ്ക്കരുത്”
“വേണമെങ്കിൽ ചക്ക വേരിലും കായ്ക്കും!”
“എണ്ണിയ പയറ് അളക്കേണ്ട”
“മരത്തിന് കായ കനമല്ല”
“ഉരിനെല്ലൂരാൻ പോയിട്ട് പത്തുപറ നെല്ല് പന്നി തിന്നു”
“മക്കളെ കണ്ടും മാമ്പൂ കണ്ടും കൊതിക്കരുത്”
“ഉച്ചാറലുച്ചയ്ക്ക് വെള്ളാരി നട്ടാൽ വിഷു ഉച്ചയ്ക്ക് പറിക്കാം”
“കർക്കിടകത്തിൽ പത്തില കറിവെച്ചു കൂട്ടണം”
“കാണം വിറ്റും ഓണം ഉണ്ണണം”
“പത്തായം പട്ടിണി കിടക്കരുത്”
“നിലം നികത്തി വീടു വയ്ക്കരുത്”
“തൊഴുതുണ്ണുന്ന ചോറിനേക്കാ‍ൾ ഉഴുതുണ്ണുന്ന ചോറ്”
“വാഴ നനഞ്ഞാൽ ചീരയും നനയും”
“കയ്യാടിയാലേ വയറാടൂ”
“അവിയലിൽ ചേരാത്ത കഷ്ണമില്ല!”
“അണ്ടിയോടടുക്കുമ്പോഴറിയാം, മാങ്ങയുടെ പുളി!”
“അത്താഴമുണ്ടാൽ അരക്കാതം നടക്കണം, മുത്താഴമുണ്ടാൽ മുള്ളിലും കിടക്കണം”
“അധികം വിളഞ്ഞാൽ വിത്തിനും കൊള്ളാ”
“അധികമായാൽ അമൃതും വിഷം”
“അപ്പം തിന്നാൽ മതി; കുഴിയെണ്ണേണ്ട”
“അമ്മിയോടു ചോദിച്ചിട്ടാണോ അരയ്ക്കുന്നത്?”
“അരനാഴിയേ ഉള്ളെങ്കിലും അടുപ്പുകല്ലു മൂന്നു വേണം”
“അരിയെത്ര? പയറഞ്ഞാഴി”
“അഴകുള്ള ചക്കയിൽ ചുളയില്ല!”
“ആറ്റിൽ കളഞ്ഞാലും അളന്നു കളയണം”
“ഉണ്ട ചോറിൽ കല്ലിടരുത്”
“ഉണ്ടവന് പാ കിട്ടാഞ്ഞ്, ഉണ്ണാത്തവന് ഇല കിട്ടാഞ്ഞ്”
“ഉപ്പു തിന്നവൻ വെള്ളം കുടിക്കും”
“ഉള്ള കഞ്ഞിയിൽ പാറ്റ ഇടുക”
“എണ്ണിച്ചുട്ട അപ്പം പോലെ”
“എല്ലു മുറിയെ പണിതാൽ പല്ലു മുറിയേ തിന്നാം”
“കല്ലാടും മുറ്റത്ത് നെല്ലാടുകില്ല”
“കറിക്ക് ചേരാത്ത കഷ്ണം നുറുക്കരുത്”
“ചക്കയ്ക്ക് ചുക്ക്; മാങ്ങയ്ക്ക് തേങ്ങ”
“ഞാറുറച്ചാൽ ചോറുറച്ചു”
“തിന്ന ചോറിന് നന്ദി വേണം”
“മത്ത കുത്തിയാൽ കുമ്പളം മുളയ്ക്കുമോ?”
“പത്തായം പെറും, ചക്കി കുത്തും, അമ്മ വയ്ക്കും, ഞാനുണ്ണും”
“പന്തിയ്ക്കു മുമ്പും പടയ്ക്കു പിമ്പും ”
“പറ നിറയെ പതിരാണെങ്കിലും പാറ്റി നോക്കിയാൽ മണി കാണാം”
“ആലോലനീലമിഴിയാം പ്രിയയാൾ വിളമ്പും ഓലോലനൊന്നു മതി; എന്തിന്നു നൂറു കൂട്ടം?”

പണ്ടത്തെ ചില തട്ടിക്കൂട്ടു വിഭവങ്ങളിൽ പെടുന്നതാണ് ഇതൊക്കെ. അന്നൊക്കെ എത്ര ഇല്ലായ്മ ആണെങ്കിലും, ഒരു മുറവുമായി പറമ്പിലൊന്ന് ചുറ്റിവരുമ്പോഴേക്കും അന്നത്തെ കൂട്ടാനുള്ള വകകൾ എന്തെങ്കിലുമൊക്കെ ഒപ്പിച്ചിട്ടുണ്ടാവും അമ്മയും അമ്മമ്മയുമൊക്കെ. അത്തരത്തിലുള്ള, വളരെ ലളിതമായ ഒരു വിഭവമാണിത്. ഏറെ സ്വാദിഷ്ടവും.

ആവശ്യമുള്ള സാധനങ്ങൾ:

ചേമ്പിൻ‌തണ്ട് - കാൽ കിലോ (കൃത്യമായ അളവൊന്നും വേണമെന്നില്ല. ഒരു കൈക്കണക്ക്. അത്രേയുള്ളൂ)
കൊള്ളിക്കിഴങ്ങ് - ഏതാണ്ട് കാൽ കിലോ
മഞ്ഞൾപ്പൊടി
കാന്താരിമുളക് - ആവശ്യത്തിന്
ചുവന്നുള്ളി - ഒരു പിടി
ഉപ്പ്, വെളിച്ചെണ്ണ, കറിവേപ്പില

ഉണ്ടാക്കുന്ന വിധം:
കിഴങ്ങ് തൊലി കളഞ്ഞ് ചെറിയ കഷ്ണങ്ങളാക്കുക.
താൾ പുറം‌തൊലി ചീകിക്കളഞ്ഞ് വട്ടത്തിലരിയുക.
ചുവന്നുള്ളി ചെറുതായി അരിയുക.

കൊള്ളിക്കഷ്ണങ്ങൾ വെള്ളമൊഴിച്ച് മഞ്ഞൾപ്പൊടിയും കാന്താരിമുളകും ഉപ്പും ചേർത്ത് വേവിക്കുക. ചെറുതീയിൽ വച്ചാൽ മതി. ഇടയ്ക്കിടെ ഇളക്കിക്കൊടുത്തില്ലെങ്കിൽ വെന്തുതുടങ്ങുമ്പോൾ കൊള്ളി കരിഞ്ഞുപിടിക്കും. (കുക്കറിൽ വേവിച്ചെടുത്താലും മതി). വേവായാൽ താൾ അരിഞ്ഞത് ചേർക്കുക. വെള്ളം പോരെങ്കിൽ കുറച്ച് ചേർക്കാം. വളരെ വേഗം താൾ വെന്തു യോജിക്കും. ഉപ്പും എരിവുമൊക്കെ പാകത്തിനാണോന്നു നോക്കിയശേഷം കറിവേപ്പിലയിട്ട് വാങ്ങിവയ്ക്കാം.

ഇതിലേക്ക് ചുവന്നുള്ളി വെളിച്ചെണ്ണയിൽ മൂപ്പിച്ചതും കൂടി ചേർത്താൽ മൊളോഷ്യം റെഡി!

ഈ ബ്ലോഗിനേക്കുറിച്ച്...

ഒരു പാചകവിദഗ്ദ്ധയാണെന്ന അവകാശവാദമൊന്നും ഇല്ല കേട്ടോ.. എനിയ്ക്കറിയാവുന്ന ചിലത് നിങ്ങളുമായി പങ്കുവയ്ക്കുന്നു എന്നുമാത്രം.
പണ്ടത്തെ തനതു വിഭവങ്ങളെ അതേപടി, അതേ പേരുകളോടെ‍ തന്നെയാണ് ഇവിടെ പരിചയപ്പെടുത്തുന്നത്. പേരുകള്‍ക്കോ, ഉണ്ടാക്കുന്ന രീതികള്‍ക്കോ പ്രാദേശികമായ വ്യത്യാസങ്ങളുണ്ടാകുമല്ലോ. അതേക്കുറിച്ചുള്ള അന്വേഷണം കൂടിയാണ് ഓരോ കുറിപ്പും. നിങ്ങൾക്കറിയാവുന്നത് പറയുമല്ലോ..?
ഇതിൽ പറയുന്ന കുറിപ്പുകളിൽ ഏതെങ്കിലും നിങ്ങൾക്ക് ഇഷ്ടപ്പെട്ടുവെങ്കിൽ, ഉപകാരപ്രദമായെങ്കിൽ, അതിന് ഞാൻ കടപ്പെട്ടിരിക്കുന്നത് അടുക്കളയെന്ന ലോകം നന്നായറിഞ്ഞു വളർന്ന സാഹചര്യങ്ങളോടും എന്റെ അമ്മയോടുമാണ്.

4 പേർ അഭിപ്രായമറിയിച്ചു:

habeeba said...: ചേമ്പിന്‍ താള്‍ വിളമ്പിയത് നന്നായി; October 18, 2012 at 2:54 PM
Mélange said...: Onnantharam..ithrem naadan vibhavam kazhicha kaalam marannu...Prathyekichu chembin thaal.Aadyathe click enikku valare pidichu..Kohityayittu vayya..nalla oru pazhama manakkunnu.; October 19, 2012 at 9:57 AM
Shahid Ibrahim said...: ചേച്ചിയുടെ ബ്ലോഗ്‌ ഉള്ള കാരണം അത്യാവശ്യം നല്ല ഭക്ഷണങ്ങള്‍ കഴിക്കാന്‍ സാധിക്കുന്നു.എന്റെ ഭാര്യ ഈ ബ്ലോഗ്‌ മൊത്തം ഡൌണ്‍ലോഡ് ചെയ്തു വെച്ചിരിക്കുകയാ.നെറ്റ് എല്ലാതപ്പോളും ഉപയോഗിക്കാന്‍ വേണ്ടി.നന്ദി ചേച്ചീ..; October 25, 2012 at 10:18 PM
lijojohn said...: ചേബിൻ താൾ മാത്രം ഉപ്പേരി ഉണ്ടാക്കാൻ പറഞ്ഞു തരാമോ ? നന്ദി; October 30, 2013 at 8:57 AM

ഞാന്‍.....

അടുക്കളച്ചൊല്ലുകള്‍.....

വിഭാഗങ്ങള്‍:

ഊണിനു സമയമായോ......?

മലയാളം ബ്ലോഗുകള്‍ ലിസ്റ്റ് ചെയ്യപ്പെടുന്ന ഇടങ്ങള്‍:

ചേമ്പിൻ താൾ - കൊള്ളിക്കിഴങ്ങ് മൊളോഷ്യം

4 പേർ അഭിപ്രായമറിയിച്ചു:

ഈ ബ്ലോഗിനേക്കുറിച്ച്...

എന്റെ മറ്റു ബ്ലോഗുകള്‍:

ഇപ്പോള്‍ വിരുന്നിനെത്തിവര്‍:

ഇതുവരെ സ്വാദു നോക്കിയവർ

Followers

പ്രധാന ബ്ലോഗിംഗ് സഹായികള്‍: