അടുക്കളത്തളം: ചക്കപ്പഴം ഉണ്ണിയപ്പം

അടുക്കളച്ചൊല്ലുകള്‍.....

“അന്ന വിചാരം മുന്നവിചാരം, പിന്നെ വിചാരം കാര്യവിചാരം”
“ഉപ്പോളം വരുമോ ഉപ്പിലിട്ടത്”
“അരി വിതച്ചാൽ നെല്ലു വിളയാ”
“മുളയിലറിയാം വിള”
“ആര്യൻ വിതച്ചാൽ നവര വിളയുമോ?”
“നവര നട്ടാൽ തുവരയുണ്ടാകുമോ?”
“ഒരു വിത്ത് വിതച്ചാൽ പല വിത്ത് വിളയാ”
“കണ്ണൻ വാഴച്ചുവട്ടിൽ കദളിവാഴയുണ്ടാകുമോ?”
“അമരയും അപരാധവും കുറച്ചുമതി”
“ഉണ്ണാനില്ലാഞ്ഞാൽ വിത്ത്; ഉടുക്കാനില്ലാഞ്ഞാൽ പട്ട്”
“വിത്തുഗുണം പത്തുഗുണം”
“ചൊല്ല് പഴയതായാലും വിത്ത് പഴയതാവരുത്”
“വിശപ്പിനു രുചിയില്ല”
“തവിയറിയുമോ കറിയുടെ രസം?”
“കാന്താരിമുളകെന്തിനാ അധികം?”
“കർക്കിടകച്ചേന കട്ടിട്ടെങ്കിലും തിന്നണം”
“മെല്ലെത്തിന്നാൽ മുള്ളും തിന്നാം”
“പയ്യെത്തിന്നാൽ പനയും തിന്നാം”
“വിത്തെടുത്തുണ്ണരുത്”
“ഉണ്ടെങ്കിലോണം പോലെ ഇല്ലെങ്കിലേകാദശി”
“വെളുക്കുന്നതിനു മുൻപേ അരിവെയ്ക്കണം; അരിവെയ്ക്കുന്നതിനു മുൻപേ കറിവെയ്ക്കരുത്”
“വേണമെങ്കിൽ ചക്ക വേരിലും കായ്ക്കും!”
“എണ്ണിയ പയറ് അളക്കേണ്ട”
“മരത്തിന് കായ കനമല്ല”
“ഉരിനെല്ലൂരാൻ പോയിട്ട് പത്തുപറ നെല്ല് പന്നി തിന്നു”
“മക്കളെ കണ്ടും മാമ്പൂ കണ്ടും കൊതിക്കരുത്”
“ഉച്ചാറലുച്ചയ്ക്ക് വെള്ളാരി നട്ടാൽ വിഷു ഉച്ചയ്ക്ക് പറിക്കാം”
“കർക്കിടകത്തിൽ പത്തില കറിവെച്ചു കൂട്ടണം”
“കാണം വിറ്റും ഓണം ഉണ്ണണം”
“പത്തായം പട്ടിണി കിടക്കരുത്”
“നിലം നികത്തി വീടു വയ്ക്കരുത്”
“തൊഴുതുണ്ണുന്ന ചോറിനേക്കാ‍ൾ ഉഴുതുണ്ണുന്ന ചോറ്”
“വാഴ നനഞ്ഞാൽ ചീരയും നനയും”
“കയ്യാടിയാലേ വയറാടൂ”
“അവിയലിൽ ചേരാത്ത കഷ്ണമില്ല!”
“അണ്ടിയോടടുക്കുമ്പോഴറിയാം, മാങ്ങയുടെ പുളി!”
“അത്താഴമുണ്ടാൽ അരക്കാതം നടക്കണം, മുത്താഴമുണ്ടാൽ മുള്ളിലും കിടക്കണം”
“അധികം വിളഞ്ഞാൽ വിത്തിനും കൊള്ളാ”
“അധികമായാൽ അമൃതും വിഷം”
“അപ്പം തിന്നാൽ മതി; കുഴിയെണ്ണേണ്ട”
“അമ്മിയോടു ചോദിച്ചിട്ടാണോ അരയ്ക്കുന്നത്?”
“അരനാഴിയേ ഉള്ളെങ്കിലും അടുപ്പുകല്ലു മൂന്നു വേണം”
“അരിയെത്ര? പയറഞ്ഞാഴി”
“അഴകുള്ള ചക്കയിൽ ചുളയില്ല!”
“ആറ്റിൽ കളഞ്ഞാലും അളന്നു കളയണം”
“ഉണ്ട ചോറിൽ കല്ലിടരുത്”
“ഉണ്ടവന് പാ കിട്ടാഞ്ഞ്, ഉണ്ണാത്തവന് ഇല കിട്ടാഞ്ഞ്”
“ഉപ്പു തിന്നവൻ വെള്ളം കുടിക്കും”
“ഉള്ള കഞ്ഞിയിൽ പാറ്റ ഇടുക”
“എണ്ണിച്ചുട്ട അപ്പം പോലെ”
“എല്ലു മുറിയെ പണിതാൽ പല്ലു മുറിയേ തിന്നാം”
“കല്ലാടും മുറ്റത്ത് നെല്ലാടുകില്ല”
“കറിക്ക് ചേരാത്ത കഷ്ണം നുറുക്കരുത്”
“ചക്കയ്ക്ക് ചുക്ക്; മാങ്ങയ്ക്ക് തേങ്ങ”
“ഞാറുറച്ചാൽ ചോറുറച്ചു”
“തിന്ന ചോറിന് നന്ദി വേണം”
“മത്ത കുത്തിയാൽ കുമ്പളം മുളയ്ക്കുമോ?”
“പത്തായം പെറും, ചക്കി കുത്തും, അമ്മ വയ്ക്കും, ഞാനുണ്ണും”
“പന്തിയ്ക്കു മുമ്പും പടയ്ക്കു പിമ്പും ”
“പറ നിറയെ പതിരാണെങ്കിലും പാറ്റി നോക്കിയാൽ മണി കാണാം”
“ആലോലനീലമിഴിയാം പ്രിയയാൾ വിളമ്പും ഓലോലനൊന്നു മതി; എന്തിന്നു നൂറു കൂട്ടം?”

ചക്കപ്പഴം ചേർത്തുണ്ടാക്കുന്ന ഉണ്ണിയപ്പം. ഇത് വളരെ സ്വാദിഷ്ടവും നല്ല മാർദ്ദവമുള്ളതുമാണ്. പരീക്ഷിച്ചുനോക്കൂ...

ആവശ്യമുള്ള സാധനങ്ങൾ:

ചക്കപ്പഴം കുരുവും ചവിണിയും മാറ്റി വൃത്തിയാക്കിയത് - 10-15 ചുള
പച്ചരി - ഒരു ഗ്ലാസ് (ഏകദേശം കാൽ കിലോ)
ശർക്കര - 175 ഗ്രാം
തേങ്ങാക്കൊത്ത് - അര മുറിയുടേത്
ഏലയ്ക്കാപ്പൊടി - 2 സ്പൂൺ
വെളിച്ചെണ്ണ - വറുക്കാനാവശ്യമുള്ളത്

ഉണ്ടാക്കുന്ന വിധം:

അരി 2-3 മണിക്കൂർ വെള്ളത്തിലിട്ട് കുതിർക്കുക. ശർക്കര ഉരുക്കി അരിച്ച് പാനിയാക്കിവയ്ക്കുക. കുതിർത്ത അരിയും ചക്കച്ചുളയും ശർക്കരപ്പാനി ചേർത്ത് വെണ്ണപോലെ അരച്ചെടുക്കുക. (ശർക്കരപ്പാനി ചേർത്തശേഷം അവശ്യമെങ്കിൽ കുറച്ചുവെള്ളം ചേർക്കാം. വെള്ളം കൂടിപ്പോകരുത്; ശ്രദ്ധിക്കണം.) അരച്ചമാവ് ദോശമാവിന്റെ പരുവത്തിലായിരിക്കണം. അവസാനം തേങ്ങാക്കൊത്തും ഏലയ്ക്കാപ്പൊടിയും കൂടി ചേർത്തിളക്കിക്കഴിഞ്ഞാൽ മാവ് റെഡിയായി.

അരമണിക്കൂർ കഴിഞ്ഞാൽ അപ്പം ഉണ്ടാക്കാം. അപ്പക്കാരയിൽ വെളിച്ചെണ്ണ ഒഴിച്ച് ചൂടായാൽ ഒരു ചെറിയ തവികൊണ്ട് മാവ് ഓരോ കുഴിയിലും സാവധാനം ഒഴിക്കുക. കുറച്ചുനേരം കഴിഞ്ഞാൽ അപ്പം കുഴിയിൽ നിന്ന് വിട്ടുപോരാൻ തുടങ്ങും. അപ്പോൾ ഒരു സ്പൂൺകൊണ്ട് ഓരോന്നും മറിച്ചിടണം. ഉള്ള് വെന്തോയെന്നറിയാൻ പപ്പടക്കമ്പി കൊണ്ട് കുത്തിനോക്കിയാൽ മതി. വെന്തിട്ടില്ലെങ്കിൽ പച്ചമാവ് കമ്പിയിൽ പറ്റിപ്പിടിച്ചിരിക്കുന്നതുകാണാം. തീ ഒരുപാട് കൂട്ടിവച്ചാൽ അപ്പം പെട്ടെന്ന് കരിഞ്ഞുപോവും; ഉള്ള് വെന്തിട്ടുമുണ്ടാവില്ല. അതുകൊണ്ട് തീ വേണ്ടതുപോലെ ക്രമീകരിക്കാൻ പ്രത്യേകം ശ്രദ്ധിക്കണം.

രണ്ടുവശവും മൊരിഞ്ഞ് ബ്രൗൺ നിറമായാൽ എടുക്കാം. പപ്പടക്കമ്പിയിൽ കോർത്തെടുക്കുകയോ സ്പൂൺ കൊണ്ടെടുക്കുകയോ ചെയ്യാം.

ഉണ്ണിയപ്പം തയ്യാർ! മടിച്ചുനിൽക്കാതെ കടന്നുവരൂ....

ഈ ബ്ലോഗിനേക്കുറിച്ച്...

ഒരു പാചകവിദഗ്ദ്ധയാണെന്ന അവകാശവാദമൊന്നും ഇല്ല കേട്ടോ.. എനിയ്ക്കറിയാവുന്ന ചിലത് നിങ്ങളുമായി പങ്കുവയ്ക്കുന്നു എന്നുമാത്രം.
പണ്ടത്തെ തനതു വിഭവങ്ങളെ അതേപടി, അതേ പേരുകളോടെ‍ തന്നെയാണ് ഇവിടെ പരിചയപ്പെടുത്തുന്നത്. പേരുകള്‍ക്കോ, ഉണ്ടാക്കുന്ന രീതികള്‍ക്കോ പ്രാദേശികമായ വ്യത്യാസങ്ങളുണ്ടാകുമല്ലോ. അതേക്കുറിച്ചുള്ള അന്വേഷണം കൂടിയാണ് ഓരോ കുറിപ്പും. നിങ്ങൾക്കറിയാവുന്നത് പറയുമല്ലോ..?
ഇതിൽ പറയുന്ന കുറിപ്പുകളിൽ ഏതെങ്കിലും നിങ്ങൾക്ക് ഇഷ്ടപ്പെട്ടുവെങ്കിൽ, ഉപകാരപ്രദമായെങ്കിൽ, അതിന് ഞാൻ കടപ്പെട്ടിരിക്കുന്നത് അടുക്കളയെന്ന ലോകം നന്നായറിഞ്ഞു വളർന്ന സാഹചര്യങ്ങളോടും എന്റെ അമ്മയോടുമാണ്.

14 പേർ അഭിപ്രായമറിയിച്ചു:

ശ്രീ said...: ആഹാ... ചക്കപ്പഴം കൊണ്ടും ഈ പണി ഒപ്പിയ്ക്കാം അല്ലേ?

(പെട്ടെന്ന് കേടായി പോകുമോ?); April 12, 2010 at 9:10 AM
കൂതറHashimܓ said...: ഉണ്ണിയപ്പം തയ്യാർ! മടിച്ചുനിൽക്കാതെ കടന്നുവരൂ.... എന്നിട്ട് താഴെ ഒരു പടവും...
കൊതികൊണ്ട് വായില്‍ വെള്ളം നിറഞ്ഞു!!
ഇയാള്‍ക്കും പിള്ളേര്‍ക്കും നാളെ വയറിളക്കം ഷുവര്‍; April 12, 2010 at 11:32 AM
Typist | എഴുത്തുകാരി said...: കൊതിപ്പിക്കാന്‍ ഒരുങ്ങിയിട്ടു തന്നെയാ അല്ലേ?; April 12, 2010 at 2:01 PM
പിരിക്കുട്ടി said...: aalkkare kothippichu kollunna blogginu vilakku erppeduthaan aarum ille?; April 12, 2010 at 5:12 PM
മയൂര said...: കൊതിപ്പിച്ചു...
മിണ്ടൂല്ലാ‍ാ‍ാ‍ാ‍ാ...; April 12, 2010 at 8:12 PM
അനില്‍@ബ്ലോഗ് // anil said...: കൊള്ളാം, ഒരു പുതിയ ഐറ്റം ആണല്ലോ.; April 12, 2010 at 8:58 PM
ഇന്‍ഡ്യാഹെറിറ്റേജ്‌:Indiaheritage said...: ആ ചക്കച്ചുളകൾ നേരെ ഇങു കിട്ടിയിരുന്നെങ്കിൽ, ഈപാടൊന്നും പെടാതെ തന്നെ അങ്ങു --ങ്ഹാ പറഞിട്ടെന്തു കാര്യം; April 12, 2010 at 9:51 PM
Sulthan | സുൽത്താൻ said...: ചേച്ചീ,

ഞാൻ ഈ വഴി വരില്ലാന്ന് കരുതിയതാ. പക്ഷെ ചക്കപഴം എന്ന് കേട്ടപ്പോൾ പിന്നെ മുന്നോട്ട് നടക്കുവാൻ കഴിഞ്ഞില്ല.

ഞാൻ, ഉണ്ണിയപ്പം ഇന്തപഴം കൊണ്ട് ഉണ്ടാക്കി തിന്നു. ഇതെകൂട്ട്, ട്രൈ.

കർത്താവെ, അടുത്ത കുരിശ് എന്താണോ എന്തോ?.

ആശംസകൾ; April 13, 2010 at 1:00 AM
വീകെ said...: ബിന്ദു ചേച്ചി, ആ ചക്കപ്പഴം നേരിട്ടിങ്ങു തന്നാൽ മതിയായിരുന്നു..!!
ഇനിയതു ഉണ്ണിയപ്പമാക്കി എടുക്കാനുള്ള ക്ഷമയൊന്നുമില്ല...!!
എത്ര നേരമെന്നു വച്ചാ ചക്കപ്പഴം മുൻപിൽ വച്ചു നോക്കിയിരിക്കാ...!!!; April 16, 2010 at 3:10 AM
poor-me/പാവം-ഞാന്‍ said...: This comment has been removed by the author.; April 18, 2010 at 12:04 PM
poor-me/പാവം-ഞാന്‍ said...: ചക്കയുടെ നാളുകളിലെ നല്ലൊരു കുറിപ്പ്.; April 26, 2010 at 10:54 PM
ഉസ്മാന്‍ പള്ളിക്കരയില്‍ said...: ഈ റെസിപ്പിയ്ക്ക് നന്ദി ബിന്ദു.; July 4, 2010 at 2:51 PM
Anonymous said...: chechii iniyum undoo items....; February 10, 2011 at 7:01 PM
Unknown said...: This comment has been removed by the author.; May 4, 2011 at 3:39 PM

ഞാന്‍.....

അടുക്കളച്ചൊല്ലുകള്‍.....

വിഭാഗങ്ങള്‍:

ഊണിനു സമയമായോ......?

മലയാളം ബ്ലോഗുകള്‍ ലിസ്റ്റ് ചെയ്യപ്പെടുന്ന ഇടങ്ങള്‍:

ചക്കപ്പഴം ഉണ്ണിയപ്പം

14 പേർ അഭിപ്രായമറിയിച്ചു:

ഈ ബ്ലോഗിനേക്കുറിച്ച്...

എന്റെ മറ്റു ബ്ലോഗുകള്‍:

ഇപ്പോള്‍ വിരുന്നിനെത്തിവര്‍:

ഇതുവരെ സ്വാദു നോക്കിയവർ

Followers

പ്രധാന ബ്ലോഗിംഗ് സഹായികള്‍: