Saturday, May 21, 2011

ഉപ്പുമാങ്ങ

 ഞങ്ങളുടെ തറവാട്ടുവളപ്പില്‍ മാമ്പഴസമൃദ്ധിയുടെ ഒരു കാലമുണ്ടായിരുന്നു. ചെറിയൊരു കാറ്റു വീശിയാല്‍ മതി, മാമ്പഴം മഴപോലെ പൊഴിയുമായിരുന്നു. ഇറയത്ത് കുന്നുകൂടുന്ന മാങ്ങ പിന്നെ ഉപ്പുമാങ്ങ, ഉലുമാങ്ങ, മാങ്ങാത്തൊലി ഒക്കെയായി രൂപാന്തരപ്പെടും. പഞ്ഞമാസക്കാലത്തേക്കുള്ള കരുതിവയ്ക്കല്‍........ഇതില്‍ ഉപ്പുമാങ്ങയാണ് ഏറ്റവും കൂടുതല്‍  ഉണ്ടാക്കാറ്. വലിയ വലിയ ചീനഭരണികളില്‍..........

പതിവുകളൊക്കെ ഇപ്പോഴും ചെറിയതോതില്‍ തുടരുന്നു...മിക്കവാറും വിലകൊടുത്ത് വാങ്ങിയ മാങ്ങകൊണ്ടായിരിക്കുമെന്നു മാത്രം....നല്ല മാങ്ങ കിട്ടിയപ്പോള്‍ കുറച്ചുപ്പുമാങ്ങയിട്ടു. എങ്ങനെയാണെന്നു പറയാം:

ആവശ്യമുള്ള സാധനങ്ങള്‍:
  • നല്ലയിനം നാട്ടുമാങ്ങ - 5 കിലോ (പൊട്ടിയതും ചതഞ്ഞതുമായ മാങ്ങ ഉപയോഗിക്കരുത്. ഉപ്പുമാങ്ങയ്ക്ക് പച്ചമാങ്ങയാണ് സാധാരണ ഉപയോഗിക്കുക. എന്നിരുന്നാലും, പഴുക്കാന്‍ തുടങ്ങിയ മാങ്ങയും ഞങ്ങള്‍ ഉപ്പിലിടാറുണ്ട്. മധുരവും ഉപ്പും പുളിയുമെല്ലാം കൂടി കലര്‍ന്ന സവിശേഷ രുചിയായിരിക്കും ഈ  ഉപ്പുമാങ്ങയ്ക്ക്).
  • ഉപ്പ് - കൃത്യമായ കണക്ക്  പറയാന്‍ പറ്റില്ല. പച്ചമാങ്ങയാണെങ്കില്‍ ഏകദേശം അരക്കിലോ മതിയാവും. പഴുത്ത മാങ്ങയാണെങ്കില്‍ ഉപ്പ് അതിനനുസരിച്ച് കുറയ്ക്കണം.
  • തിളപ്പിച്ചാറിയ വെള്ളം ആവശ്യത്തിന്.

ഉണ്ടാക്കുന്ന വിധം:
ഉപ്പുമാങ്ങ ഇടാനുദ്ദേശിക്കുന്ന ഭരണി/സ്ഫടികഭരണി വൃത്തിയായി കഴുകി വെയിലത്തുവച്ച് നന്നായി ഉണക്കിയെടുക്കണം.
വെള്ളത്തില്‍ ഉപ്പ് ചേര്‍ത്ത് തിളപ്പിക്കുക. ഇത് തണുക്കാന്‍ വയ്ക്കുക.
മാങ്ങ കഴുകി വൃത്തിയാക്കുക.
ഭരണിയിലേക്ക് മാങ്ങ ഇട്ട്  തിളപ്പിച്ചാറിയ ഉപ്പുവെള്ളം ഒഴിക്കുക. മാങ്ങകള്‍ വെള്ളത്തില്‍ മുങ്ങിക്കിടക്കണം. വെള്ളം പോരെങ്കില്‍ വീണ്ടും തിളപ്പിച്ച് ഒഴിക്കണം.
ഏറ്റവും മുകളിലായി കുറച്ചു പച്ചക്കശുവണ്ടി രണ്ടായി മുറിച്ച് (നെയ്യോടുകൂടി) നിരത്തിവയ്ക്കുന്നത് മാങ്ങ കേടാവാതിരിക്കാനും പുഴു വരാതിരിക്കാനുമൊക്കെ നല്ലതാണ്.

ഇനി ഭരണി അടച്ചുവയ്ക്കാം. ചുമ്മാ അടച്ചാല്‍ പോരാ. മെഴുക് ഉരുക്കി ഒഴിച്ചോ മറ്റോ ഭരണി നന്നായി സീല്‍ ചെയ്യണം. അതിനുശേഷം ഏറ്റവും പുറമേ ഒരു തുണിയോ പ്ലാസ്റ്റിക്ക് ഷീറ്റോ വച്ച് മൂടിക്കെട്ടുകയും ചെയ്യാം. ഇനി ഭരണിയെ ശല്യപ്പെടുത്താതെ ഏതെങ്കിലും ഒഴിഞ്ഞ മൂലയില്‍ സ്ഥാപിക്കുക.
ഒരു മാസമൊക്കെ കഴിഞ്ഞാല്‍ വേണമെങ്കില്‍ ഉപ്പുമാങ്ങ പുറത്തെടുക്കാം. പണ്ടുകാലത്ത് കര്‍ക്കിടകമാസത്തിലാണ് ഉപ്പുമാങ്ങ/ഉലുമാങ്ങ ഭരണിയുടെയൊക്കെ സീല്‍ പൊട്ടിക്കുന്നത്.

ദാ, ഇതാണ് ഉപ്പുമാങ്ങ.
ഉപ്പുമാങ്ങ പിഴിഞ്ഞ് കാന്താരിമുളകും കൂട്ടി ചാലിച്ചെടുത്താല്‍ ഒരു കിണ്ണം ചോറുണ്ണാന്‍ പിന്നെ വേറൊന്നും വേണ്ട.
ഇനി അതല്ല, ഇതുകൊണ്ട്  കൂട്ടാനുകളുണ്ടാക്കണമെങ്കില്‍ അതും ആവാം. (അത് പിന്നീട് പറയാം).

4 പേർ അഭിപ്രായമറിയിച്ചു:

Mélange said...

kothiyaayittu vayya.pazhaya kaalathilekku poyi.ini ingane pattumo entho..

ponmalakkaran | പൊന്മളക്കാരന്‍ said...

ഊ...........................

Rare Rose said...

ഭരണിയും,മാങ്ങയുമൊക്കെയായി നല്ല ഉഗ്രന്‍ പടങ്ങള്‍...അതോണ്ട് കൊതി കൂടി :)

കുഞ്ഞൂസ് (Kunjuss) said...

കൊതി മൂക്കുമ്പോ ഞാനും ഇച്ചിരി മാങ്ങാ വാങ്ങിച്ചു , ഉപ്പുമാങ്ങ ഉണ്ടാക്കാറുണ്ട്...പക്ഷേ, ഭരണിയില്‍ ഒന്നും കെട്ടി വെക്കില്ലാ ട്ടോ... ചില്ലുകുപ്പിയിലോ മറ്റോ, അഞ്ചോ ആറോ മാങ്ങാ,അത്ര തന്നെ....

Related Posts Plugin for WordPress, Blogger...
MyFreeCopyright.com Registered & Protected

Copyright © Bindu Krishnaprasad. All rights reserved.

പകർപ്പവകാശം ബ്ലോഗുടമയായ ബിന്ദു കൃഷ്ണപ്രസാദിനു മാത്രം.



Back to TOP