രാജ്മ മസാല

രാജ്മ(kidney beans) എന്നു വിളിക്കപ്പെടുന്ന പയർ കണ്ടിട്ടില്ലേ സൂപ്പർമാർക്കറ്റുകളിലും മറ്റും? സാധാരണ നമ്മളുപയോഗിക്കുന്ന ചുവന്ന പയറിനേക്കാളും നല്ല വലുപ്പക്കൂടുതലും മാംസളതയുമുള്ള രാജ്മയ്ക്ക് ഇരുണ്ട ചുവപ്പുനിറമാണ്. ഉത്തരേന്ത്യക്കാരാണ് രാജ്മ എറ്റവും കൂടുതൽ ഉപയോഗിക്കുന്നത്. അന്നജം,മാംസ്യം, നാരുകൾ എന്നിവയാൽ സമ്പുഷ്ടമായ രാജ്മയിൽ ഇരുമ്പ്, ഫോളിക് ആസിഡ് എന്നിവയും ധാരാളമായി അടങ്ങിയിരിക്കുന്നു. മസാലക്കറി ഉണ്ടാക്കാനാണ് രാജ്മ ഏറ്റവും അനുയോജ്യം. എങ്ങിനെയാണെന്നു നോക്കാം:

ആവശ്യമുള്ള സാധനങ്ങൾ: 

• രാജ്മ - 200 ഗ്രാം
• സവാള -  1 വലുത്
• പച്ചമുളക് - 2 എണ്ണം
• ഇഞ്ചി-വെളുത്തുള്ളി പേസ്റ്റ് - ഒന്നര ടീസ്പൂൺ
• പെരുഞ്ചീരകം - ഒരു നുള്ള്
• സാധാരണ ജീരകം - കാൽ ടീസ്പൂൺ
• തക്കാളി - 2
• ഗരം മസാല - ഒരു ടീസ്പൂൺ(വേണമെങ്കിൽ കൂടുതലാവാം)
• മഞ്ഞൾപ്പൊടി. മുളകുപൊടി - പാകത്തിന്
• കുറച്ച് മല്ലിയില, കറിവേപ്പില
• കുറുകിയ തേങ്ങാപ്പാൽ - ഒരു കപ്പ്
• പാചകയെണ്ണ
• ഉപ്പ്

ഉണ്ടാക്കുന്ന വിധം:

രാജ്മ നല്ല വേവുള്ള പയറാണ്.  ഒരു 6-8 മണിക്കൂറോളം വെള്ളത്തിലിട്ട് കുതിർത്താലേ രാജ്മ നന്നായി വെന്തു കിട്ടൂ.  കറി പെട്ടെന്ന് ഉണ്ടാക്കണമെന്ന് വച്ചാൽ നടക്കില്ലെന്നർത്ഥം രാവിലെയാണ് കറിയുണ്ടാക്കേണ്ടതെങ്കിൽ രാജ്മ തലേദിവസം രാത്രി തന്നെ വെള്ളത്തിലിടുക. രാത്രിയാണ് ഉണ്ടാക്കുന്നതെങ്കിൽ രാവിലെ തന്നെ ഇടുക.
ഇങ്ങനെ കുതിർത്ത രാജ്മ പ്രഷർ കുക്കറിലിട്ട് നന്നായി വേവിക്കുക.

ഒരു ഫ്രയിങ്ങ് പാനിൽ കുറച്ചെണ്ണ ഒഴിച്ച് അതിൽ ജീരകവും പെരുഞ്ചീരകവും ഇട്ട് പൊട്ടിക്കുക. ഇതിലേക്ക് ഇഞ്ചി-വെളുത്തുള്ളി പേസ്റ്റ് ചേർത്ത് മൂത്തുവരുമ്പോൾ സവാള അരിഞ്ഞതും പച്ചമുളകും ചേർത്തിളക്കുക. സവാള വഴന്നുവരുമ്പോൾ കുറച്ചു കറിവേപ്പില, മല്ലിയില എന്നിവയോടൊപ്പം തക്കാളി അരിഞ്ഞതും  ചേർത്ത് വഴറ്റുക. തക്കാളി നന്നായി ഉടഞ്ഞുചേർന്നാൽ സ്വല്പം മഞ്ഞൾപ്പൊടിയും പാകത്തിന് മുളകുപൊടിയും പിന്നെ ഗരം മസാലയും ചേർത്തിളക്കി യോജിപ്പിച്ച് വാങ്ങുക. ഈ മിശ്രിതം നന്നായി അരച്ചെടുക്കുക.

ഇനിയുള്ള കാര്യം എളുപ്പമാണ്:
ഒരു പാനിൽ വേവിച്ച രാജ്മ പാകത്തിന് ഉപ്പും ചേർത്ത് ഇട്ടശേഷം അതിലേക്ക് അരപ്പ് കുറച്ചു വെള്ളത്തിൽ കലക്കി ഒഴിക്കുക. കുറച്ചുകൂടി വെള്ളം ഒഴിച്ച് നല്ല അയവിലാക്കാം. എല്ലാം കൂടി അവിടെ കിടന്ന് നന്നായി തിളയ്ക്കട്ടെ. കുറുകാൻ  തുടങ്ങുമ്പോൾ തീ കുറച്ചശേഷംതേങ്ങാപ്പൽ ചേർക്കുക.

തേങ്ങാപ്പാൽ ചേർത്താൽ ഉടനെ വാങ്ങാം. വാങ്ങുന്നതിനുമുമ്പ് കുറച്ച് മല്ലിയില അരിഞ്ഞത് ചേർക്കുക.

ഇത്രേയുള്ളു. രാജ്മ മസാല റെഡി! വളരെ സ്വാദിഷ്ടമായ വിഭവമാണിത്. ചപ്പാത്തിക്കാണ് ഏറ്റവും അനുയോജ്യം. പൂരി, ഇടിയപ്പം, വെള്ളയപ്പം മുതയായവയുടെ കൂടെയും കഴിക്കാം. ഉത്തരേന്ത്യക്കാർ ബാസ്മതി ചോറിന്റെ കൂടെയാണ് ഈ കറി കഴിക്കുക. അതും വേണമെങ്കിൽ പരീക്ഷിക്കാവുന്നതാണ്.