അടുക്കളത്തളം: ചക്കയട

അടുക്കളച്ചൊല്ലുകള്‍.....

“അന്ന വിചാരം മുന്നവിചാരം, പിന്നെ വിചാരം കാര്യവിചാരം”
“ഉപ്പോളം വരുമോ ഉപ്പിലിട്ടത്”
“അരി വിതച്ചാൽ നെല്ലു വിളയാ”
“മുളയിലറിയാം വിള”
“ആര്യൻ വിതച്ചാൽ നവര വിളയുമോ?”
“നവര നട്ടാൽ തുവരയുണ്ടാകുമോ?”
“ഒരു വിത്ത് വിതച്ചാൽ പല വിത്ത് വിളയാ”
“കണ്ണൻ വാഴച്ചുവട്ടിൽ കദളിവാഴയുണ്ടാകുമോ?”
“അമരയും അപരാധവും കുറച്ചുമതി”
“ഉണ്ണാനില്ലാഞ്ഞാൽ വിത്ത്; ഉടുക്കാനില്ലാഞ്ഞാൽ പട്ട്”
“വിത്തുഗുണം പത്തുഗുണം”
“ചൊല്ല് പഴയതായാലും വിത്ത് പഴയതാവരുത്”
“വിശപ്പിനു രുചിയില്ല”
“തവിയറിയുമോ കറിയുടെ രസം?”
“കാന്താരിമുളകെന്തിനാ അധികം?”
“കർക്കിടകച്ചേന കട്ടിട്ടെങ്കിലും തിന്നണം”
“മെല്ലെത്തിന്നാൽ മുള്ളും തിന്നാം”
“പയ്യെത്തിന്നാൽ പനയും തിന്നാം”
“വിത്തെടുത്തുണ്ണരുത്”
“ഉണ്ടെങ്കിലോണം പോലെ ഇല്ലെങ്കിലേകാദശി”
“വെളുക്കുന്നതിനു മുൻപേ അരിവെയ്ക്കണം; അരിവെയ്ക്കുന്നതിനു മുൻപേ കറിവെയ്ക്കരുത്”
“വേണമെങ്കിൽ ചക്ക വേരിലും കായ്ക്കും!”
“എണ്ണിയ പയറ് അളക്കേണ്ട”
“മരത്തിന് കായ കനമല്ല”
“ഉരിനെല്ലൂരാൻ പോയിട്ട് പത്തുപറ നെല്ല് പന്നി തിന്നു”
“മക്കളെ കണ്ടും മാമ്പൂ കണ്ടും കൊതിക്കരുത്”
“ഉച്ചാറലുച്ചയ്ക്ക് വെള്ളാരി നട്ടാൽ വിഷു ഉച്ചയ്ക്ക് പറിക്കാം”
“കർക്കിടകത്തിൽ പത്തില കറിവെച്ചു കൂട്ടണം”
“കാണം വിറ്റും ഓണം ഉണ്ണണം”
“പത്തായം പട്ടിണി കിടക്കരുത്”
“നിലം നികത്തി വീടു വയ്ക്കരുത്”
“തൊഴുതുണ്ണുന്ന ചോറിനേക്കാ‍ൾ ഉഴുതുണ്ണുന്ന ചോറ്”
“വാഴ നനഞ്ഞാൽ ചീരയും നനയും”
“കയ്യാടിയാലേ വയറാടൂ”
“അവിയലിൽ ചേരാത്ത കഷ്ണമില്ല!”
“അണ്ടിയോടടുക്കുമ്പോഴറിയാം, മാങ്ങയുടെ പുളി!”
“അത്താഴമുണ്ടാൽ അരക്കാതം നടക്കണം, മുത്താഴമുണ്ടാൽ മുള്ളിലും കിടക്കണം”
“അധികം വിളഞ്ഞാൽ വിത്തിനും കൊള്ളാ”
“അധികമായാൽ അമൃതും വിഷം”
“അപ്പം തിന്നാൽ മതി; കുഴിയെണ്ണേണ്ട”
“അമ്മിയോടു ചോദിച്ചിട്ടാണോ അരയ്ക്കുന്നത്?”
“അരനാഴിയേ ഉള്ളെങ്കിലും അടുപ്പുകല്ലു മൂന്നു വേണം”
“അരിയെത്ര? പയറഞ്ഞാഴി”
“അഴകുള്ള ചക്കയിൽ ചുളയില്ല!”
“ആറ്റിൽ കളഞ്ഞാലും അളന്നു കളയണം”
“ഉണ്ട ചോറിൽ കല്ലിടരുത്”
“ഉണ്ടവന് പാ കിട്ടാഞ്ഞ്, ഉണ്ണാത്തവന് ഇല കിട്ടാഞ്ഞ്”
“ഉപ്പു തിന്നവൻ വെള്ളം കുടിക്കും”
“ഉള്ള കഞ്ഞിയിൽ പാറ്റ ഇടുക”
“എണ്ണിച്ചുട്ട അപ്പം പോലെ”
“എല്ലു മുറിയെ പണിതാൽ പല്ലു മുറിയേ തിന്നാം”
“കല്ലാടും മുറ്റത്ത് നെല്ലാടുകില്ല”
“കറിക്ക് ചേരാത്ത കഷ്ണം നുറുക്കരുത്”
“ചക്കയ്ക്ക് ചുക്ക്; മാങ്ങയ്ക്ക് തേങ്ങ”
“ഞാറുറച്ചാൽ ചോറുറച്ചു”
“തിന്ന ചോറിന് നന്ദി വേണം”
“മത്ത കുത്തിയാൽ കുമ്പളം മുളയ്ക്കുമോ?”
“പത്തായം പെറും, ചക്കി കുത്തും, അമ്മ വയ്ക്കും, ഞാനുണ്ണും”
“പന്തിയ്ക്കു മുമ്പും പടയ്ക്കു പിമ്പും ”
“പറ നിറയെ പതിരാണെങ്കിലും പാറ്റി നോക്കിയാൽ മണി കാണാം”
“ആലോലനീലമിഴിയാം പ്രിയയാൾ വിളമ്പും ഓലോലനൊന്നു മതി; എന്തിന്നു നൂറു കൂട്ടം?”

ചക്കവരട്ടി സ്റ്റോക്കുണ്ടെങ്കില്‍ അതുകൊണ്ട് പായസം മാത്രമല്ല, അടയുമുണ്ടാക്കാം. വരട്ടിയത് ഇല്ലെങ്കില്‍ കുറച്ചു ചക്കപ്പഴം വേവിച്ച് അരച്ച്, ഒന്നു വെള്ളം വറ്റിച്ചെടുത്ത് എളുപ്പത്തില്‍ അട ഉണ്ടാക്കുകയുമാവാം. പക്ഷെ, നന്നായി വരട്ടിവച്ചിരിക്കുന്ന ചക്കകൊണ്ട് അടയും പായസവുമൊക്കെ ഉണ്ടാക്കിയാലാണ് കൂടുതല്‍ സ്വാദെന്നാണ് ഞാന്‍ പറയുക.

അപ്പോ ശരി, നമുക്ക് അടയുണ്ടാക്കാന്‍ തുടങ്ങാം:

ആവശ്യമുള്ള സാധനങ്ങള്‍:

ചക്കവരട്ടിയത് - അരക്കിലോ
അരിപ്പൊടി(പച്ചരിയുടെ) - ഏകദേശം 300 ഗ്രാം കരുതിവയ്ക്കുക. (വറുത്ത പൊടി എടുക്കരുത്. ഫ്രെഷ് ആയ പൊടിയാണ് വേണ്ടത്).
ശര്‍ക്കര - കൃത്യമായ അളവ് പറയാന്‍ പറ്റില്ല. ചക്കവരട്ടി മധുരമുള്ളതാണ്. പോരാത്തതു മാത്രം ചേര്‍ത്താല്‍ മതിയാവും)
തേങ്ങ ചിരകിയത് - രണ്ടു പിടി
തേങ്ങാക്കൊത്ത് -ഒരു മുറിയുടെ പകുതിയുടേത്
ഏലയ്ക്കാപ്പൊടി - ഒരു സ്പൂണ്‍
ചുക്കുപൊടി - കാല്‍ സ്പൂണ്‍

ഉണ്ടാക്കുന്ന വിധം:

ശര്‍ക്കര സ്വല്പം വെള്ളമൊഴിച്ച് ഉരുക്കി, അരിച്ചെടുത്ത്, ചക്കവരട്ടിയുമായി നന്നായി യോജിപ്പിക്കുക. മിക്സിയിലിട്ട് നന്നായി അടിച്ചെടുത്താല്‍ നല്ല മയം കിട്ടും. ഇതില്‍ അരിപ്പൊടി കുറേശ്ശേയായി ചേര്‍ത്ത് യോജിപ്പിക്കുക. മാവ് ഒന്നു കട്ടിയാവാന്‍ വേണ്ട അരിപ്പൊടി ചേര്‍ത്താല്‍ മതി. കൂടുതലായാല്‍ അട തീരെ മയമില്ലാതെ കല്ലുപോലിരിക്കും.

ഇനി തേങ്ങ ചിരകിയതും തേങ്ങാക്കൊത്തും, ഏലയ്ക്കാപ്പൊടിയും, ചുക്കുപൊടിയും കൂടി ചേര്‍ത്താല്‍ അടയ്ക്കുള്ള മാവ് റെഡിയായി.
ചിത്രം നോക്കൂ.....

ഇനി അടയുണ്ടാക്കാം. ഇതിന് പലയിടത്തും പല രീതികളുണ്ട്. പ്ലാവിലയില്‍, കറുവയുടെ(വയണ/ഇടന/ഇലവര്‍ങം) ഇലയില്‍, വാഴയിലയില്‍ ഒക്കെയാണ് സാധാരണയായി അട ഉണ്ടാക്കുന്നത്. (കറുവയിലയില്‍ ഉണ്ടാക്കുന്ന അടയ്ക്ക് കറുവാപ്പട്ടയുടെ നേരിയ രുചിയും മണവും ഉണ്ടാവും. അത് ഇഷ്ടമുള്ളവര്‍ മാത്രം അതില്‍ ഉണ്ടാക്കിയാല്‍ മതി). ഇനി, വേറെ ഏതെങ്കിലും ഇല ഉപയോഗിക്കുമോ എന്നെനിക്കറിയില്ല.

അടയ്ക്ക് പ്ലാവില ഉപയോഗിക്കുന്ന രീതിയാണ് താഴെ കാണുന്നത്. കുറച്ചു മാവ് ഇലയുടെ നടുക്ക് വച്ച്, ഞെട്ടുഭാഗം മടക്കി, ഞെട്ട് ഇലയിലൂടെ കോര്‍ത്ത് “ലോക്ക്” ചെയ്യുക.

ഇതേരീതി തന്നെയാണ് കറുവയില ഉപയോഗിക്കുമ്പോഴും. പ്ലാവിലയില്‍ തയ്യാറാക്കിയ മാവും കറുവയിലയില്‍ തയ്യാറാക്കിയ മാവും യഥാക്രമം താഴെയുള്ള ചിത്രത്തില്‍ കാണാം:

ഇനി അടുത്തരീതിയാണ് സര്‍വ്വസാധാരണമായത്. അതായത് മാവ് വാഴയിലയില്‍ പൊതിയുന്ന രീതി. (എന്റെ ഭര്‍തൃഗൃഹത്തില്‍ “ചക്കപ്പൊതി” എന്നാണ് ഈ അടയ്ക്ക് പറയുന്നത്). ഇലക്കഷ്ണങ്ങള്‍ ഒന്നു വാട്ടിയെടുത്തശേഷം കുറച്ചു മാവ് നടുക്കു വച്ച് സാധാരണ കടലാസുപൊതിയുന്നപോലെ പൊതിയുക. ഒരുപാട് വലുപ്പം വേണ്ട. ചെറിയചെറിയ പൊതികളാണ് നല്ലത്.

മേല്‍പ്പറഞ്ഞ രീതികളില്‍ ഏതാണ് ഇഷ്ടമായതെന്നു വച്ചാല്‍ അത് ചെയ്യുക. എന്നിട്ട് പ്രഷര്‍കുക്കറിലോ ഇഡ്ഡലിപ്പാത്രത്തിലോ നിരത്തിവച്ച് വേവിച്ചെടുക്കുക,കഴിക്കുക. അത്രതന്ന!
നല്ലോണം ചൂടാറിയിട്ട് കഴിച്ചാല്‍ മതീട്ടോ....അതാണ് കൂടുതല്‍ സ്വാദ്.

ഇത് കറുവയിലയില്‍ ഉണ്ടാക്കിയത്:

ഇത് പ്ലാവിലയില്‍ ഉണ്ടാക്കിയത്:

ഇത് വാഴയിലയില്‍ ഉണ്ടാക്കിയത്:

ഈ ബ്ലോഗിനേക്കുറിച്ച്...

ഒരു പാചകവിദഗ്ദ്ധയാണെന്ന അവകാശവാദമൊന്നും ഇല്ല കേട്ടോ.. എനിയ്ക്കറിയാവുന്ന ചിലത് നിങ്ങളുമായി പങ്കുവയ്ക്കുന്നു എന്നുമാത്രം.
പണ്ടത്തെ തനതു വിഭവങ്ങളെ അതേപടി, അതേ പേരുകളോടെ‍ തന്നെയാണ് ഇവിടെ പരിചയപ്പെടുത്തുന്നത്. പേരുകള്‍ക്കോ, ഉണ്ടാക്കുന്ന രീതികള്‍ക്കോ പ്രാദേശികമായ വ്യത്യാസങ്ങളുണ്ടാകുമല്ലോ. അതേക്കുറിച്ചുള്ള അന്വേഷണം കൂടിയാണ് ഓരോ കുറിപ്പും. നിങ്ങൾക്കറിയാവുന്നത് പറയുമല്ലോ..?
ഇതിൽ പറയുന്ന കുറിപ്പുകളിൽ ഏതെങ്കിലും നിങ്ങൾക്ക് ഇഷ്ടപ്പെട്ടുവെങ്കിൽ, ഉപകാരപ്രദമായെങ്കിൽ, അതിന് ഞാൻ കടപ്പെട്ടിരിക്കുന്നത് അടുക്കളയെന്ന ലോകം നന്നായറിഞ്ഞു വളർന്ന സാഹചര്യങ്ങളോടും എന്റെ അമ്മയോടുമാണ്.

13 പേർ അഭിപ്രായമറിയിച്ചു:

ponmalakkaran | പൊന്മളക്കാരന്‍ said...: കറുവയിലയിലുള്ളവന് ഒന്നാം റാങ്ക്..........; May 25, 2011 at 8:01 AM
പഥികൻ said...: very nice pics !; May 25, 2011 at 9:02 AM
yousufpa said...: ചുണ്ടുകളെ ചെണ്ട കൊട്ടിച്ചു.; May 25, 2011 at 11:07 AM
Mélange said...: karukayilayil mathre njangal undaakkumaayirunnullu.pinne chakkappothiye kurichu munpu kettitundu.ippo kandu.Kothi..ugran.njan karukayila kanda kaalam marannu.orthorthu kothikkarundu.nice clicks as always !; May 25, 2011 at 11:47 AM
Naushu said...: ചിത്രങ്ങള്‍ കണ്ടു ആശ തീര്‍ക്കാം ...; May 25, 2011 at 11:58 AM
Manoraj said...: ഇന്നലെ ചക്കയട തിന്നല്ലോ.. അത് പരുത്തിയിലയിലാട്ടോ ഉണ്ടാക്കിയത്. മാത്രമല്ല, അത് വീട്ടില്‍ അട പുഴുങ്ങുന്നതിനു പകരം വറവ് ചട്ടിയില്‍ ഇട്ട് വറത്തെടുക്കുക എന്ന് പറയില്ലേ അതായിരുന്നു ചെയ്തത് :); May 25, 2011 at 8:37 PM
ആവനാഴി said...: വളരെ നല്ല പോസ്റ്റ്. പലർക്കും ഉപകാരപ്രദമാണു.
വ്വളരെക്കാലമായി ചക്കയട കഴിച്ചിട്ട്; ഒരു മുപ്പതു കൊല്ലം.

പണ്ടു നാട്ടിൽ ആയിരുന്നപ്പോൾ വഴനയിലയിൽ ചക്കയട ഉണ്ടാക്കുമായിരുന്നു. അതിനൊരു പ്രത്യേക മണമാണു.

ചിത്രങ്ങൾ മനോഹരമായിരിക്കുന്നു.; May 26, 2011 at 12:49 AM
ശ്രീക്കുട്ടന്‍ said...: ദേ മനുഷ്യനെ കൊതിപ്പിക്കുന്നതിനും ഒരു പരിധിയുണ്ട്.ചുമ്മാതെ ഒള്ള പടങ്ങളൊക്കെ കൊടുത്ത്....വായിലാണെങ്കില്‍ വെള്ളമൊക്കെയൂറി...; May 26, 2011 at 6:32 PM
ഓര്‍മ്മകള്‍ ഉണ്ടായിരിക്കേണം.... said...: ippol chakkayude time alle ? chakka kondulla pala items thinnu maduthu. ini ithum koodi onnu nokkam, entha ?; May 26, 2011 at 8:14 PM
Cartoonist said...: താഴെ നിന്ന്‍ മൂന്നാമത്തെ ഇലയില്‍ ചവുട്ടി ഞാന്‍ ബോധം കേട്ട് വീണു.
ആരാണീ ഫോട്ടോഗ്രാഫര്‍ ?; May 29, 2011 at 12:04 AM
Mélange said...: Bindu,pindi vibhavam onnum kandillallo ? Will you post some ? pindi-payar thoran,vazhamaangu thoran okke kazhicha kaalam marannu.kothiyayittato.just a request.; June 8, 2011 at 10:33 PM
ശ്രീലാല്‍ said...: ചക്കയടയിലേക്ക് എടുത്തു ചാടാനുള്ള ശക്തമായ ഉൾവിളി. :) ചുക്കുപൊടി നിർബന്ധമാണോ ?; June 11, 2011 at 2:44 PM
ബിന്ദു കെ പി said...: ശ്രീലാൽ: ആദ്യം പായസം. പിന്നെ മതി അട :)
ചുക്കുപൊടി നിർബന്ധമൊന്നുമില്ല. ഏലക്കാപ്പൊടി മാത്രമായാലും മതി.; June 11, 2011 at 4:07 PM

ഞാന്‍.....

അടുക്കളച്ചൊല്ലുകള്‍.....

വിഭാഗങ്ങള്‍:

ഊണിനു സമയമായോ......?

മലയാളം ബ്ലോഗുകള്‍ ലിസ്റ്റ് ചെയ്യപ്പെടുന്ന ഇടങ്ങള്‍:

ചക്കയട

13 പേർ അഭിപ്രായമറിയിച്ചു:

ഈ ബ്ലോഗിനേക്കുറിച്ച്...

എന്റെ മറ്റു ബ്ലോഗുകള്‍:

ഇപ്പോള്‍ വിരുന്നിനെത്തിവര്‍:

ഇതുവരെ സ്വാദു നോക്കിയവർ

Followers

പ്രധാന ബ്ലോഗിംഗ് സഹായികള്‍: