അടുക്കളത്തളം: അവിൽ പായസം

അടുക്കളച്ചൊല്ലുകള്‍.....

“അന്ന വിചാരം മുന്നവിചാരം, പിന്നെ വിചാരം കാര്യവിചാരം”
“ഉപ്പോളം വരുമോ ഉപ്പിലിട്ടത്”
“അരി വിതച്ചാൽ നെല്ലു വിളയാ”
“മുളയിലറിയാം വിള”
“ആര്യൻ വിതച്ചാൽ നവര വിളയുമോ?”
“നവര നട്ടാൽ തുവരയുണ്ടാകുമോ?”
“ഒരു വിത്ത് വിതച്ചാൽ പല വിത്ത് വിളയാ”
“കണ്ണൻ വാഴച്ചുവട്ടിൽ കദളിവാഴയുണ്ടാകുമോ?”
“അമരയും അപരാധവും കുറച്ചുമതി”
“ഉണ്ണാനില്ലാഞ്ഞാൽ വിത്ത്; ഉടുക്കാനില്ലാഞ്ഞാൽ പട്ട്”
“വിത്തുഗുണം പത്തുഗുണം”
“ചൊല്ല് പഴയതായാലും വിത്ത് പഴയതാവരുത്”
“വിശപ്പിനു രുചിയില്ല”
“തവിയറിയുമോ കറിയുടെ രസം?”
“കാന്താരിമുളകെന്തിനാ അധികം?”
“കർക്കിടകച്ചേന കട്ടിട്ടെങ്കിലും തിന്നണം”
“മെല്ലെത്തിന്നാൽ മുള്ളും തിന്നാം”
“പയ്യെത്തിന്നാൽ പനയും തിന്നാം”
“വിത്തെടുത്തുണ്ണരുത്”
“ഉണ്ടെങ്കിലോണം പോലെ ഇല്ലെങ്കിലേകാദശി”
“വെളുക്കുന്നതിനു മുൻപേ അരിവെയ്ക്കണം; അരിവെയ്ക്കുന്നതിനു മുൻപേ കറിവെയ്ക്കരുത്”
“വേണമെങ്കിൽ ചക്ക വേരിലും കായ്ക്കും!”
“എണ്ണിയ പയറ് അളക്കേണ്ട”
“മരത്തിന് കായ കനമല്ല”
“ഉരിനെല്ലൂരാൻ പോയിട്ട് പത്തുപറ നെല്ല് പന്നി തിന്നു”
“മക്കളെ കണ്ടും മാമ്പൂ കണ്ടും കൊതിക്കരുത്”
“ഉച്ചാറലുച്ചയ്ക്ക് വെള്ളാരി നട്ടാൽ വിഷു ഉച്ചയ്ക്ക് പറിക്കാം”
“കർക്കിടകത്തിൽ പത്തില കറിവെച്ചു കൂട്ടണം”
“കാണം വിറ്റും ഓണം ഉണ്ണണം”
“പത്തായം പട്ടിണി കിടക്കരുത്”
“നിലം നികത്തി വീടു വയ്ക്കരുത്”
“തൊഴുതുണ്ണുന്ന ചോറിനേക്കാ‍ൾ ഉഴുതുണ്ണുന്ന ചോറ്”
“വാഴ നനഞ്ഞാൽ ചീരയും നനയും”
“കയ്യാടിയാലേ വയറാടൂ”
“അവിയലിൽ ചേരാത്ത കഷ്ണമില്ല!”
“അണ്ടിയോടടുക്കുമ്പോഴറിയാം, മാങ്ങയുടെ പുളി!”
“അത്താഴമുണ്ടാൽ അരക്കാതം നടക്കണം, മുത്താഴമുണ്ടാൽ മുള്ളിലും കിടക്കണം”
“അധികം വിളഞ്ഞാൽ വിത്തിനും കൊള്ളാ”
“അധികമായാൽ അമൃതും വിഷം”
“അപ്പം തിന്നാൽ മതി; കുഴിയെണ്ണേണ്ട”
“അമ്മിയോടു ചോദിച്ചിട്ടാണോ അരയ്ക്കുന്നത്?”
“അരനാഴിയേ ഉള്ളെങ്കിലും അടുപ്പുകല്ലു മൂന്നു വേണം”
“അരിയെത്ര? പയറഞ്ഞാഴി”
“അഴകുള്ള ചക്കയിൽ ചുളയില്ല!”
“ആറ്റിൽ കളഞ്ഞാലും അളന്നു കളയണം”
“ഉണ്ട ചോറിൽ കല്ലിടരുത്”
“ഉണ്ടവന് പാ കിട്ടാഞ്ഞ്, ഉണ്ണാത്തവന് ഇല കിട്ടാഞ്ഞ്”
“ഉപ്പു തിന്നവൻ വെള്ളം കുടിക്കും”
“ഉള്ള കഞ്ഞിയിൽ പാറ്റ ഇടുക”
“എണ്ണിച്ചുട്ട അപ്പം പോലെ”
“എല്ലു മുറിയെ പണിതാൽ പല്ലു മുറിയേ തിന്നാം”
“കല്ലാടും മുറ്റത്ത് നെല്ലാടുകില്ല”
“കറിക്ക് ചേരാത്ത കഷ്ണം നുറുക്കരുത്”
“ചക്കയ്ക്ക് ചുക്ക്; മാങ്ങയ്ക്ക് തേങ്ങ”
“ഞാറുറച്ചാൽ ചോറുറച്ചു”
“തിന്ന ചോറിന് നന്ദി വേണം”
“മത്ത കുത്തിയാൽ കുമ്പളം മുളയ്ക്കുമോ?”
“പത്തായം പെറും, ചക്കി കുത്തും, അമ്മ വയ്ക്കും, ഞാനുണ്ണും”
“പന്തിയ്ക്കു മുമ്പും പടയ്ക്കു പിമ്പും ”
“പറ നിറയെ പതിരാണെങ്കിലും പാറ്റി നോക്കിയാൽ മണി കാണാം”
“ആലോലനീലമിഴിയാം പ്രിയയാൾ വിളമ്പും ഓലോലനൊന്നു മതി; എന്തിന്നു നൂറു കൂട്ടം?”

അവിലും പാലും കൊണ്ടൊരു പായസമാവട്ടെ ഇന്ന്. വളരെ സ്വാദിഷ്ടമായ ഈ പായസം ഉണ്ടാക്കാനാണെങ്കിലോ, വളരെ എളുപ്പവും! ഒന്നു ശ്രമിച്ചു നോക്കൂ...

ആവശ്യമുള്ള സാധനങ്ങൾ:

വെള്ള അവിൽ - ഏകദേശം 50 ഗ്രാം
പാൽ - ഒന്നര ലിറ്റർ
പഞ്ചസാര - ഏകദേശം 200 ഗ്രാം.
നെയ്യ് - 3-4 സ്പൂൺ
ഏലക്കായ പൊടിച്ചത് - അര സ്പൂൺ
അണ്ടിപ്പരിപ്പ്, മുന്തിരി - ആവശ്യത്തിന്

ഉണ്ടാക്കുന്ന വിധം:

അവിൽ വറുത്തെടുക്കുകയാണ് ആദ്യം വേണ്ടത്. ഒരു ചീനച്ചട്ടിയിൽ രണ്ടു സ്പൂൺ നെയ്യൊഴിച്ച് അവിൽ അതിലിട്ട് തുടരെ ഇളക്കുക(തീ കുറച്ചു വയ്ക്കുന്നതാണ് നല്ലത്).അല്പസമയത്തിനുശേഷം അവിൽ നന്നായി മൊരിഞ്ഞ് ‘കറുമുറാ’ പരുവത്തിലാവും. അപ്പോൾ വാങ്ങിവയ്ക്കുക.

പാൽ അടുപ്പത്തുവച്ച് നന്നായി തിളച്ചാൽ വറുത്തുവച്ചിരിക്കുന്ന അവിൽ ചേർത്തിളക്കുക. അല്പസമയംകൊണ്ടു തന്നെ അവിൽ വേവും. അതിനുശേഷം പഞ്ചസാര ചേർത്തിളക്കുക. (പഞ്ചസാര ഞാനിവിടെ കുറിച്ചിരിക്കുന്നത് ഏകദേശ അളവാണ്. മുഴുവനും ആദ്യം തന്നെ ഇടരുത്. കുറേശ്ശെയായി ചേർത്ത് നിങ്ങളുടെ പാകത്തിന് ക്രമീകരിക്കുക. കൂടുതൽ വേണമെങ്കിൽ ചേർക്കുക).

തുടർച്ചയായി ഇളക്കിക്കൊണ്ടിരിക്കുക. അല്ലെങ്കിൽ കരിഞ്ഞുപിടിയ്ക്കും. കുറച്ചുകഴിഞ്ഞാൽ ചേരുവകളെല്ലാം നന്നായി യോജിച്ച് പായസം കുറുകാൻ തുടങ്ങും:

ഈ ഘട്ടത്തിൽ എലയ്ക്കാപ്പൊടി ചേർത്തിളക്കി വാങ്ങി വയ്ക്കാം. അധികം കുറുകേണ്ട ആവശ്യമില്ല. കാരണം, തണുക്കുന്തോറും പായസം ഇനിയും കട്ടിയാവും.

അവസാനമായി അണ്ടിപ്പരിപ്പും മുന്തിരിയും നെയ്യിൽ വറുത്തതും, വറുക്കാനുപയോഗിച്ച നെയ്യ് ബാക്കിയുണ്ടെങ്കിൽ അതും ചേർത്താൽ പായസം വിളമ്പാൻ തയ്യാർ!

ഈ ബ്ലോഗിനേക്കുറിച്ച്...

ഒരു പാചകവിദഗ്ദ്ധയാണെന്ന അവകാശവാദമൊന്നും ഇല്ല കേട്ടോ.. എനിയ്ക്കറിയാവുന്ന ചിലത് നിങ്ങളുമായി പങ്കുവയ്ക്കുന്നു എന്നുമാത്രം.
പണ്ടത്തെ തനതു വിഭവങ്ങളെ അതേപടി, അതേ പേരുകളോടെ‍ തന്നെയാണ് ഇവിടെ പരിചയപ്പെടുത്തുന്നത്. പേരുകള്‍ക്കോ, ഉണ്ടാക്കുന്ന രീതികള്‍ക്കോ പ്രാദേശികമായ വ്യത്യാസങ്ങളുണ്ടാകുമല്ലോ. അതേക്കുറിച്ചുള്ള അന്വേഷണം കൂടിയാണ് ഓരോ കുറിപ്പും. നിങ്ങൾക്കറിയാവുന്നത് പറയുമല്ലോ..?
ഇതിൽ പറയുന്ന കുറിപ്പുകളിൽ ഏതെങ്കിലും നിങ്ങൾക്ക് ഇഷ്ടപ്പെട്ടുവെങ്കിൽ, ഉപകാരപ്രദമായെങ്കിൽ, അതിന് ഞാൻ കടപ്പെട്ടിരിക്കുന്നത് അടുക്കളയെന്ന ലോകം നന്നായറിഞ്ഞു വളർന്ന സാഹചര്യങ്ങളോടും എന്റെ അമ്മയോടുമാണ്.

25 പേർ അഭിപ്രായമറിയിച്ചു:

ബിന്ദു കെ പി said...: അവിലും പാലും കൊണ്ടൊരു പായസമാവട്ടെ ഇന്ന്. വളരെ സ്വാദിഷ്ടമായ ഈ പായസം ഉണ്ടാക്കാനാണെങ്കിലോ, വളരെ എളുപ്പവും! ഒന്നു ശ്രമിച്ചു നോക്കൂ...; October 19, 2009 at 9:04 AM
ശ്രീ said...: ഇതു കൊള്ളാമല്ലോ. വീട്ടില്‍ ചെല്ലുമ്പോള്‍ ഒരു ദിവസം പരീക്ഷിച്ചു നോക്കണം.; October 19, 2009 at 10:02 AM
Anil cheleri kumaran said...: onnu njaanum try cheythu nokkunnunt.; October 19, 2009 at 1:26 PM
Cartoonist said...: നെയ്യില്‍ വറുക്കാന്‍ കൊടുക്കാതെ മാറ്റിവെച്ച അണ്ടിപ്പരിപ്പും മുന്തിരിങ്ങയും രഹസ്യമായി അകത്താക്കുന്നത് വിരുദ്ധഭക്ഷാണാവ്വോ, ബിന്ദൂ ?

ചോദ്യണ്.; October 19, 2009 at 3:21 PM
മണിഷാരത്ത്‌ said...: ഞാനെന്റെ ഭൈമിയെ ഈ പോസ്റ്റ്‌ കാണിച്ചിട്ടുണ്ട്‌.പായസം ഉണ്ടാക്കിയിട്ട്‌ കൂടുതല്‍ പറയാം; October 19, 2009 at 4:13 PM
മീര അനിരുദ്ധൻ said...: കൊള്ളാല്ലോ ബിന്ദൂ ഈ അവലു പായസം.

ഓ ടോ :കാർട്ടൂവങ്കിളിന്റെ ചോദ്യം കലക്കീ ട്ടോ; October 19, 2009 at 5:38 PM
Typist | എഴുത്തുകാരി said...: പായസമായിട്ടിതുവരെ ഉണ്ടാക്കിയിട്ടില്ല.

പായസത്തിന്റെ ഒരു മിനിമോഡല്‍ അതായതു്
നല്ല ചൂടുള്ള പാലില്‍ അവിലും പഞ്ചസാരയുമിട്ട് കൊടുക്കാറുണ്ട് കുട്ടികള്‍ക്ക്. അതവര്‍ക്കു വല്യ ഇഷ്ടവുമാണ്.; October 19, 2009 at 7:26 PM
വികടശിരോമണി said...: നമ്മുടെ പരിപാടി മറ്റൊന്നാണ്.അവിൽ മിൽക്ക്.ചൂടാക്കണേനു പകരം തണുപ്പിക്കാറാണു പതിവ്.ഈത്തപ്പഴം കൂടി ചേർത്താൽ കലക്കി.
ഏതായാലും,ഇതൊന്നു നോക്കട്ടെ,ട്ടൊ.
താങ്സ്:); October 20, 2009 at 1:44 AM
അനില്‍@ബ്ലോഗ് // anil said...: ബിന്ദൂ,
തികച്ചും പുതിയ വിഭവം.
നന്ദി.
വികടശിരോമണി പറഞ്ഞപോലെ ഇവിടെ പരിചയം അവില്‍ മില്‍ക്കാണ്.; October 20, 2009 at 9:16 AM
siva // ശിവ said...: അങ്ങനെ ഒരു പായസം കൂടി...; October 20, 2009 at 10:16 AM
അഭി said...: കൊള്ളാം ചേച്ചി അവിലുകൊണ്ട് ഇങ്ങനെയും ഒരു പരിപാടി ഉണ്ടല്ലേ ?. ഒരു ദിവസം ഒന് പരിക്ഷിച്ചു നോക്കി വിവരം പറയാം; October 20, 2009 at 12:23 PM
വാഴക്കോടന്‍ ‍// vazhakodan said...: കൊള്ളാല്ലോ ഈ അവലു പായസം.
പരീക്ഷിച്ചു നോക്കണം :); October 20, 2009 at 8:39 PM
കുക്കു.. said...: ബിന്ദു ചേച്ചി.... ഈ വീക്ക്‌ ഏന്‍ഡ് ല്‍ ഇത് ആക്കിയിട്ടു തന്നെ കാര്യം...
എന്നിട്ട് പറയാ..ട്ടോ
:); October 21, 2009 at 1:36 PM
Areekkodan | അരീക്കോടന്‍ said...: ഞാനും ഒന്ന് പരീക്ഷിച്ചു നോക്കട്ടെ...; October 21, 2009 at 3:38 PM
..::വഴിപോക്കന്‍[Vazhipokkan] | സി.പി.ദിനേശ് said...: വിളമ്പിയോ?
:); October 22, 2009 at 1:02 PM
നരിക്കുന്നൻ said...: പരീക്ഷിക്കും... എന്റെ വായിൽ നിറഞ്ഞ് തുളുമ്പിയ വെള്ളത്തിന് പകരം കൊടുക്കാതിരിക്കാൻ എനിക്കാവില്ല.....; October 23, 2009 at 3:17 AM
കുക്കു.. said...: ബിന്ദു ചേച്ചി ..ഞാന്‍ ഉണ്ടാക്കി പായസം...നല്ല ടേസ്റ്റ് ഉണ്ടായിരുന്നു...ഞാന്‍ മാത്രമല്ലാ..ട്ടോ.. വീട്ടില്‍ എല്ലാവരും പറഞ്ഞു...
:)); October 24, 2009 at 6:56 PM
rose said...: chechi enikk orupad ishttayi thanks chechi; October 24, 2009 at 9:51 PM
Sabu Kottotty said...: പായസം വച്ചു കഴിച്ചു നോക്കട്ടെ... ഇതിന്റെ അഭിപ്രായം എന്നിട്ടു പറയാം.
വികടന്‍: ഈത്തപ്പഴം ചേര്‍ത്ത അവില്‍മില്‍ക്കിനെ ഇപ്പഴാകേട്ടത്, ഒന്നു വിശദീകരിയ്ക്കാമോ...; October 28, 2009 at 12:10 AM
poor-me/പാവം-ഞാന്‍ said...: ഇന്നത്തെ മാധ്യമത്തില്‍ (02-11-09) വെളിച്ചത്തില്‍ ഈ ബ്ലോഗിനെക്കുറിച്ചു എഴുതിയതു വായിച്ചു സന്തോഷിക്കു....; November 2, 2009 at 3:32 PM
വികടശിരോമണി said...: കൊട്ടോട്ടിക്കാരാ,
അത്ര വിശദാക്കാനൊന്നും ഇല്ലെന്നേ.സാധാരണ അവിൽ മിൽക്ക് ഉണ്ടാക്കണപോലെത്തന്നെ.സാധാരണ കൂട്ടുകൾക്കു പുറമേ-ബദാം,ഈത്തപ്പഴം എന്നിവകൂടി മിക്സിയിൽ അടിച്ച് പാലിൽ ചേർക്കുക.ഈത്തപ്പഴം അവിലുമായി ഭയങ്കര ചേർച്ചയുള്ള ഒരാളാണ്.; November 2, 2009 at 3:46 PM
yousufpa said...: good; November 2, 2009 at 5:52 PM
ശാന്ത കാവുമ്പായി said...: തീർച്ചയായും ഞാൻ പരീക്ഷിച്ചു നോക്കും.; November 7, 2009 at 3:35 PM
Chindakal said...: Very simple. v need more like this.
Good attempt.; December 17, 2009 at 3:17 PM
Unknown said...: ഞാനും അവില്‍ പായസം ഉണ്ടാക്കി അതില്‍ കുറച്ചു ബെതാം,ഈന്തപഴം,നേന്ത്രപഴം എന്നിവ കൂടി ചേര്‍ത്തു.ചുമ്മാ മുറിച്ചു ഇട്ടു അത്ര തന്നെ ....അടിപൊളി ..നന്ദി ചേച്ചി.; March 7, 2012 at 9:01 PM

ഞാന്‍.....

അടുക്കളച്ചൊല്ലുകള്‍.....

വിഭാഗങ്ങള്‍:

ഊണിനു സമയമായോ......?

മലയാളം ബ്ലോഗുകള്‍ ലിസ്റ്റ് ചെയ്യപ്പെടുന്ന ഇടങ്ങള്‍:

അവിൽ പായസം

25 പേർ അഭിപ്രായമറിയിച്ചു:

ഈ ബ്ലോഗിനേക്കുറിച്ച്...

എന്റെ മറ്റു ബ്ലോഗുകള്‍:

ഇപ്പോള്‍ വിരുന്നിനെത്തിവര്‍:

ഇതുവരെ സ്വാദു നോക്കിയവർ

Followers

പ്രധാന ബ്ലോഗിംഗ് സഹായികള്‍: