അവിയൽ

പലതരം പച്ചക്കറികളുടെ മിശ്രിതമായ അവിയൽ ഒന്നാന്തരമൊരു സമീകൃതാഹാരമാണ്. വെള്ളം നന്നായി വറ്റിച്ച് കട്ടിയിൽ ഉണ്ടാക്കുന്ന അവിയലാണ് സദ്യകൾക്കും മറ്റും പതിവ്. ഇതല്ലാതെ, സാധാരണ ദിവസങ്ങൾക്കു പറ്റിയ, ഒഴിച്ചുകൂട്ടാൻ പരുവത്തിലുള്ള ഒരു ‘നീട്ടി അവിയൽ’ വീട്ടിൽ പണ്ട് ഉണ്ടാക്കാറുണ്ടായിരുന്നു. ‘നീട്ടി അവിയലിനു’ പച്ചക്കറി വാങ്ങുന്ന പതിവില്ല. പറമ്പിൽ നിന്നു ശേഖരിക്കുന്ന പപ്പായ, താൾ,വഴുതനങ്ങ പയർ,ഒടിഞ്ഞുകിടക്കുന്ന വാഴയിൽനിന്നുള്ള മൂക്കാത്ത കായ, ചീരത്തണ്ട് മുതലായവ കൊണ്ടായിരുന്നു നീട്ടി അവിയൽ തയ്യാറാക്കിയിരുന്നത്.

ഏതായാലും ഞാനിപ്പോൾ പറയാൻ പോകുന്നത് സാധാരണ എല്ലാവരും ഉണ്ടാക്കുന്ന അവിയലിനെ പറ്റിയാണ്.

ആവശ്യമുള്ള സാധനങ്ങൾ:

വിവിധതരം പച്ചക്കറികൾ - “അവിയലിൽ ചേരാത്ത കഷ്ണമില്ല” എന്നാണ് ചൊല്ല്. എന്നാലും സാധാരണയായി ഉപയോഗിക്കുന്നത് കായ, ചേന, കുമ്പളങ്ങ/വെള്ളരി, പാവയ്ക്ക, കാരറ്റ്, കൊത്തമര, ബീൻസ്/പയർ, മുരിങ്ങക്കായ,വഴുതനങ്ങ മുതലായവയാണ്. എല്ലാംകൂടി എകദേശം ഒരു കിലോ എന്നു വയ്ക്കുക.

പച്ചമുളക് - 8-10 എണ്ണം.

തേങ്ങ ചിരകിയത് - അവിയലിന് “കഷ്ണത്തിൻ പാതി തേങ്ങ” എന്നാണ് പറയുക. അതുകൊണ്ട് തേങ്ങയുടെ കാര്യത്തിൽ ഒട്ടും പിശുക്ക് വേണ്ട.

പുളി - ആവശ്യത്തിന്. (പുളിയുടെ കാര്യത്തിൽ പ്രാദേശികമായ വ്യത്യാസങ്ങൾ ഉണ്ട്. ഞങ്ങളുടെ വീട്ടിൽ പുളിയാണ് പണ്ടുമുതലേ ഉപയോഗിക്കുന്നത്. എന്റെ ഭർതൃഗൃഹത്തിൽ പുളിയ്ക്കു പകരം തൈരാണ് ഉപയോഗിക്കാറ്. ചിലർ പച്ചമാങ്ങയാണ് ചേർക്കുക.)

പിന്നെ ജീരകം, മുളകുപൊടി, മഞ്ഞൾപ്പൊടി, ഉപ്പ്, കറിവേപ്പില, വെളിച്ചെണ്ണ - ഒക്കെ ആവശ്യം പോലെ

ഉണ്ടാക്കുന്ന വിധം:

പച്ചക്കറികൾ എല്ലാം കനം കുറച്ച് നീളത്തിൽ അരിഞ്ഞെടുക്കുക. (കായയുടെ തൊണ്ടു കളയേണ്ട ആവശ്യമില്ല). പച്ചമുളകും രണ്ടായി കീറി ഇതിലിടുക. പാകത്തിന് ഉപ്പും മുളകുപൊടിയും മഞ്ഞൾപ്പൊടിയും ചേർത്ത് ഇളക്കിയശേഷം ചുവടു കട്ടിയുള്ള പാത്രത്തിലിട്ട് നികക്കെ വെള്ളമൊഴിച്ച് വേവിക്കാൻ വയ്ക്കുക (കുക്കറിൽ വേവിയ്ക്കരുത്). ഒന്നു ചൂടായാൽ പുളി പിഴിഞ്ഞതും ചേർക്കാം. ഒരു വാഴയിലകൊണ്ട് അടച്ചു വേവിയ്ക്കുന്നത് അവിയലിന്റെ സ്വാദ് കൂട്ടും. ഇടയ്ക്കിടെ ഇളക്കികൊടുക്കുക

തേങ്ങ ജീരകം ചേർത്ത് ഒന്നു ചതച്ചെടുക്കുക. അരഞ്ഞുപോകരുത്. മിക്സിയിലാണെങ്കിൽ വെള്ളം ചേർക്കാതെ ഒന്നു തിരിച്ചെടുത്താൽ മതിയാവും.

കഷ്ണങ്ങൾ വെന്ത് വെള്ളം നിശ്ശേഷം വറ്റിക്കഴിഞ്ഞാൽ വാങ്ങിവയ്ക്കാം. അതിനുശേഷം ചതച്ചുവച്ചിരിക്കുന്ന തേങ്ങ ചേർത്ത് നന്നായി ഇളക്കണം.

അവസാനം കറിവേപ്പില ഇട്ട്, വെളിച്ചെണ്ണ ഒഴിച്ച് ഒന്നുകൂടി ഇളക്കി യോജിപ്പിക്കുക. കറിവേപ്പിലയുടേയും വെളിച്ചെണ്ണയുടേയും വാസനയെ രക്ഷപ്പെടാൻ അനുവദിക്കാതെ ഉടനെ തന്നെ അടച്ചു വയ്ക്കുക.

സ്വാദിഷ്ടമായ അവിയൽ റെഡി!