അടുക്കളത്തളം: കൊഴുക്കട്ട

അടുക്കളച്ചൊല്ലുകള്‍.....

“അന്ന വിചാരം മുന്നവിചാരം, പിന്നെ വിചാരം കാര്യവിചാരം”
“ഉപ്പോളം വരുമോ ഉപ്പിലിട്ടത്”
“അരി വിതച്ചാൽ നെല്ലു വിളയാ”
“മുളയിലറിയാം വിള”
“ആര്യൻ വിതച്ചാൽ നവര വിളയുമോ?”
“നവര നട്ടാൽ തുവരയുണ്ടാകുമോ?”
“ഒരു വിത്ത് വിതച്ചാൽ പല വിത്ത് വിളയാ”
“കണ്ണൻ വാഴച്ചുവട്ടിൽ കദളിവാഴയുണ്ടാകുമോ?”
“അമരയും അപരാധവും കുറച്ചുമതി”
“ഉണ്ണാനില്ലാഞ്ഞാൽ വിത്ത്; ഉടുക്കാനില്ലാഞ്ഞാൽ പട്ട്”
“വിത്തുഗുണം പത്തുഗുണം”
“ചൊല്ല് പഴയതായാലും വിത്ത് പഴയതാവരുത്”
“വിശപ്പിനു രുചിയില്ല”
“തവിയറിയുമോ കറിയുടെ രസം?”
“കാന്താരിമുളകെന്തിനാ അധികം?”
“കർക്കിടകച്ചേന കട്ടിട്ടെങ്കിലും തിന്നണം”
“മെല്ലെത്തിന്നാൽ മുള്ളും തിന്നാം”
“പയ്യെത്തിന്നാൽ പനയും തിന്നാം”
“വിത്തെടുത്തുണ്ണരുത്”
“ഉണ്ടെങ്കിലോണം പോലെ ഇല്ലെങ്കിലേകാദശി”
“വെളുക്കുന്നതിനു മുൻപേ അരിവെയ്ക്കണം; അരിവെയ്ക്കുന്നതിനു മുൻപേ കറിവെയ്ക്കരുത്”
“വേണമെങ്കിൽ ചക്ക വേരിലും കായ്ക്കും!”
“എണ്ണിയ പയറ് അളക്കേണ്ട”
“മരത്തിന് കായ കനമല്ല”
“ഉരിനെല്ലൂരാൻ പോയിട്ട് പത്തുപറ നെല്ല് പന്നി തിന്നു”
“മക്കളെ കണ്ടും മാമ്പൂ കണ്ടും കൊതിക്കരുത്”
“ഉച്ചാറലുച്ചയ്ക്ക് വെള്ളാരി നട്ടാൽ വിഷു ഉച്ചയ്ക്ക് പറിക്കാം”
“കർക്കിടകത്തിൽ പത്തില കറിവെച്ചു കൂട്ടണം”
“കാണം വിറ്റും ഓണം ഉണ്ണണം”
“പത്തായം പട്ടിണി കിടക്കരുത്”
“നിലം നികത്തി വീടു വയ്ക്കരുത്”
“തൊഴുതുണ്ണുന്ന ചോറിനേക്കാ‍ൾ ഉഴുതുണ്ണുന്ന ചോറ്”
“വാഴ നനഞ്ഞാൽ ചീരയും നനയും”
“കയ്യാടിയാലേ വയറാടൂ”
“അവിയലിൽ ചേരാത്ത കഷ്ണമില്ല!”
“അണ്ടിയോടടുക്കുമ്പോഴറിയാം, മാങ്ങയുടെ പുളി!”
“അത്താഴമുണ്ടാൽ അരക്കാതം നടക്കണം, മുത്താഴമുണ്ടാൽ മുള്ളിലും കിടക്കണം”
“അധികം വിളഞ്ഞാൽ വിത്തിനും കൊള്ളാ”
“അധികമായാൽ അമൃതും വിഷം”
“അപ്പം തിന്നാൽ മതി; കുഴിയെണ്ണേണ്ട”
“അമ്മിയോടു ചോദിച്ചിട്ടാണോ അരയ്ക്കുന്നത്?”
“അരനാഴിയേ ഉള്ളെങ്കിലും അടുപ്പുകല്ലു മൂന്നു വേണം”
“അരിയെത്ര? പയറഞ്ഞാഴി”
“അഴകുള്ള ചക്കയിൽ ചുളയില്ല!”
“ആറ്റിൽ കളഞ്ഞാലും അളന്നു കളയണം”
“ഉണ്ട ചോറിൽ കല്ലിടരുത്”
“ഉണ്ടവന് പാ കിട്ടാഞ്ഞ്, ഉണ്ണാത്തവന് ഇല കിട്ടാഞ്ഞ്”
“ഉപ്പു തിന്നവൻ വെള്ളം കുടിക്കും”
“ഉള്ള കഞ്ഞിയിൽ പാറ്റ ഇടുക”
“എണ്ണിച്ചുട്ട അപ്പം പോലെ”
“എല്ലു മുറിയെ പണിതാൽ പല്ലു മുറിയേ തിന്നാം”
“കല്ലാടും മുറ്റത്ത് നെല്ലാടുകില്ല”
“കറിക്ക് ചേരാത്ത കഷ്ണം നുറുക്കരുത്”
“ചക്കയ്ക്ക് ചുക്ക്; മാങ്ങയ്ക്ക് തേങ്ങ”
“ഞാറുറച്ചാൽ ചോറുറച്ചു”
“തിന്ന ചോറിന് നന്ദി വേണം”
“മത്ത കുത്തിയാൽ കുമ്പളം മുളയ്ക്കുമോ?”
“പത്തായം പെറും, ചക്കി കുത്തും, അമ്മ വയ്ക്കും, ഞാനുണ്ണും”
“പന്തിയ്ക്കു മുമ്പും പടയ്ക്കു പിമ്പും ”
“പറ നിറയെ പതിരാണെങ്കിലും പാറ്റി നോക്കിയാൽ മണി കാണാം”
“ആലോലനീലമിഴിയാം പ്രിയയാൾ വിളമ്പും ഓലോലനൊന്നു മതി; എന്തിന്നു നൂറു കൂട്ടം?”

കൊഴുക്കട്ട പലതരമുണ്ട്. മധുരമുള്ളത്, ഉപ്പുരസമുള്ളത്, എരിവുള്ളത്, വലുപ്പമുള്ളത്, ചെറുതരം എന്നിങ്ങനെ ഓരോ സ്ഥലങ്ങളിലും ഓരോ തരത്തിലാണ് ഉണ്ടാക്കുന്നത്. ഞാനിവിടെ ഇപ്പോള്‍ പറയാന്‍ പോകുന്നത് കൊഴുക്കട്ടയുടെ ഏറ്റവും ലളിതമായ രൂപമാണ്.

ആവശ്യമുള്ള സാധനങ്ങള്‍

മട്ട അരി - 1 ഗ്ലാസ്
പൊന്നി അരി - 1 ഗ്ലാസ്

(മട്ട അരി മാത്രമായോ പൊന്നി അരി മാത്രമായോ എടുത്താലും കുഴപ്പമില്ല. എന്തായാലും പച്ചരിയായാല്‍ നന്നാവില്ല).

തേങ്ങ ചിരകിയത് - ഏകദേശം ഒരു ചെറിയ മുറി.
ജീരകം - 2 ടീ സ്പൂണ്‍
ഉപ്പ്, വെള്ളം - പാകത്തിന്.

ഉണ്ടാക്കുന്ന വിധം:

അരി രണ്ടും ഒന്നിച്ച് കുതിര്‍ക്കുക. ഒരു മൂന്നുനാലു മണിക്കൂര്‍ മതിയാവും കുതിരാന്‍. അതിനുശേഷം കട്ടിയില്‍ അരച്ചെടുക്കണം. വെള്ളം ഒഴിക്കരുത്. കുറേശ്ശെയായി തളിച്ചു കൊടുത്ത് അരച്ചെടുക്കണം. (വെള്ളമില്ലാതെ അരയ്ക്കാന്‍ മിക്സിയുടെ ചട്ണി ജാര്‍ ആണ് പറ്റിയത്). തരുതരുപ്പായി അരഞ്ഞാല്‍ മതി. അരച്ച മാവ് ദാ, ഈ പരുവത്തിലായിരിക്കണം:

ഇനി ഇതില്‍ തേങ്ങ ചിരകിയതും ജീരകവും പാകത്തിന് ഉപ്പും ചേര്‍ത്ത് നന്നായി കുഴച്ച് യോജിപ്പിച്ചശേഷം കുറച്ചു വലുപ്പമുള്ള ഉരുളകളായി ഉരുട്ടുക. (ഒരു പിടി മാവ് ഉരുട്ടിയാലുള്ള വലുപ്പം).

ഇനി, ചുവടുകട്ടിയുള്ള ഒരു പാത്രത്തില്‍ വെള്ളം അടുപ്പത്തു വച്ച് തിളയ്ക്കുമ്പോള്‍ ഈ ഉരുളകള്‍ ഓരോന്നായി വെള്ളത്തിലിടുക. ഉരുളകള്‍ മുഴുവനായും വെള്ളത്തില്‍ മുങ്ങിക്കിടക്കണം. അല്ലെങ്കില്‍ വേവില്ല. വെള്ളം പോരെങ്കില്‍ ഒഴിക്കുക. ഇനി പാത്രം അടച്ചുവച്ച് വേവിക്കുക.

അരി വേവിക്കുമ്പോഴെന്നപോലെ, വെള്ളം തിളച്ച് അടപ്പിനേയും തള്ളിക്കൊണ്ട് പുറത്തേക്ക് തൂകിപ്പോവാനുള്ള സാധ്യത ഇവിടെയും ഉണ്ട്. ജാഗ്രത! തീ കുറച്ചു വയ്ക്കുന്നതും, പാത്രം അടയ്ക്കുമ്പോള്‍ കുറച്ചു വിടവിടുന്നതും ഈ പ്രശ്നം കുറേയൊക്കെ ഇല്ലാതാക്കാന്‍ സഹായിക്കും. അല്ലെങ്കില്‍ പിന്നെ ഒരെളുപ്പവഴിയുള്ളത് ഉരുളകള്‍ ഇഡ്ഡലിത്തട്ടിലോ മറ്റോ നിരത്തി ആവിയില്‍ വേവിച്ചെടുക്കുക എന്നതാണ്. പിന്നെ ഈവക തലവേദനകളൊന്നുമില്ല. സമയവും ലാഭം. പക്ഷേ വെള്ളത്തിലിട്ട് വേവിച്ച കൊഴുക്കട്ടയ്ക്ക് നല്ല സ്വാദും മയവും ഉണ്ടാവും. ആവിയില്‍ വേവിച്ചാല്‍ ഇതു രണ്ടും കുറയും. ഞാന്‍ പറഞ്ഞെന്നേയുള്ളു. നിങ്ങളുടെ സമയവും സൗകര്യവുമനുസരിച്ച് ചെയ്യുക.
ഏതാണ്ട് അരമണിക്കൂര്‍ വേണ്ടി വരും വെള്ളത്തിലിട്ടു വേവിക്കുമ്പോള്‍ കൊഴുക്കട്ട വെന്തുകിട്ടാന്‍. ഇനി കൊഴുക്കട്ടകളെ വെള്ളത്തില്‍ നിന്ന് പുറത്തെടുക്കാം.

ചൂടോടെ ചട്ണി കൂട്ടി കഴിക്കാം.

തീര്‍ന്നില്ല, കൊഴുക്കട്ട വേവിച്ച വെള്ളം കളയല്ലേ....ഇതിനോടകം ഇത് നന്നായി കൊഴുത്ത് ഏതാണ്ട് കഞ്ഞിയുടെ പരുവത്തിലായിട്ടുണ്ടാവും. തേങ്ങയുടെയും ജീരകത്തിന്റേയുമൊക്കെ സ്വാദു കലര്‍ന്ന ഈ കൊഴുക്കട്ടക്കഞ്ഞി വളരെ രുചികരമാണ്. സാധാരണ കഞ്ഞികുടിക്കുന്നതുപോലെതന്നെ അച്ചാറോ മറ്റോ കൂട്ടി കുടിക്കാം. എനിക്ക് കൊഴുക്കട്ടയേക്കാള്‍ ഇത്തിരി ഇഷ്ടക്കൂടുതല്‍ ഈ കഞ്ഞിയോടാണ് കേട്ടോ.

ഈ ബ്ലോഗിനേക്കുറിച്ച്...

ഒരു പാചകവിദഗ്ദ്ധയാണെന്ന അവകാശവാദമൊന്നും ഇല്ല കേട്ടോ.. എനിയ്ക്കറിയാവുന്ന ചിലത് നിങ്ങളുമായി പങ്കുവയ്ക്കുന്നു എന്നുമാത്രം.
പണ്ടത്തെ തനതു വിഭവങ്ങളെ അതേപടി, അതേ പേരുകളോടെ‍ തന്നെയാണ് ഇവിടെ പരിചയപ്പെടുത്തുന്നത്. പേരുകള്‍ക്കോ, ഉണ്ടാക്കുന്ന രീതികള്‍ക്കോ പ്രാദേശികമായ വ്യത്യാസങ്ങളുണ്ടാകുമല്ലോ. അതേക്കുറിച്ചുള്ള അന്വേഷണം കൂടിയാണ് ഓരോ കുറിപ്പും. നിങ്ങൾക്കറിയാവുന്നത് പറയുമല്ലോ..?
ഇതിൽ പറയുന്ന കുറിപ്പുകളിൽ ഏതെങ്കിലും നിങ്ങൾക്ക് ഇഷ്ടപ്പെട്ടുവെങ്കിൽ, ഉപകാരപ്രദമായെങ്കിൽ, അതിന് ഞാൻ കടപ്പെട്ടിരിക്കുന്നത് അടുക്കളയെന്ന ലോകം നന്നായറിഞ്ഞു വളർന്ന സാഹചര്യങ്ങളോടും എന്റെ അമ്മയോടുമാണ്.

19 പേർ അഭിപ്രായമറിയിച്ചു:

Mélange said...: Looks so tempting and homely.This way I haven't tried so far.Ugran recipe..; March 23, 2011 at 3:24 PM
ചാര്‍ളി (ഓ..ചുമ്മാ ) said...: അമ്മയുണ്ടാക്കുന്ന് കൊഴുക്കട്ടയുടെ ഓര്‍മ്മകളുണര്‍ത്തി..ഒത്തിരി നന്ദി..

പുട്ടു പോലെ എന്തിന്റെ കൂടെയും തട്ടാന്‍ പറ്റുന്ന ഒരു സാധനമാണീ കൊഴുക്കട്ടയും..
എനിക്കിഷ്ടപ്പെട്ട കോമ്പിനേഷന്‍സ്

1. കൊഴുക്കട്ടയും പോത്തുലര്‍ത്തിയതും.
2. കൊഴുക്കട്ടയും കോഴി വറുത്തതും
3. കൊഴുക്കട്ടയും മുട്ട പുഴുങ്ങിയതും..

ഹാ ഹാ..

അമ്മ പക്ഷേ ആവിയില്‍ ആണു പുഴുങ്ങാ‍റ്. അതു കൊണ്ട് കൊഴുക്കോട്ട കഞ്ഞി ഇതു വരെ രുചിക്കാന്‍ പറ്റിയിട്ടില്ല.; March 23, 2011 at 4:32 PM
Typist | എഴുത്തുകാരി said...: എനിക്കേറ്റവും ഇഷ്ടപ്പെട്ട ഒന്നു്. എളുപ്പപ്പണിയായ ആവിയിൽ വേവിക്കലാണ് സ്ഥിരം ചെയ്യാറ്‌.; March 23, 2011 at 4:43 PM
siya said...: ഇങ്ങനെ കൊതിപ്പിക്കാതെ ..എന്റെ ഏറ്റവും ഇഷ്ട്ട പലഹാരം ആണ് കൊഴുക്കട്ട

,പക്ഷെ അത് തേങ്ങയും ,പഞ്ചസാരയും ചേര്‍ത്ത് മാവിന് അകത്തു വച്ച് പുഴുങ്ങി എടുക്കും .

ഇത് പിടി യും കോഴിക്കറി എന്ന് പറയുന്നത് ആണോ?അത് ഇതുപോലെ വെള്ളത്തില്‍ ഇട്ടു പുഴുങ്ങി ഉണ്ടാക്കുന്നത് ആണെന്ന് തോന്നുന്നു .

എന്തായാലും ഇതും ഒരു എളുപ്പ പണി ആണല്ലോ ?; March 23, 2011 at 8:01 PM
ശ്രീ said...: ഹായ്; March 23, 2011 at 9:29 PM
HussainNellikkal said...: വിളിക്കാതെ വിരുന്നിനെടിയ വിരുന്നുകാരന്‍ ആന്നു ഞാന്‍ . ഇത്രയും കാലം എന്തുകൊണ്ട് ഞാന്‍ ഈ ബ്ലോഗ്‌ കണ്ടില്ല ....? (എല്ലാറ്റിനും അധിന്റെതായ സമയമുന്ദു ദാസാ ....!) എന്തായാലും മലയാളിയുടെ തനതായ രുചികള്‍ ചേച്ചി പരിചയപ്പെടുട്ടുന്നതില്‍ , കേരള യുവജനതക്ക് വേണ്ടി എല്ലാവിധ ആശംസകളും നേരുന്നു ...; March 26, 2011 at 7:04 PM
പഞ്ചാരകുട്ടന്‍ -malarvadiclub said...: ഇത് സാധാരണ കൊഴുക്കട്ട തന്നെയാണോ.അതോ എന്തെങ്കിലും പ്രത്യേകത ഉണ്ടോ.വൈഫിന് പ്രിന്റ്‌ എടുത്തു കൊടുക്കണോ എന്ന് അറിയാനാ; March 27, 2011 at 2:13 PM
ബിന്ദു കെ പി said...: സിയാ: പിടിയും കോഴിക്കറിയും-ലെ പിടി ഏതാണ്ട് ഇതു തന്നെയാണെന്നു തോന്നുന്നു.

ഇത് സാധാരണ കൊഴുക്കട്ട തന്നെയാ ഫെനിൽ...; March 27, 2011 at 3:28 PM
sarala said...: nokku bindu... ithu vevikkunna vellam vatti thudangarakumpo.. alpam thenga pal ozhikkuka... oru gravi paruvam.. (kozhukkatta cheriya orulakal akkanam appo...).... chicken kooti kazhikkan nalla swada...!!!!; April 8, 2011 at 3:41 PM
sarala said...: ithanu pidi ennu parayam ennu thonnunnu...oru pidi pidichal undallo...!; April 8, 2011 at 3:42 PM
KTK Nadery ™ said...: "മോളെ ചെക്കനുണ്ട് വരുന്നു ഉരുട്ടി വെള്ളത്തിലിട്ടെക്കൂ "; April 30, 2011 at 10:41 PM
ഇന്‍ഡ്യാഹെറിറ്റേജ്‌:Indiaheritage said...: "KTK Nadery ™ said...

"മോളെ ചെക്കനുണ്ട് വരുന്നു ഉരുട്ടി വെള്ളത്തിലിട്ടെക്കൂ "

എന്റെ KTK Nadery
കൊഴുക്കട്ട തിന്ന്‌ അ വെള്ളവും കുടിക്കാന്‍ എത്തിയതാ കാലത്തെ

ചിരിപ്പിച്ചു കഴപ്പിച്ചല്ലൊ മാഷെ :); May 1, 2011 at 6:44 AM
ശ്രീലാല്‍ said...: പ്രസക്തമായ ചോദ്യം അടുക്കളയിൽ നിന്ന്. "വെള്ളത്തിലും ഉപ്പിടണോ?"

മറുപടി എത്രയും വേഗം തരിക, അല്ലെങ്കിൽ അടുപ്പത്തുവെച്ച വെള്ളം വറ്റും. :); April 1, 2012 at 8:46 AM
ബിന്ദു കെ പി said...: അയ്യോ ശ്രീലാലേ, വൈകിപ്പോയല്ലോ....ഇന്ന് കമ്പ്യൂട്ടർ ഓണാക്കിയത് ഇപ്പോഴാ...കൊഴുക്കട്ട എന്തു പരുവം ആയി?
പിന്നെ, കൊഴുക്കട്ട വേവിക്കുന്ന വെള്ളത്തിലും കുറച്ച് ഉപ്പിടുന്നത് നല്ലതാണ്. അധികം വേണ്ട. അത് ഞാൻ പോസ്റ്റിൽ എഴുതാൻ മറന്നുപോയെന്നു തോന്നുന്നു.; April 1, 2012 at 7:10 PM
ശ്രീലാല്‍ said...: കുഴപ്പമായില്ല.. ലേശം ഉറപ്പ് കൂടിപ്പോയി.. (പുട്ട് പൊടിവച്ചായിരുന്നു അങ്കം). അതായിരിക്കുമോ ?

അവസാനം കടുകും കറിവേപ്പിലയും വറുത്തിട്ട് കൊഴുപ്പിച്ചു.. ചട്ട്ണി വിത്ത് കൊഴു. കിടു.

thank you !; April 3, 2012 at 8:22 PM
ബിന്ദു കെ പി said...: ശ്ശോ, പുട്ടുപൊടിയൊക്കെ വച്ച് കൊഴുക്കട്ട ഉണ്ടാക്കിയാൽ തല്ലണ്ടേ..? വെറുതെയല്ല മയം കുറവായത്....; April 3, 2012 at 8:28 PM
Unknown said...: helo salt idathe anu health nu nallathu.koode aviyal thenga chammanthi anu nallathu.........; December 16, 2012 at 12:26 PM
Unknown said...: KURE RAW VEGITABLES UM THENGA YUM KAIKANAM.PACHARI UM UNAKALARIYUM ANU KOODUTHAL SUPER KUZAKATAKU; December 16, 2012 at 12:28 PM
Nisha said...: Superb!!

thanks for the recipes...

മലയാളത്തില്‍ പാചകവിധികള്‍ വായിക്കുമ്പോള്‍ ഒരു അമ്മയോ ചേച്ചിയോ പറഞ്ഞു തരുന്നത് പോലെ തോന്നി പോയി..

ഇനി ഇതൊക്കെ സമയം പോലെ ഒന്ന് പരീക്ഷിക്കണം.
ഇല അട നന്നായി,, കൊഴുക്കട്ടയും അതിന്റെ കഞ്ഞിയും പഴയ കാലം ഓര്‍മിപ്പിച്ചു!!

വളരെ നന്ദി.; February 12, 2014 at 10:29 AM

ഞാന്‍.....

അടുക്കളച്ചൊല്ലുകള്‍.....

വിഭാഗങ്ങള്‍:

ഊണിനു സമയമായോ......?

മലയാളം ബ്ലോഗുകള്‍ ലിസ്റ്റ് ചെയ്യപ്പെടുന്ന ഇടങ്ങള്‍:

കൊഴുക്കട്ട

19 പേർ അഭിപ്രായമറിയിച്ചു:

ഈ ബ്ലോഗിനേക്കുറിച്ച്...

എന്റെ മറ്റു ബ്ലോഗുകള്‍:

ഇപ്പോള്‍ വിരുന്നിനെത്തിവര്‍:

ഇതുവരെ സ്വാദു നോക്കിയവർ

Followers

പ്രധാന ബ്ലോഗിംഗ് സഹായികള്‍: