അടുക്കളത്തളം: ചൗവ്വരി ഉപ്പുമാവ് (Sabudana Khichdi)

അടുക്കളച്ചൊല്ലുകള്‍.....

“അന്ന വിചാരം മുന്നവിചാരം, പിന്നെ വിചാരം കാര്യവിചാരം”
“ഉപ്പോളം വരുമോ ഉപ്പിലിട്ടത്”
“അരി വിതച്ചാൽ നെല്ലു വിളയാ”
“മുളയിലറിയാം വിള”
“ആര്യൻ വിതച്ചാൽ നവര വിളയുമോ?”
“നവര നട്ടാൽ തുവരയുണ്ടാകുമോ?”
“ഒരു വിത്ത് വിതച്ചാൽ പല വിത്ത് വിളയാ”
“കണ്ണൻ വാഴച്ചുവട്ടിൽ കദളിവാഴയുണ്ടാകുമോ?”
“അമരയും അപരാധവും കുറച്ചുമതി”
“ഉണ്ണാനില്ലാഞ്ഞാൽ വിത്ത്; ഉടുക്കാനില്ലാഞ്ഞാൽ പട്ട്”
“വിത്തുഗുണം പത്തുഗുണം”
“ചൊല്ല് പഴയതായാലും വിത്ത് പഴയതാവരുത്”
“വിശപ്പിനു രുചിയില്ല”
“തവിയറിയുമോ കറിയുടെ രസം?”
“കാന്താരിമുളകെന്തിനാ അധികം?”
“കർക്കിടകച്ചേന കട്ടിട്ടെങ്കിലും തിന്നണം”
“മെല്ലെത്തിന്നാൽ മുള്ളും തിന്നാം”
“പയ്യെത്തിന്നാൽ പനയും തിന്നാം”
“വിത്തെടുത്തുണ്ണരുത്”
“ഉണ്ടെങ്കിലോണം പോലെ ഇല്ലെങ്കിലേകാദശി”
“വെളുക്കുന്നതിനു മുൻപേ അരിവെയ്ക്കണം; അരിവെയ്ക്കുന്നതിനു മുൻപേ കറിവെയ്ക്കരുത്”
“വേണമെങ്കിൽ ചക്ക വേരിലും കായ്ക്കും!”
“എണ്ണിയ പയറ് അളക്കേണ്ട”
“മരത്തിന് കായ കനമല്ല”
“ഉരിനെല്ലൂരാൻ പോയിട്ട് പത്തുപറ നെല്ല് പന്നി തിന്നു”
“മക്കളെ കണ്ടും മാമ്പൂ കണ്ടും കൊതിക്കരുത്”
“ഉച്ചാറലുച്ചയ്ക്ക് വെള്ളാരി നട്ടാൽ വിഷു ഉച്ചയ്ക്ക് പറിക്കാം”
“കർക്കിടകത്തിൽ പത്തില കറിവെച്ചു കൂട്ടണം”
“കാണം വിറ്റും ഓണം ഉണ്ണണം”
“പത്തായം പട്ടിണി കിടക്കരുത്”
“നിലം നികത്തി വീടു വയ്ക്കരുത്”
“തൊഴുതുണ്ണുന്ന ചോറിനേക്കാ‍ൾ ഉഴുതുണ്ണുന്ന ചോറ്”
“വാഴ നനഞ്ഞാൽ ചീരയും നനയും”
“കയ്യാടിയാലേ വയറാടൂ”
“അവിയലിൽ ചേരാത്ത കഷ്ണമില്ല!”
“അണ്ടിയോടടുക്കുമ്പോഴറിയാം, മാങ്ങയുടെ പുളി!”
“അത്താഴമുണ്ടാൽ അരക്കാതം നടക്കണം, മുത്താഴമുണ്ടാൽ മുള്ളിലും കിടക്കണം”
“അധികം വിളഞ്ഞാൽ വിത്തിനും കൊള്ളാ”
“അധികമായാൽ അമൃതും വിഷം”
“അപ്പം തിന്നാൽ മതി; കുഴിയെണ്ണേണ്ട”
“അമ്മിയോടു ചോദിച്ചിട്ടാണോ അരയ്ക്കുന്നത്?”
“അരനാഴിയേ ഉള്ളെങ്കിലും അടുപ്പുകല്ലു മൂന്നു വേണം”
“അരിയെത്ര? പയറഞ്ഞാഴി”
“അഴകുള്ള ചക്കയിൽ ചുളയില്ല!”
“ആറ്റിൽ കളഞ്ഞാലും അളന്നു കളയണം”
“ഉണ്ട ചോറിൽ കല്ലിടരുത്”
“ഉണ്ടവന് പാ കിട്ടാഞ്ഞ്, ഉണ്ണാത്തവന് ഇല കിട്ടാഞ്ഞ്”
“ഉപ്പു തിന്നവൻ വെള്ളം കുടിക്കും”
“ഉള്ള കഞ്ഞിയിൽ പാറ്റ ഇടുക”
“എണ്ണിച്ചുട്ട അപ്പം പോലെ”
“എല്ലു മുറിയെ പണിതാൽ പല്ലു മുറിയേ തിന്നാം”
“കല്ലാടും മുറ്റത്ത് നെല്ലാടുകില്ല”
“കറിക്ക് ചേരാത്ത കഷ്ണം നുറുക്കരുത്”
“ചക്കയ്ക്ക് ചുക്ക്; മാങ്ങയ്ക്ക് തേങ്ങ”
“ഞാറുറച്ചാൽ ചോറുറച്ചു”
“തിന്ന ചോറിന് നന്ദി വേണം”
“മത്ത കുത്തിയാൽ കുമ്പളം മുളയ്ക്കുമോ?”
“പത്തായം പെറും, ചക്കി കുത്തും, അമ്മ വയ്ക്കും, ഞാനുണ്ണും”
“പന്തിയ്ക്കു മുമ്പും പടയ്ക്കു പിമ്പും ”
“പറ നിറയെ പതിരാണെങ്കിലും പാറ്റി നോക്കിയാൽ മണി കാണാം”
“ആലോലനീലമിഴിയാം പ്രിയയാൾ വിളമ്പും ഓലോലനൊന്നു മതി; എന്തിന്നു നൂറു കൂട്ടം?”

ചൗവ്വരി നമ്മൾ കേരളീയർക്ക് അത്ര പഥ്യമുള്ള സാധനമല്ല. പക്ഷേ മഹാരാഷ്ട്രക്കാർക്ക് ഇതുകൊണ്ടുള്ള ഉപ്പുമാവ് ഏറെ പ്രിയപ്പെട്ട പ്രാതൽ വിഭവമാണ്. സാബുദാന കിച്ച്ഡി എന്നാണ് അവർ പറയുന്ന പേര്. നമുക്കും ഇത് പരീക്ഷിക്കാവുന്നതേയുള്ളു. ചൗവ്വരിയും വറുത്ത കപ്പലണ്ടിയും ഉരുളക്കിഴങ്ങുമാണ് ഇതിലെ പ്രധാന ചേരുവകൾ. ഇതെല്ലാം കൂടി ചേർന്ന് വളരെ രസകരമായ വിഭവമാണ് സാബുദാന കിച്ച്ഡി. നമുക്കൊന്നു നോക്കാം:

ആവശ്യമുള്ള സാധനങ്ങൾ:

ചൗവ്വരി - 100 ഗ്രാം
കപ്പലണ്ടി - 50 ഗ്രാം
ഇടത്തരം വലുപ്പമുള്ള ഉരുളക്കിഴങ്ങ് - 1
തേങ്ങ ചിരകിയത് - ഒരു പിടി
പഞ്ചസാര - അര ടീസ്പൂൺ
ചെറുനാരങ്ങാനീര് - 1-2 ടീസ്പൂൺ
പച്ചമുളക് - ആവശ്യത്തിന് (ഏകദേശം 2 എണ്ണം)
ജീരകം - 1 ടീസ്പൂൺ
പാചകയെണ്ണ (വെളിച്ചെണ്ണ ഒഴിച്ചുള്ള ഏതും) - ആവശ്യത്തിന്
വറുത്തിടാനുള്ള കടുക്, കറിവേപ്പില
കുറച്ച് മല്ലിയില

ഉണ്ടാക്കുന്ന വിധം:

ചൗവ്വരി പാകത്തിന് കുതിർത്ത് തയ്യാറാക്കുക എന്നതാണ് ഇതിലെ സുപ്രധാനമായ കാര്യം.

ചൗവ്വരി പലതരത്തിലുണ്ട്. ഏറ്റവും നല്ലയിനമാണെങ്കിൽ കുതിർത്താൽ ഒട്ടും കുഴയാതെ ഇരിക്കും. ചിലതൊക്കെ വെള്ളത്തിലിടുമ്പോഴേക്കും ആകെ കലങ്ങിപ്പോകും. തീരെ ചെറിയ‌ഇനം ഒട്ടും അനുയോജ്യമല്ല. അത് ശ്രദ്ധിക്കണം. ചിലർ മൂന്നുമണിക്കൂറോളം വെള്ളത്തിലിടാറുണ്ട്. ചിലരാകട്ടെ, വെള്ളത്തിലിടുകയേ ഇല്ല. നന്നായി കഴുകിയെടുത്തശേഷം അഞ്ചാറുമണിക്കൂർ അടച്ചുവയ്ക്കുകയേ ഉള്ളു. ചുരുക്കിപ്പറഞ്ഞാൽ, നമുക്കു കിട്ടുന്ന ചൗവ്വരിയുടെ പ്രകൃതം നോക്കി യുക്തമായ രീതിയിൽ ചെയ്തെടുക്കുകയേ നിവൃത്തിയുള്ളു. ഉണ്ടാക്കാൻ പുറപ്പെടുന്നതിനുമുമ്പ് ചൗവ്വരി ഒന്നോ രണ്ടോ സ്പൂൺ എടുത്ത് കുതിർത്തിനോക്കി ഏകദേശ ധാരണ ഉണ്ടാക്കുന്നത് നല്ലതാണ്.

ചൗവ്വരി നന്നായി കഴുകിയശേഷം വെള്ളത്തിലിടുക. നാട്ടിലും ഗൾഫിലുമൊക്കെ കിട്ടുന്ന ചൗവ്വരി സാധാരണ ഗതിയിൽ 15 മിനിട്ട് അല്ലെങ്കിൽ മാക്സിമം അര മണിക്കൂർ ഇട്ടാൽ മതിയാവും. അതിനുശേഷം വെള്ളം നിശ്ശേഷം ഊറ്റിക്കളഞ്ഞ് ഒരു മണിക്കൂറോളം വയ്ക്കുക. നല്ലയിനം ചൗവ്വരിയാണെങ്കിൽ നന്നായി കുതിർന്ന്, എന്നാൽ ഒട്ടും കുഴയാതെ, നല്ല മുത്തുമണികൾ പോലെ ആയിട്ടുണ്ടാവും.

ഉരുളക്കിഴങ്ങ് പുഴുങ്ങി, തൊലികളഞ്ഞ്, കഷ്ണങ്ങളാക്കിവയ്ക്കുക.

കപ്പലണ്ടി വറുത്ത് തരുതരുപ്പായി പൊടിച്ചുവയ്ക്കുക. മിക്സിയിലിട്ട് ഒന്നു തിരിച്ചാൽ മതി.

ഒരു ഫ്രയിങ്ങ് പാനിൽ എണ്ണയൊഴിച്ച് കടുകും കറിവേപ്പിലയും ഇട്ടിളക്കുക. കടുക് പൊട്ടിയാൽ ജീരകമിട്ട് മൂപ്പിക്കുക. ഇതിലേക്ക് പച്ചമുളക് അരിഞ്ഞതും ഉരുളക്കിഴങ്ങ് കഷ്ണങ്ങളും ചേർത്തിളക്കുക. സ്വല്പം ഉപ്പ് ചേർക്കാം.

ഉരുളക്കിഴങ്ങ് മൊരിഞ്ഞുവരുമ്പോൾ തേങ്ങ ചേർക്കാം.

ഇനി തയ്യാറാക്കിവച്ചിരിക്കുന്ന ചൗവ്വരിയും കപ്പലണ്ടിപ്പൊടിയും ചേർക്കുക.

പഞ്ചസാരയും പോരാത്ത ഉപ്പും ചെറുനാരങ്ങാനീരും ചേർത്ത് എല്ലാം കൂടി നന്നായി ഇളക്കി യോജിപ്പിക്കുക. ഈ വിഭവത്തിൽ വെള്ളം ഒട്ടും ചേർക്കേണ്ട ആവശ്യമില്ല.

മല്ലിയില അരിഞ്ഞതും ചേർത്ത് ചെറുതീയിൽ കുറച്ചുനേരം അടച്ചുവയ്ക്കുക. ഇടയ്ക്ക് ഇളക്കിക്കൊടുക്കണം. അതിനുശേഷം വാങ്ങാം.

ഇത്രേയുള്ളു! ചൂടോടെ കഴിക്കണം. തണുത്താൽ റബ്ബറുപോലെ ആയിപ്പോവും.

ഈ ബ്ലോഗിനേക്കുറിച്ച്...

ഒരു പാചകവിദഗ്ദ്ധയാണെന്ന അവകാശവാദമൊന്നും ഇല്ല കേട്ടോ.. എനിയ്ക്കറിയാവുന്ന ചിലത് നിങ്ങളുമായി പങ്കുവയ്ക്കുന്നു എന്നുമാത്രം.
പണ്ടത്തെ തനതു വിഭവങ്ങളെ അതേപടി, അതേ പേരുകളോടെ‍ തന്നെയാണ് ഇവിടെ പരിചയപ്പെടുത്തുന്നത്. പേരുകള്‍ക്കോ, ഉണ്ടാക്കുന്ന രീതികള്‍ക്കോ പ്രാദേശികമായ വ്യത്യാസങ്ങളുണ്ടാകുമല്ലോ. അതേക്കുറിച്ചുള്ള അന്വേഷണം കൂടിയാണ് ഓരോ കുറിപ്പും. നിങ്ങൾക്കറിയാവുന്നത് പറയുമല്ലോ..?
ഇതിൽ പറയുന്ന കുറിപ്പുകളിൽ ഏതെങ്കിലും നിങ്ങൾക്ക് ഇഷ്ടപ്പെട്ടുവെങ്കിൽ, ഉപകാരപ്രദമായെങ്കിൽ, അതിന് ഞാൻ കടപ്പെട്ടിരിക്കുന്നത് അടുക്കളയെന്ന ലോകം നന്നായറിഞ്ഞു വളർന്ന സാഹചര്യങ്ങളോടും എന്റെ അമ്മയോടുമാണ്.

12 പേർ അഭിപ്രായമറിയിച്ചു:

Unknown said...: :); March 29, 2012 at 2:02 PM
Mélange said...: ha,ithile prathanappetta karyam aa tips aanu.sathyathil palappozhum kuzhangippokarullathu kondu ee chowari prathaman undakkumpolallathe ippo upayogikkreyilla.lemme try Bindu..enthannu vachal bindu undakkunnathu kanumpol pachakam madhuramayoru anubhavam pole..simple and sweet !; March 29, 2012 at 4:43 PM
റോസാപ്പൂക്കള്‍ said...: ഇരിപ്പിടത്തിലൂടെ ആണ് ഇവിടെ എത്തിയത്.എത്ര നല്ല വിഭവങ്ങളാണ് ബിന്ദു ഇവിടെ വിളമ്പുന്നത്.കുറച്ചു വൈകിപ്പോയി എന്നാലും എനിക്കും വേണം ഇതെല്ലാം.; March 31, 2012 at 9:33 AM
kochumol(കുങ്കുമം) said...: എന്തായാലും ബിന്ദുവിന്റെ വിഭവങ്ങള്‍ കഴിക്കാന്‍ ഞാനും ഉണ്ട് ട്ടോ ...:); March 31, 2012 at 12:00 PM
Heera said...: hey bindu.... on every tuesday most of the maharashtrians tiffins is sabudana khichdi.... u can make sabudana vadda also...... mumbaiyil varunnathinu mumbu njanithu payasathilittu mathrame kazhichittullu.... pics looks tempting; April 2, 2012 at 1:55 PM
ശ്രീലാല്‍ said...: കൊള്ളാലോ,, ഈ സാബുവിനെ ആദ്യമായി പരിചയപ്പെട്ടത് കഴിഞ്ഞാഴ്ചയാണ്. ഗുജറാത്തുകാരനായ സഹപ്ര. ഉണ്ടാക്കിക്കൊണ്ടുവന്നു. കിടിലൻ ടേസ്റ്റ്. റെസിപ്പി ചോദിച്ചപ്പൊ പുള്ളി മെയിലയച്ചത് ഇങ്ങനെ.

Ek pan mai 3-4 spoon oil le(according to sabubana),usme jeera ,hingh,hari mirch or khdhi patta dale,
ab usmai boile potatoes chopped, sabudana, smash peanuts, salt, suger, lemon, and red chili powder dale or achche se hilaye....aap che to usme thoda sa hra dhaniya or sath mai fast vala mixture mila sakte hai...khichdi or bhi tasty lagei

എനിക്കാണെങ്കിൽ ഹിന്ദിയിൽ വളരെ പരിജ്ഞാനമുള്ളതുകൊണ്ട് ഞാൻ അവനെ വിളിച്ച് ഇതിനെ മലയാളത്തിലാക്കാൻ ഇരിക്കുകയായിരുന്നു. ഇന്ന് ജോലികഴിഞ്ഞ് വരുമ്പോൾ അരക്കിലോ സാബുധാന്യത്തെ വാങ്ങിയിട്ടുണ്ടായിരുന്നു. എന്നിട്ടിപ്പോ അടുക്കളത്തളത്തിൽ വരുമ്പോ ദേ സംഭവം റെഡി.. കിടിലൻ ടൈമിങ്ങ് .. thnaks a lot ....

ഉടൻ പരീക്ഷിക്കുന്നു... പ്രതീക്ഷിപ്പിൻ :); April 3, 2012 at 10:50 PM
ബിന്ദു കെ പി said...: ശ്രീലാലേ, സാബുദാന എന്തു പരുവം ആയി? പരീക്ഷിച്ചൊ?; April 5, 2012 at 8:23 PM
ശ്രീലാല്‍ said...: പാചകവിധി എഴുതിയെടുക്കുന്നു... നാളെയാണ്.. നാളെയാണ്... :); April 5, 2012 at 11:10 PM
ശ്രീലാല്‍ said...: വേവാൻ എത്ര സമയാമെടുക്കും ?
3 പേർക്കുള്ള ബ്രേക്ഫാസ്റ്റിനു എത്ര കപ്പു സാബു വേണം ?; April 5, 2012 at 11:18 PM
ബിന്ദു കെ പി said...: അയ്യോ! ഇപ്പഴാ കമന്റ് കണ്ടത്. ഉണ്ടാക്കിക്കഴിഞ്ഞോ? ഒരു 200 ഗ്രാമൊക്കെ ഉണ്ടെങ്കിൽ മൂന്നു പേർക്ക് കഴിക്കാൻ ധാരാളമുണ്ടാവും.
പിന്നെ, നമ്മളിത് വെള്ളമൊഴിച്ച് വേവിക്കുന്നൊന്നുമില്ലല്ലോ...എല്ലാം കൂടി ചേർത്ത് ചെറുതീയിൽ ഒരു 10 മിനിട്ടൊ മറ്റോ അടച്ചുവയ്ക്കണം അത്രേയുള്ളു. ശരിയായ രീതിയിൽ കുതിർത്തി എടുക്കുക എന്നതാണ് ഇമ്പോർട്ടന്റ് സ്റ്റെപ്പ്.; April 6, 2012 at 3:19 PM
ശ്രീലാല്‍ said...: യെസ്. യെസ്.. നന്നായിരുന്നു.. ആധികാരികമായി നുമ്മടെ ഗുജറാത്തി സുഹൃത്തിനെക്കൊണ്ട് തീറ്റിച്ച് ഫീഡ്ബാക്ക് വാങ്ങി. :)

എരിവു കുറവ്, ഉരുളക്കിഴങ്ങിന്റെ വലിപ്പം കൂടുതൽ ഇത്രയേ കുഴപ്പമുള്ളൂ... ലേശം മഞ്ഞൾപ്പൊടി കൂടി ഇടാൻ പറഞ്ഞു.

thank you !; April 9, 2012 at 9:13 PM
ബിന്ദു കെ പി said...: ഹോ, സമാധാനമായി! :)
അവിടന്ന് പിന്നെ അനക്കമൊന്നുമില്ലാതായപ്പോൾ പണി പാളിയോന്ന് സംശയിച്ചു :); April 9, 2012 at 9:50 PM

ഞാന്‍.....

അടുക്കളച്ചൊല്ലുകള്‍.....

വിഭാഗങ്ങള്‍:

ഊണിനു സമയമായോ......?

മലയാളം ബ്ലോഗുകള്‍ ലിസ്റ്റ് ചെയ്യപ്പെടുന്ന ഇടങ്ങള്‍:

ചൗവ്വരി ഉപ്പുമാവ് (Sabudana Khichdi)

12 പേർ അഭിപ്രായമറിയിച്ചു:

ഈ ബ്ലോഗിനേക്കുറിച്ച്...

എന്റെ മറ്റു ബ്ലോഗുകള്‍:

ഇപ്പോള്‍ വിരുന്നിനെത്തിവര്‍:

ഇതുവരെ സ്വാദു നോക്കിയവർ

Followers

പ്രധാന ബ്ലോഗിംഗ് സഹായികള്‍: